កាលពីថ្មីៗនេះ SDF កំពុងកែសម្រួលធ្វើស្តង់ដានីយកម្មនិងឌីជីថលូបនីយកម្ម, នីតិវិធី, លក្ខខណ្ឌតម្រូវ និងកម្មវិធីពាក់ព័ន្ធ ដើម្បីឱ្យវិស័យឯកជនគ្រប់កម្រិតកាន់តែមានភាពងាយស្រួលក្នុងការទទួលបានការគាំទ្រពី SDF ក្នុងការអភិវឌ្ឍធនធានមនុស្សរបស់ខ្លួនឱ្យត្រូវនឹងតម្រូវការអាជីវកម្ម និងបង្កើនភាពប្រកួតប្រជែង។

ជាក់ស្តែង កាលពីថ្ងៃទី១៥ ខែមករា ឆ្នាំ២០២៥ កន្លងទៅនេះ SDF បានរៀបចំកិច្ចប្រជុំផ្ទៃក្នុងមួយក្នុងគោលបំណងឆ្លើយតបនឹងមតិយោបល់របស់ដៃគូ និងផ្អែកលើការឆ្លុះបញ្ចាំងពីបទពិសោធន៍ការងារដើម្បីត្រួតពិនិត្យ និងវាយតម្លៃលើដំណើរការងារនីតិវិធីលក្ខខណ្ឌតម្រូវ និងកម្មវិធីពាក់ព័ន្ធ ក្នុងគោលដៅកំណត់ចន្លោះប្រហោង និងស្វែងរកដំណោះស្រាយដែលអាចធ្វើឱ្យប្រតិបត្តិការ និងគុណភាពសេវារបស់ SDF កាន់តែមានប្រសិទ្ធភាពនិងឆាប់រហ័ស។

ចំពោះកិច្ចពិភាក្សារយៈពេលមួយថ្ងៃពេញនេះដែរ គឺដឹកនាំដោយលោកនាយកប្រតិបត្តិនិងមានការចូលរួមពីថ្នាក់ដឹកនាំគ្រប់ផ្នែក និងមានមន្រ្តីជំនាញនិងជំនាញការរបស់ដៃគូអភិវឌ្ឍន៍ ព្រមទាំងសម្រេចបាននូវលទ្ធផលសំខាន់ៗ រួមមាន៖

១. បានកាត់បន្ថយ ឬបង្រួមដំណើរការប្រតិបត្តិការ និងលក្ខខណ្ឌតម្រូវនៅពេលរៀបចំសំណើរគម្រោងបណ្តុះបណ្តាល

២. កាត់បន្ថយការងារដោយប្រើក្រដាសងាកមកប្រើប្រាស់ប្រព័ន្ធអនឡាញដែលមានលក្ខណៈស្វ័យប្រវត្តិវិញ

៣. ដាក់ចេញសូចនាករសមិទ្ធកម្មគន្លឹះសម្រាប់ SDF និងទៅតាមផ្នែកជំនាញនីមួយៗ ដើម្បីត្រួតពិនិត្យនិងវាយតម្លៃជាប្រចាំ

គូសបញ្ជាក់ថា ជាទិសដៅទៅមុខ SDF គ្រោងនឹងបញ្ចប់ដូចជា៖

• បញ្ចប់ការកែសម្រួលនេះយ៉ាងយូរត្រឹមខែកុម្ភៈ ឆ្នាំ២០២៥
• ដាក់ឱ្យប្រើប្រាស់ និងផ្សព្វផ្សាយនីតិវិធី, លក្ខខណ្ឌតម្រូវ និងកម្មវិធីដែលបានកែសម្រួលរួចក្នុងខែមីនា
• ធ្វើស្តង់ដានីយកម្ម និងឌីជីថលូបនីយកម្មឱ្យបានចប់សព្វគ្រប់ក្នុងឆ្នាំ២០២៥។

យ៉ាងណាមិញ តាមរយៈការកែលម្អនេះ SDF ជឿជាក់ថារោងចក្រសហគ្រាសគ្រប់កម្រិត (មីក្រូ, តូច, មធ្យម និងធំ) កាន់តែមានភាពងាយស្រួលក្នុងការទទួលបានការគាំទ្រពី SDF ដើម្បីអភិវឌ្ឍជំនាញបុគ្គលិករបស់ខ្លួនឱ្យឆ្លើយតបទាន់ពេលវេលាទៅនឹងតម្រូវការអាជីវកម្ម និងរក្សាបានភាពប្រកួតប្រជែងក្នុងពេលបច្ចុប្បន្ន និងអនាគត។ ចូលរួមជាមួយ SDF ក្នុងការប្រែក្លាយកម្ពុជាទៅជាប្រទេសចំណូលខ្ពស់ក្នុងឆ្នាំ២០៥០ ស្របតាមចក្ខុវិស័យរបស់រាជរដ្ឋាភិបាល។ "ជំនាញខ្ពស់ ចំណូលខ្ពស់" ៕