តាមការចុះផ្សាយរបស់ក្រសួងទេសចរណ៍បានឱ្យដឹងថាខេត្តសៀមរាប នឹងមានព្រឹត្តិការណ៍ធំៗ ចំនួន២ នឹងធ្វើឡើងនៅចុងខែតុលានេះ រង់ចាំភ្ញៀវទេសចរជាតិ-អន្តរជាតិទៅទស្សនាឱ្យបានកុះករ ដើម្បីផ្តិតយកទស្សនីយ៍ភាព ដ៏អស្ចារ្យនៃអាណាចក្រខ្មែរសម័យអង្គរ និងពិព័រណ័ម្ហូបអាហារកម្ពុជា-ចិន ដែលជាសកម្មភាពទេសចរណ៍មួយ ជួយជំរុញឱ្យការលក់ដូររបស់អាជីវកម្មនានាក្នុងខេត្តសៀមរាប។
ព្រឹត្តិការណ៍ទី១គឺ ពិព័រណ៍ម្ហូបអាហារកម្ពុជា-ចិន ដែលចាប់ផ្តើមប្រារព្ធឡើង ពីថ្ងៃទី២៦-២៧ ខែតុលា ឆ្នាំ២០២៤ នៅក្នុងខេត្តសៀមរាប ដែលមានដូចជាការភ្លក់មុខម្ហូបដោយសា្នដៃកូនខ្មែរនិងចិន ព្រមទាំងសកម្មភាពកម្សាន្តជាច្រើនទៀត។
ព្រឹត្តិការណ៍ទី២ ចាប់ពីថ្ងៃទី២៩-៣០ ខែតុលានេះ នឹងមានព្រឹត្តិការណ៍បហង្ហាញ ភាពអស្ចារ្យនៃអាណាចក្រខ្មែរសម័យអង្គរ "ស្នាមញញឹមនៃកម្ពុជាលើកទី២" ដែលនាំមកនូវផ្ទាំងទស្សនីយភាពយ៉ាងរស់រវើក រំលេចនូវវប្បធម៌ដ៏យូរលង់ដូចជាការដង្ហែក្បួនទ័ព ពីក្រុមនាថការី ក្រុមសិល្បៈល្បីៗជាង ៥០០នាក់ នៅខាងក្នុងប្រាសាទអង្គរ ។
លើសពីនោះក៏មានការតាំងពិព័រណ៍ម្ហូប សំលៀកបំពាក់ខ្មែរ រួមទាំងវត្ថុអនុស្សាវរីយ៍ស្នាដៃកូនខ្មែរថែមទៀតផង។ ជាពិសេសសម្រាប់ភ្ញៀវទេសចរណ៍ជាតិនិងអន្តរជាតិដែលស្លៀកសំលៀកបំពាក់ប្រពៃណីខ្មែរទៅចូលរួមនឹងទទួលបានការពិសារអាហារនិងទឹកដោយឥតគិតថ្លៃ។
ដូច្នេះសម្រាប់បងប្អូនទាំងភ្ញៀវជាតិ-អន្តរជាតិដែលមានបំណងទៅលេងខេត្តសៀមរាបកុំភ្លេចចូលរួមទស្សនាឱ្យបានច្រើនកុះករដើម្បីចូលរួមជំរុញយុទ្ធនាការឆ្នាំទស្សនាសៀមរាប ២០២៤៕
អត្ថបទដោយ៖ ពីង ជូអេង