បច្ចុប្បន្ននេះមានការឆបោកច្រើនតាមអនឡាញក្នុងទម្រង់ផ្សេងៗ ដូច្នេះអ្នកប្រើប្រាស់បណ្ដាញសង្គមផ្សេងៗគួរមានការប្រុងប្រយ័ត្ន ជាពិសេសអ្នកប្រើប្រាស់App ធនាគារតាមទូរស័ព្ទអាចនឹងជួបហានិភ័យបាត់បង់លុយបើមិនបានដឹងពីល្បិចឆបោកទាំងនោះ។
ជុំវិញការឆបោកតាមអនឡាញនេះដែរ ធនាគារ អេស៊ីលីដាក៏បានផ្ញើសារមកកាន់អតិថិជនរបស់ខ្លួនដើម្បីកើនរំលឹកក៏ដូចជាព្រមានពីព័ត៌មានក្លែងបន្លំផ្សេងៗដែលអ្នកប្រើប្រាស់គួរមានការប្រុងប្រយ័ត្នដើម្បីចៀសវាងការចាញ់បោកជនខិលខូច។
នៅក្នុងនោះដែរ ធនាគារ អេស៊ីលីដាសូមឲ្យអតិថិជនប្រុងប្រយ័ត្នព័ត៌មានក្លែងបន្លំ ឬឆបោក តាមប្រព័ន្ធអេឡិចត្រូនិក Call, SMS, E-mail, Telegram ឬបណ្តាញសង្គមផ្សេងៗ ដើម្បីលួចព័ត៌មានផ្ទាល់ខ្លួន ដូចជា៖ គណនី លេខសម្ងាត់ ឬលេខ OTP របស់លោកអ្នក។
ធនាគារក៏បានបញ្ជាក់ផងដែរថា សិនបើលោកអ្នកទទួលបានការស្នើសុំជាបន្ទាន់នូវព័ត៌មានផ្ទាល់ខ្លួន ដើម្បីចូលទៅកាន់គណនីធនាគារ ការស្នើសុំលេខអត្តសញ្ញាណ ឬក៏ដើម្បីបញ្ជាក់នូវព័ត៌មានគណនីធនាគាររបស់លោកអ្នក សូមកុំចុចទៅលើ Link ដែលទទួលបាន ឬធ្វើការឆ្លើយតប និងផ្ដល់នូវព័ត៌មានផ្ទាល់ខ្លួនជាដាច់ខាត។ ដើម្បីទទួលចំណេះដឹងសុវត្ថិភាពផ្ទាល់ខ្លួន និងរបៀបក្នុងការជៀសវាង ព្រមទាំងបង្ការពីការឆបោក (Phishing Scams) សូមចុចនៅទីនេះ។
គួរបញ្ជាក់ផងដែរថាកាលពីពេលថ្មីៗនេះនាយកដ្ឋានប្រឆាំងបទល្មើសបច្ចេកវិទ្យា បានបង្ហាញនូវតំណភ្ជាប់ថ្មីផ្សេងទៀតដល់អ្នកប្រើប្រាស់កម្មវិធី Telegram តាមរយៈការផ្ញើដំណរភ្ជាប់បោកបញ្ឆោត (Link ក្លែងក្លាយ) ទៅកាន់សារទូរស័ព្ទ SMS ដើម្បីអោយអ្នកប្រើប្រាស់កម្មវិធី Telegram ដើម្បីបំពេញព័ត៌មាន និងឈានទៅដល់ការយកគណនីអ្នកប្រើប្រាស់មកគ្រប់គ្រងពីជនអានាមិក។
អាស្រ័យដូច្នេះ សូមអ្នកប្រើប្រាស់កម្មវិធី Telegram ទាំងអស់មេត្តាប្រុងប្រយ័ត្ន និងកុំចុចលើដំណរភ្ជាប់ ដូចមានក្នុងរូបភាពខាងក្រោម ឬដំណរភ្ជាប់ណាដែលមិនច្បាស់លាស់ និងបំពេញព័ត៌មានផ្ទាល់ខ្លួនអោយសោះ ចៀសវាងមានបញ្ហាដោយប្រការណាមួយដែលអាចកើតមានឡើង៕
