ក្រោយឃើញការបង្ហោះសុំជំនួយលើបណ្តាញសង្គម Facebook អមជាមួយរូបភាពរំជួលចិត្តរបស់សិស្សានុសិស្សកំពុងអង្គុយរៀនក្នុងទឹក ក្រសួងអប់រំ បានសម្រេចសាងសង់អគារសិក្សាថ្មី ១ខ្នង ជូនសាលាបឋមសិក្សាដំណាក់ក្សាន្ត សហគមន៍ និងអាជ្ញាធរដែនដី ស្ថិតក្នុង ឃុំចក្រី ស្រុកភ្នំព្រឹក ខេត្តបាត់ដំបង។

យោងតាមសេចក្ដីបំភ្លឺ របស់ក្រសួងអប់រំ យុវជន និងកីឡា នារសៀលថ្ងៃទី០៤ ខែតុលា ឆ្នាំ២០២៣ បានបញ្ជាក់យ៉ាងដូច្នេះថា៖ «នាព្រឹកថ្ងៃទី០៣ ខែតុលា ឆ្នាំ២០២៣ នៅក្នុងបណ្តាញសង្គមមានការចែករំលែករូបភាពគ្រូបង្រៀន និងសិស្សកំពុងបង្រៀន និងរៀនក្នុងរោងដោល និងមានទឹកលិចត្រឹមជង្គង់ ដែលករណីនេះបានកើតឡើងនៅ សាលាបឋមសិក្សាដំណាក់ក្សាន្ត»។

ដើម្បីដោះស្រាយបញ្ហាប្រឈម នៃការខ្វះខាតអគារសិក្សា ក្រសួងអប់រំ យុវជន និងកីឡា បានសម្រេចសាងសង់អគារសិក្សាថ្មី ១ខ្នង ៥បន្ទប់ ជាអាទិភាពជូនដល់គណៈគ្រប់គ្រង លោកគ្រូ អ្នកគ្រូ សិស្សានុសិស្ស សហគមន៍ និងអាជ្ញាធរដែនដី ដើម្បីឱ្យដំណើរការរៀន និងបង្រៀនកាន់តែប្រសើរនាពេលខាងមុខ។

គួរជម្រាបផងដែរថា ក្នុងឆ្នាំសិក្សា២០២២-២០២៣ សាលាបឋមសិក្សាដំណាក់ក្សាន្ត មានអគារសិក្សា ១ខ្នង ៥បន្ទប់ និងមានរោងដោល ១ខ្នង ១បន្ទប់, គ្រូបង្រៀនសរុប ៧នាក់ ស្រី ២នាក់, និងមានសិស្សសរុប ៣៦៦នាក់ ស្រី ១៧៤នាក់ ចែកចេញជា ១២ថ្នាក់។ បើប្រៀបធៀបចំនួនបន្ទប់រៀន និងចំនួនថ្នាក់រៀនគឺ សាលានៅខ្វះ បន្ទប់រៀន រួមទាំងបន្ទប់ទីចាត់ការ និងបណ្ណាល័យ ជាដើម៕

អត្ថបទដោយ៖ កាន់ ដារ៉ា (ស្មេរពនេចរ)