អាកាសយានដ្ឋានអន្តរជាតិតារាសាគរដែលមានទីតាំងនៅ ស្រុកបទុមសាគរ ខេត្តកោះកុង មានតម្លៃជាង ៣០០លានដុល្លារដែលវិនិយោគដោយក្រុមហ៊ុន Union Development Group គ្រោងបើកជើងហោះហើរក្នុងស្រុកលើកដំបូងនៅថ្ងៃទី២៨ ខែវិច្ឆិកា ឆ្នាំ២០២៤ ខាងមុខនេះហើយ។ ដោយមានការចុះចតជាជំហានដំបូងនេះគឺប្រតិបត្ដិការដោយក្រុមហ៊ុនអាកាសចរ Air cambodia។ នេះបើយោងតាមការដកស្រង់ពីរបស់រដ្ឋបាលខេត្តកោះកុងកាលពីថ្ងៃទី២៣ ខែតុលា ឆ្នាំ២០២៤។
លោក ម៉ៅ កែវពេជ្រច័ន្ទមុន្នី នាយកនៃអាកាសយានដ្ឋានអន្តរជាតិតារាសាគរបានអោយដឹងថា ចំពោះការបើកដំណើរការដំណាក់កាលដំបូងនេះ អនុញ្ញាតសម្រាប់តែយន្តហោះខ្នាតតូច (Taxi fly) ប៉ុណ្ណោះ មិនសម្រាប់យន្តហោះពាណិជ្ជកម្មនោះទេ។ លោកក៏បានបន្តថាផ្នែកធំៗជាច្រើននៅក្នុងអាកាសយានដ្ឋាននេះបានសាងសង់រួចរាល់ ១០០ភាគរយហើយក្នុងនោះមានដូចជា ផ្លូវរត់, ចំណតយន្តហោះ, ប្រព័ន្ធនាំផ្លូវចុះចត និងវិទ្យុទាក់ទងជាមួយយន្តហោះ ចំណែកសំណង់ដែលមិនទាន់រួចរាល់គឺអាគារស្ថានីទទួលអ្នកដំណើរ ប៉ុន្តែនឹងបញ្ជប់ការសាងសង់នៅមុនថ្ងៃបើកដំណើរការខាងមុខនេះផងដែរ។មិនតែប៉ុណ្ណោះវាអាចទទួលយន្តហោះខ្នាតធំ A350-900 និង Boeing777 បានផងដែរ។
គួរបញ្ជាក់ផងដែរថា បន្ទាប់ពីពេលចាប់ផ្តើមការសាងសង់ក្នុងឆ្នាំ ២០១៨មក គម្រោងអាកាសយានដ្ឋានថ្មីនេះមានគម្រោងដាក់ឲ្យដំណើរការជាច្រើនដងរួចមក ប៉ុន្ដែដោយសារបញ្ហាមួយក៏ត្រូវបានពន្យារពេលជាបន្ដបន្ទាប់ រហូតដល់ថ្ងៃទី២៨ ខែវិច្ឆិកា ឆ្នាំ២០២៤នេះ។
ជាក់ស្ដែងលើកទី១ គ្រោងបើកដំណើរកាលពីឆ្នាំ២០២១ តែត្រូវបានពន្យារពេលដោយសារតែវិបត្តិកូវីត១៩ធ្វើអោយអ្នកបច្ចេកទេសមានការលំបាកក្នុងការចេញចូលប្រទេសកម្ពុជា សម្ភារផ្សេងៗកើនឡើងតម្លៃខ្ពស់ជាងមុន និងមានការយឺតយ៉ាវផ្នែកដឹកជញ្ជូនបូករួមទាំងសង្គ្រាមរវាងរុស្ស៊ី និងអ៊ុយក្រែន។
ចំណែកលើកទី២ ក្រុមហ៊ុនវិនិយោគនេះបានសុំពន្យារបើកដំណើរការនៅពាក់កណ្តាលឆ្នាំ២០២២ មកចុងឆ្នាំ២០២២ វិញក្រោមហេតុផលការចេញចូលប្រទេសចិនតឹងរឹងព្រមទាំងការរាំងស្ទះការដឹកជញ្ជូនសម្ភារផ្សេងៗ។ និងលើកទី៣នៅក្នុងឆ្នាំ២០២៣ក្រុមហ៊ុនសាងសង់នេះបានសុំពន្យារពេលបើកដំណើរការជាថ្មីម្ដងទៀត ក្រោមហេតុផលចង់បំពេញចន្លោះខ្វះខាតបន្ថែមក្នុងការអភិវឌ្ឍ។
គួររំលឹកដែរថា មុននឹងដាក់ឲ្យដំណើរការនៅថ្ងៃទី៨ ខែវិច្ឆិកា ឆ្នាំ២០២៤ ខាងមុខនេះ អាកាសយានដ្ឋានអន្តរជាតិតារាសាគរក៏ត្រូវបានធ្វើតេស្ដហោះហើរសាកល្បងកាលពីថ្ងៃទី២៩និង៣០ខែកញ្ញាកន្លងទៅផងដែរ ដើម្បីត្រួតពិនិត្យឧបករណ៍ រ៉ាដា និងបច្ចេកទេសមួយចំនួនទៀត៕
អត្ថបទ៖ លីណា