គិតត្រឹមថ្ងៃដំបូងនៃការបញ្ជាទិញរថយន្តអគ្គិសនី Toyota bZ3 ក្រុមហ៊ុនបានទទួលការកម្មង់រហូតដល់ទៅ ៥០០០គ្រឿងក្នុងប្រទេសចិន ខណៈដែលរថយន្តមួយនេះសាកថ្មម្តង អាចជិះបានជាង ៦០០គីឡូជាមួយតម្លៃត្រឹមតែខ្ទង់២ម៉ឺុនប៉ុណ្ណោះក្នុងមួយគ្រឿង។ នេះបើយោងតាមការចុះផ្សាយរបស់សារព័ត៌មាន Car News China កាលពីពេលថ្មីៗនេះ។
Toyota bZ3 ត្រូវបានបង្កើតឡើងដោយក្រុមហ៊ុនបណ្តាក់ទុនរួមគ្នា FAW-Toyota ដែលជាម៉ូដែលទីពីររបស់ Toyota ក្នុងស៊េរី bZ ហើយក៏ជារថយន្តអគ្គិសនីដំបូងបង្អស់របស់ខ្លួនផងដែរ។ ជាមួយគ្នានេះដែរម៉ូឌែលមួយនេះមានបំពាក់នូវបច្ចេកវិទ្យាថាមពលសំខាន់ៗពី BYD រួមទាំងអាគុយ Blade LFP និងម៉ូទ័រអេឡិចត្រិចពីក្រុមហ៊ុន Fudi Motor ដែលជាក្រុមហ៊ុនបុត្រសម្ព័ន្ធរបស់ BYD ផ្ទាល់តែម្តង។
ទន្ទឹមនឹងនេះដែរ ទាក់ទងទៅនឹងតម្លៃវិញរថយន្តម៉ូដែលនេះមានតម្លៃចាប់ផ្តើមពី ២៤,៧០០ ដុល្លារ ខណៈម៉ូដែលជួរកំពូលចាប់ផ្តើមពី ២៩,០០០ ដុល្លារ ដោយសាកថ្មម្តងអាចជិះបានពី ៥១៧ គីឡូម៉ែត្រទៅ ៦១៦គីឡូម៉ែត្រ។ នេះបើតាមការគណនានៅលើវដ្តសាកល្បង CLTC កន្លងមក។ លើសពីនេះម៉ូដែលមូលដ្ឋានមានម៉ូទ័រខាងមុខមានកម្លាំង ១៣០ គីឡូវ៉ាត់ (១៧៤ សេះ) ខណៈពេលដែលប្រភេទ Long Range មានម៉ូទ័រខាងមុខដែលមានកម្លាំង 180 kW (241 hp) និងកម្លាំងបង្វិល ២២៣ ផោនហ្វីត (៣០៣ ញូតុនម៉ែត្រ) ។
សូមជម្រាបផងដែរថា Toyota bZ3 ត្រូវបានផលិតនៅរោងចក្រ FAW-Toyota ក្នុងទីក្រុង Tianjin ប្រទេសចិន ខណៈរោងចក្រនេះមានសមត្ថភាពផលិតរថយន្តរហូតដល់ទៅ ២០០,០០០ ក្នុងរយៈពពេលមួយឆ្នាំ៕