បន្ទាប់ពីការចូលកាន់តំណែងរបស់ប្រធានាធិបតីអាមេរិកថ្មី សេតវិមាននាថ្ងៃទី២០ ខែមករា ឆ្នាំ២០២៥ បានប្រកាសថា លោក Donald Trump កំពុងដកសហរដ្ឋអាមេរិកចេញពីអង្គការសុខភាពពិភពលោក ស្របពេលដែលជិតមួយភាគប្រាំនៃថវិការបស់ WHO កាលពីឆ្នាំ២០២៣ បានមកពីសហរដ្ឋអាមេរិក។
ទីភ្នាក់ងារសារព័ត៌មាន USA Today បានចុះផ្សាយថា បទបញ្ជាប្រតិបត្តិរបស់លោក Trump ក្នុងការដកខ្លួនពីស្ថាប័នពិភពលោក WHO ធ្វើឱ្យអ្នកជំនាញផ្នែកសុខភាពបារម្ភថា សហរដ្ឋអាមេរិកនឹងឯកោ ជាមួយនឹងផលវិបាកសម្រាប់ការឆ្លើយតបលើជំងឺរាតត្បាត សុខភាពសាធារណៈ ក៏ដូចជាទំនាក់ទំនងការទូតទូទាំងពិភពលោក។
ប្រភពដដែលបានបញ្ជាក់ថា ជុំវិញមូលហេតុដែលដកប្រទេសចេញនេះ គឺដោយសាររដ្ឋបាលថ្មីយល់ថា ការចាត់ចែងមិនត្រឹមត្រូវ របស់អង្គការសុខភាពពិភពលោក ចំពោះជំងឺរាតត្បាត COVID-19 ដែលបានកើតចេញពីទីក្រុង Wuhan ប្រទេសចិននិងវិបត្តិសុខភាពផ្សេងៗទៀត ដែលជាការខាតបង់ហិរញ្ញវត្ថុ របស់សហរដ្ឋអាមេរិក ដែលបានធ្វើដើម្បីគាំទ្រដល់WHOនាពេលកន្លងមក។
យ៉ាងណាមិញបើតាម អគ្គនាយក WHO លោក Tedros Adhanom Ghebreyesus បានលើកឡើងនៅក្នុងអ៊ីម៉ែលថា WHO នឹងធ្វើអ្វីគ្រប់យ៉ាងដើម្បីសហការជាមួយរដ្ឋបាល Trump ដែលចូលមក ដើម្បីបន្តពង្រឹងសន្តិសុខសុខភាពពិភពលោក។ បន្ថែមពីនោះអ្នកនាំពាក្យរបស់លោក Tedros បានសង្កត់ធ្ងន់ថា ភាពជាដៃគូរវាងអង្គការសុខភាពពិភពលោក និងសហរដ្ឋអាមេរិក បានការពារនិងជួយសង្គ្រោះជីវិតមនុស្សរាប់លាននាក់នៅអាមេរិក និងជុំវិញពិភពលោក។
សូមជម្រាបថាសហរដ្ឋអាមេរិក គឺជាអ្នកផ្តល់មូលនិធិដ៏ធំបំផុតក្នុងប្រវត្តិសាស្ត្ររបស់ WHO ដែលមានទីស្នាក់ការនៅទីក្រុងហ្សឺណែវ ប្រទេសស្វីស WHO គឺជាផ្នែកមួយនៃអង្គការសហប្រជាជាតិ មានភារកិច្ចរៀបចំ និងប្រយុទ្ធប្រឆាំងនឹងភាពអាសន្នផ្នែកសុខភាព។ ចាប់តាំងពីការបង្កើតWHO ក្រោយសង្គ្រាមលោកលើកទី២ សហរដ្ឋអាមេរិកបានជះឥទ្ធិពលយ៉ាងខ្លាំងដល់អង្គការមួយនេះ ចាប់តាំងពីពេលចូលជាសមាជិកនៅឆ្នាំ១៩៤៨៕
