ក្រុមហ៊ុនផលិតរថយន្តអគ្គិសនីក្នុងស្រុកដំបូងគេរបស់វៀតណាមគឺ VinFast បានប្រកាសថា បើទោះបីជាមានការចែកចាយកាន់តែច្រើនឡើងក៏ដោយ ប៉ុន្តែក្រុមហ៊ុននៅតែខាតបង់ប្រាក់សុទ្ធរហូតដល់ទៅ ៧១២លានដុល្លារនៅក្នុងត្រីមាសទី១នៃឆ្នាំនេះ។ នេះបើយោងតាមការចុះផ្សាយដោយសារព័ត៌មាន CNA។
ប្រភពខាងលើបានបន្តឱ្យដឹងទៀតថា ក្រុមហ៊ុនរថយន្តអគ្គិសនី (EV) របស់វៀតណាមមួយនេះ មានគោលបំណងប្រកួតប្រជែងជាមួយក្រុមហ៊ុនយក្សពិភពលោកដូចជា Tesla ហើយបានព្យាយាមបំបែកខ្លួនចូលទៅក្នុងទីផ្សារអន្តរជាតិរហូតធ្វើឱ្យការចំណាយទៅលើថ្លៃដើមឡើងថ្លៃរួមទាំងការចំណាយលើការលក់ ការគ្រប់គ្រង និងទីផ្សារកាន់តែខ្ពស់ ខណៈដែល VinFast កំពុងតែពង្រីកប្រតិបត្តិការលក់របស់ខ្លួនទូទាំងពិភពលោកផងដែរ។
លោក Thuy Le ដែលជាប្រធានក្រុមហ៊ុន Vinfast បាននិយាយថាកាលពីមុន ការខាតបង់សុទ្ធរបស់ក្រុមហ៊ុនមានជាង ៣ពាន់លានដុល្លារអាមេរិក បើទោះបីជាការចែកចាយរថយន្តរបស់ខ្លួនកើនឡើងជិតបីដងក៏ដោយ ខណៈពាណិជ្ជកម្មសកលត្រូវបានរំខានដោយពន្ធគយដែលបានចាប់ផ្តើមកាលពីខែមេសាដោយប្រធានាធិបតីអាមេរិក Donald Trump ។
លោក Pham Nhat Vuong បានបញ្ជាក់ថា ការលក់រថយន្ត EV សរុបរបស់ក្រុមហ៊ុន VinFast បានកើនឡើង ២.៨ ដងក្នុងឆ្នាំ២០២៤ បើធៀបនឹងឆ្នាំមុន ដោយប្រទេសវៀតណាមមានចំនួនប្រហែល ៩០% ប៉ុន្តែទោះបីជាការលក់កើនឡើងខ្លាំងយ៉ាងណាក៏ដោយ ក៏ក្រុមហ៊ុន VinFast នៅតែខាតបង់ខ្លាំងជាពិសេសគឺនៅទីផ្សារសហរដ្ឋអាមេរិកផងដែរ៕
