បច្ចុប្បន្ននៅក្នុងរាជធានីភ្នំពេញមានស្ពានអាកាសចំនួន ៩ កន្លែងហើយ ដោយក្នុងនោះស្ពានចំនួន ៦ បានសាងសង់រួចរាល់នឹងដាក់ឲ្យប្រជាពលរដ្ឋប្រើប្រាស់ផ្លូវការ ចំណែកស្ពានអាកាសចំនួន ៣កន្លែងទៀតកំពុងតែបើកការដ្ឋានសាងសង់។
ចំពោះស្ពានអាកាសដែលបានដាក់ឱ្យដំណើរទាំង ៦ នោះរួមមាន៖
១. ស្ពានអាកាស៧ មករា( ស្ពានស្តុកពេទ្យលោកសង្ស)
ស្ពាននេះស្ថិតនៅក្នុង ខណ្ខទួលគោក ខណ្ឌសែនសុខ រាជធានីភ្នំពេញ មានទីតាំងនៅលើបណ្តោយមហាវិថីសហព័ន្ធរុស្សី ដោយមានបែកខ្នែងឆ្ពោះទៅវិថីកម្ពុជាក្រោម។ ស្ពានេះបើកការដ្ឋានសាងសង់កាលថ្ងៃទី២៩ ខែធ្នូ ឆ្នាំ២០១០ និងដាក់សម្ពោធឱ្យប្រើប្រាស់នៅថ្ងៃទី០៦ ខែមករា ឆ្នាំ២០១២ សាងសង់ដោយក្រុមហ៊ុនវិនិយោគទុនអាណិកជនកម្ពុជា OCIC សាងសង់ ចំណាយទឹកប្រាក់ប្រមាណ ៨,៧០៥,៨០៨ដុល្លារ។
២. ស្ពានអាកាស៥មករា (ស្ពានអាកាសតិចណូ)
ស្ពាននេះ បានបើកការដ្ឋានសាងសង់ កាលពីថ្ងៃទី០៩ ខែកញ្ញា ឆ្នាំ២០១៤ បញ្ចប់ ការសាងសង់ នៅថ្ងៃទី០៩ ខែមករា ឆ្នាំ២០១៦។ ស្ពានមួយកន្លែងនេះបានសាងសង់ដោយក្រុមហ៊ុន OCIC ហើយគម្រោងនេះបានចំណាយថវិកាសាងសង់ប្រមាណ ១៤.៥០២.៤៧៦ដុល្លារ ។
៣.ស្ពានអាកាសស្ទឹងមានជ័យ
ស្ពាននេះចាប់ផ្ដើមដំណើរការសាងសង់កាលពីថ្ងៃទី២៦ ខែវិច្ចិកា ឆ្នាំ២០១២ និងសម្ពោធដាក់ឱ្យប្រើប្រាស់នៅថ្ងៃទី៣១ ខែកក្កដា ឆ្នាំ២០១៤។ សាងសង់ដោយក្រុមហ៊ុន OCIC ដូចគ្នាស្ពានអាកាសទាំងពីរខាងលើផងដែរ និងបានចំណាយទឹកប្រាក់អស់ ១៨.៩៧៦.៦៧៨ ដុល្លារ។
៤. ស្ពានអាកាសមិត្តភាពកម្ពុជា ចិនសែន សុខ (ស្ពានអាកាសស្តុបផ្សារដីហុយ)
ស្ពាននេះចំណាយថរិការសាងសង់ប្រមាណ១៧ លានដុល្លារ ជាហិរញ្ញប្បទានសម្បទានពីរដ្ឋាភិបាល ចិន រួមជាមួយថវិកាបដិភាគរបស់រាជរដ្ឋាភិបាលកម្ពុជា។ ស្ពានអាកាសនេះដែរ ត្រូវបានបើការដ្ឋានសាងសង់នៅខែឧសភា ឆ្នាំ២០១៦ ហើយបញ្ចប់ការសាងសង់នៅខែឧសភា ឆ្នាំ២០១៨។
៥. ស្ពានអាកាស និង ផ្លូវក្រោមដីចោមចៅ
ស្ពានអាកាស និងផ្លូវក្រោមដីចោមចៅនេះ បានបើកការដ្ឋានសាងសង់ កាលពីថ្ងៃទី ២៩ ខែមិថុនា ឆ្នាំ ២០១៩ ចំណាយថវិកាសាងសង់ប្រមាណ ២២ លានដុល្លារ និងត្រូវបានប្រកាសដាក់ឱ្យប្រើប្រាស់ជាផ្លូវការ ចាប់ពីថ្ងៃទី ៣១ ខែមីនា ឆ្នាំ ២០២២ ។ ស្ពានអាកាសនេះទទួលម៉ៅការសាងសង់ដោយក្រុមហ៊ុនវិនិយោគទុនអាណិកជន-កម្ពុជា OCIC។
៦. ស្ពានអាកាសក្បាលថ្នល់
ស្ពាននេះជាស្ពានអាកាសដំបូងគេនៅរាជធានីភ្នំពេញ។ ស្ពាននេះសាងសង់ដោយក្រុមហ៊ុន OCIC និងដាក់សម្ភោធឲ្យប្រើប្រាស់នៅថ្ងៃទី ២៤ ខែ មិថុនា ឆ្នាំ ២០១០។
ដោយឡែក ចំពោះស្ពានអាកាស៣ទៀតដែលរាជរដ្ឋាភិបាលកំពុងតែបើកសាររដ្ឋានសាងសង់ក្នុងនោះរួមមាន៖ ស្ពានអាកាសស្ថិតនៅបណ្ដោយផ្លូវជាតិលេខ៥។ គម្រោងនេះបានបើការដ្ឋានសាងសង់កាលពីថ្ងៃទី៣១ ខែមករា ឆ្នាំ២០២២ ដែលចំណាយថវិកាសាងសង់ជិត ១០លានដុល្លារ។ គម្រោងស្ពានអាកាសនេះ សាងសង់ដោយក្រុមហ៊ុនវិនិយោគទុនអនិកជនកម្ពុជា (OCIC) គ្រោងបញ្ចប់នៅឆ្នាំ២០២៣ផងដែរ។
ចំពោះស្ពានអាកាសចំនួន២ ដែលមានទីតាំងស្ថិតនៅចំណុចប្រសព្វមហាវិថីសម្តេចតេជោ ហ៊ុន សែន មហាវិថីព្រះមុនីវង្ស ជាមួយវិថីកងយោធពលខេមរភូមិន្ទ (ផ្លូវលេខ២៧១) ក្នុងទឹកដីខណ្ឌចំការមន និងខណ្ឌមានជ័យ និងស្ពានមួយកន្លែងទៀតស្ថិតនៅចំណុចប្រសព្វមហាវិថីសហព័ន្ធរុស្ស៉ី ជាមួយមហាវិថីសម្ដេចចៅហ្វាវាំងវរវៀងជ័យអធិបតីស្រឹង្គារ គង់ សំអុល (ផ្លូវលេខ២០០៤) ក្នុងខណ្ឌពោធិ៍សែនជ័យ ត្រូវបានបើកការដ្ឋានសាងសង់នៅថ្ងៃទី៣១ ខែសីហា ឆ្នាំ២០២២នេះផងដែរ។
តាមការបញ្ជាក់គម្រោងទាំង ២ នេះនឹងត្រូវចំណាយថវិកាសរុបចំនួន ៤៦ លានដុល្លារផងដែរ។
អត្ថបទដោយ៖ ឌឿក ស្រី នុត រតនៈ
