មនុស្សភាគច្រើនតែងតែគិតចង់ទៅសាលាល្អ ដើម្បីមានឱកាសអាចទទួលបានការងារល្អ និងប្រាក់ខែខ្ពស់​ ប៉ុន្តែដោយឡែកអីបើក្រឡេកមកមើលយុវជនរូបនេះវិញមិនចង់ធ្វើការឱ្យគេទេ ឆ្លៀតពេលពីការសិក្សាបើករបរលក់កូនឈើ កើបចំណូលយ៉ាងតិចក្បែរពាន់ដុល្លារក្នុងមួយខែៗ។

ឆ្លៀតពេលទំនេរពីការសិក្សា លោក ហ្វ្រែង ប៉ារ៉ាម៉េត សុខមង្គល ដែលត្រូវបានគេស្គាល់ថាជានិសិត្សផ្នែកវិស្វកម្មបានឱ្យដឹងថា ក្រៅពីពេលទំនេរ ពីការសិក្សាលោកបើកលក់មុខរបរលក់កូនឈើ ដើម្បីបង្កើតចំណូលខ្លះដើម្បីផ្គត់ផ្គង់ទៅលើការសិក្សានិងការចាយវាយផ្សេងៗ។ លោកបានបន្តទៀតថា មូលហេតុដែលលោកបើកមុខរបរនេះឡើង ព្រោះលោកចូលចិត្តរុក្ខជាតិ និងដាំដើមឈើជំុវិញផ្ទះទាំងពីតូចមកម្ល៉េះ។

សហគ្រិនវ័យក្មេងរូបនេះបានបន្ថែមទៀតថា​ ដើមទុននៅកាលលក់ដំបូង លោកមានត្រឹមតែ៦០ដុល្លារតែប៉ុណ្ណោះ ពោលគឺលក់តាមអនឡាញជាមុនសិន រហូតបើកបានមួយរយៈលោកបានបើកនៅផ្ទះតែម្តង ដោយបាន២ឆ្នាំ លោកអាចរកចំណូលបានជាមធ្យម៩០០០ដុល្លារពីមុខរបរមួយនេះ។

ជាចុងក្រោយលោកបានលោកឡើងថា កន្លែងលក់កូនឈើគឺច្រើនខ្លាំងមែនទែន ប៉ុន្តែអ្វីដែលធ្វើឱ្យលក់អាចលក់ដាច់ខ្លាំងដោយសារតែលោក ចំណាយពេលព្យាយាមស្វែងគ្រប់ពូជណាកម្រយកលក់ ជៀសវាងការលក់ដូចតែគេ ដូចតែឯងនោះទេ ព្រោះបើដូចគេអតិថិជនអាចទៅរកបានគ្រប់កន្លែង តែបើមានតែយើងនោះគាត់នឹងមករកយើងជាមិនខាន៕