Chrisanti Indiana គឺជាស្ត្រីឆ្នើមខាងរកស៊ីរបស់ប្រទេសឥណ្ឌូនេស៊ី ដែលអាចបង្កើតក្រុមហ៊ុនលក់ទំនិញតាមប្រព័ន្ធអេឡិចត្រូនិកឈ្មោះ Sociolla ដែលបច្ចុប្បន្នមានអតិថិជន ៣០លាននាក់ លក់ផលិតផល ១២០០០មុខ ស្មើនឹងយីហោសរុប ៤០០ប្រ៊ែន។
អ្វីដែលរឹតតែគួរឱ្យកើតសរសើរ នាងចេញរកស៊ីតាំងពីវ័យ២៤ឆ្នាំ (បច្ចុប្បន្ន៣១ឆ្នាំ) ហើយក្រុមហ៊ុនរបស់នាងក៏ធ្លាប់បានប្រមូលទុនពីអ្នកវិនិយោគសរុប ២២៥លានដុល្លារផងដែរ កាលពីឆ្នាំ២០១៨។
ទាក់ទិននឹងគន្លឹះនៃភាពជោគជ័យ នាងធ្លាប់បាននិយាយសម្ដីចាក់ដោតមួយឃ្លាថា “អ្នកនឹងមិនមានអ្វីបាត់បង់ជាដុំកំភួននោះទេ នេះហើយជាអត្ថប្រយោជន៍សម្រាប់អ្នកដែលហ៊ានចាប់ផ្ដើមតាំងតែពីក្មេង”។ បន្ថែមពីនោះនាងក៏បង្ហើបពីគន្លឹះមួយចំនួន ដែលធ្វើឱ្យនាងអាចកសាងក្រុមហ៊ុនតម្លៃរាប់រយលានដុល្លារយ៉ាងដូច្នេះ៖
១. បត់បែនរហ័សរហួន
Indiana បាននិយាយថា នៅពេលដំណើរការអាជីវកម្ម ការសម្របខ្លួនទៅនឹងការផ្លាស់ប្តូរគឺជារឿងសំខាន់បំផុត។ ជាក់ស្ដែងនៅពេលដែលពិភពលោក ជួបនូវបញ្ហាជំងឺរាតត្បាតជុំវិញពិភពលោក វាទាមទារឱ្យអាជីវកម្មនាងមានភាពឆ្លាតវៃ បត់បែនតាមសភាពការណ៍។
២. ធ្វើអ្វីដែលត្រឹមត្រូវ
នៅក្នុងឆ្នាំ២០១៥ មានបញ្ហាការរីករាលដាលនៃការលក់ផលិតផលក្លែងក្លាយក្នុងទីផ្សារ ដែលពេលនោះហើយនាងក៏សម្រេចចិត្តធ្វើអ្វីដែលត្រឹមត្រូវ ពោលគឺលក់ផលិតផលដែលមានគុណភាព សុវត្ថិភាព និងមានការទទួលស្គាល់ពីអាជ្ញាធរ។ ការធ្វើអ្វីដែលត្រឹមត្រូវនេះហើយ បានធ្វើឱ្យអាជីវកម្មនាង រីកចម្រើនជាបន្តបន្ទាប់មកទល់ចំណុចបច្ចុប្បន្ន។
៣. ជ្រើសរើសដៃគូរកស៊ីឱ្យត្រឹមត្រូវ
នាងបានបង្ហាញអំពីភាពរីកចម្រើននៃអាជីវកម្មនាង ដោយសារតែនាងមានដៃគូរកស៊ីល្អៗ ដែលអាចជួយបំពេញចំណុចខ្វះខាតឱ្យគ្នា ជួយជ្រោមជ្រែង ជួយជំរុញគ្នាឱ្យមានភាពរីករាយ រីកចម្រើនទៅមុខ។ ការជ្រើសរើសដៃគូរកស៊ីសំខាន់ណាស់ព្រោះបើរើសខុស មានជម្លោះកើតឡើង នោះអាជីវកម្មប្រឈមនឹងភាពបរាជ័យផងដែរ៕
