ឥណ្ឌូនេស៊ី គ្រោងនឹងចេញបទប្បញ្ញត្តិហាមមិនឱ្យក្មេងៗ លេងបណ្តាញសង្គម Tik Tok ,Facebook,Instragram ជាដាច់ខាត ដើម្បីចង់ការពារពលរដ្ឋវ័យក្មេង ដែលស្ថិតក្នុងវ័យមួយងាយរងគ្រោះពីការឆបោកនិងការរំលោភបំពានផ្សេងៗពីបណ្តាញសង្គមទាំងនេះ។ នេះបើយោងតាមការចេញផ្សាយដោយសារព័ត៌មានរ៉យទ័រ។
ប្រភពដដែលបានបន្តឱ្យដឹងទៀតថា ចំពោះច្បាប់ដែលឥណ្ឌូនេស៊ីគ្រោងដាក់នេះដែរ គឺធ្វើតាមប្រទេសអូស្រ្តាលីដែលកាលពីកន្លងទៅអូស្រ្តាលីបានដាក់បម្រាមមិនឱ្យក្មេងក្រោម១៦ឆ្នាំ ចូលប្រើប្រាស់ប្រព័ន្ធផ្សព្វផ្សាយសង្គមទាំងនេះឡើយ ហើយប្រសិនជាក្រុមហ៊ុនទាំងនោះបរាជ័យក្នុងការរារាំងឱ្យកុមារចូលប្រើបណ្តាញសង្គមរបស់ពួកគេនោះអូស្រ្តាលីនឹងធ្វើការផាកពិន័យតែម្តង។
មិនតែប៉ុណ្ណោះ សូម្បីតែប្រធានាធិបតីឥណ្ឌូនេស៊ី Prabowo Subianto ក៏មានការគាំទ្រខ្លាំង ចំពោះច្បាប់ដែលគ្រោងនឹងបង្កើតនេះឡើងដែរ ព្រោះច្បាប់នេះល្អបំផុតសម្រាប់ការពារកុមារពីបណ្តាញសង្គមទាំងប៉ុន្មាននេះផងដែរ។
គួរបញ្ជាក់ថា ការស្ទង់មតិបានបង្ហាញថា កុមារដែលមានអាយុក្រោម ១២ឆ្នាំ គឺបានលេង Facebook, Instagram និង TikTok រហូតដល់ទៅ ៤៨% នៅក្នុងនោះ ក្នុងចំណោមពលរដ្ឋដែលមានអាយុ១២ ឆ្នាំរហូតដល់ ២៧ឆ្នាំ គឺបានលេងបណ្តាញសង្គមទាំងប៉ុន្មាននេះរហូតដល់ ៨៧% ៕
