មេធំរបស់ក្រុមហ៊ុន Meta លោក Mark Zuckerberg បានបញ្ជាក់ថា Facebook, Instagram និង WhatsApp កំពុងរៀបចំកាត់បន្ថយប្រហែល៥% នៃកម្លាំងពលកម្មទូទាំងពិភពលោក ដែលស្មើនឹងបុគ្គលិកជាង៣ពាន់នាក់ ខណៈក្រុមហ៊ុននឹងសម្លឹងមើលបញ្ឈប់អ្នកធ្វើការខ្សោយ។
ក្នុងនោះបណ្តាញក្រុមហ៊ុនរបស់ Meta ដែលមានបុគ្គលិកប្រហែល ៧ម៉ឺន២ពាន់នាក់ នៅទូទាំងពិភពលោក គឺគេមិនទាន់ដឹងអំពីកាលបរិចេ្ឆទនិងរបៀបដែលមេធំរូបនេះគ្រោងកាត់បន្ថយនោះទេ។ ប៉ុន្តែសម្រាប់បុគ្គលិកនៅអាមេរិកនឹងទទួលដំណឹង នៅត្រឹមថ្ងៃទី១០ ខែកុម្ភៈ ឆ្នាំ២០២៥ ថានរណាត្រូវទៅ នរណាត្រូវនៅ។
យោងតាមសារព័ត៌មាន BBC ចុះផ្សាយថ្ងៃទី១៥ ខែមករាឆ្នាំ២០២៥នេះ លោក Mark Zuckerberg បាននិយាយថា៖ “២០២៥នេះគឺជាឆ្នាំដ៏ខ្លាំងក្លាមួយ ហើយខ្ញុំចង់ធ្វើឱ្យប្រាកដថា យើងមានមនុស្សល្អបំផុតនៅក្នុងក្រុមហ៊ុន ដូច្នេះខ្ញុំបានសម្រេចចិត្តបង្កើនលើការគ្រប់គ្រងនិងផ្លាស់ប្តូរអ្នកធ្វើការខ្សោយៗឱ្យមានល្បឿនជាងមុន”។
យ៉ាងណាមិញការកាត់បន្ថយការងារ ដោយផ្អែកលើការអនុវត្តនិងល្បឿនការងារ គឺជារឿងធម្មតានៅក្នុងក្រុមហ៊ុនអាមេរិក។ ក្នុងនោះMark Zuckerberg បាននិយាយថាមនុស្សប្រហែល ៣៦០០នាក់អាចរងផលប៉ះពាល់ពីការផ្លាស់ប្តូរនេះ ប៉ុន្តែបុគ្គលិកនឹងទទួលបានការបញ្ឈប់ការងារដោយភាពសប្បុរស។
សូមជម្រាបថាការកាត់បុគ្គលិកដ៏ធំបំផុតរបស់ Meta គឺធ្វើឡើងកាលពីឆ្នាំ២០២៣ ដោយកាលណោះ មានតំណែងប្រហែល១ម៉ឺនត្រូវបានផាត់ចោល ហើយបន្ទាប់ពីព្រឹត្តិការណ៍នោះលោក Mark Zuckerberg បានប្រកាសថាវាគឺជាឆ្នាំដ៏មានប្រសិទ្ធភាពនៃក្រុមហ៊ុន៕
អត្ថបទដោយ៖ ពីង ជូអេង
