ពិតជារំភើបខ្លាំងមែនទែន សម្រាប់ប្រជាជនកម្ពុជាជាពិសេសនោះសម្រាប់បងប្អូនដែលបានកំពុងតែរស់នៅក្នុងខេត្តបាត់ដំបង ព្រោះនាពេលនេះខេត្តបាត់ដំបងកំពុងតែទទួលបានការចាប់អារម្មណ៍នៅការវិនិយោគដំណាំកសិកម្មពីប្រទេសធំៗ ២នេះផងដែរ។

ថ្មីៗនេះ ឯកឧត្តម សុខ លូ បានជួបជាមួយក្រុមហ៊ុន Agribusiness Asia Group  ដើម្បីពិភាក្សាការងារអំពីការវិនិយោគក្នុងខេត្តបាត់ដំបង ក្រុមហ៊ុនក៏បានបង្ហើបពីគោលបំណងពី ការបណ្ដាក់ទុនវិនិយោគក្នុងខេត្ត ពាក់ព័ន្ធទៅនឹងដំណាំពោតក្នុងខេត្តបាត់ដំបងផងដែរ ។

ក្រុមហ៊ុន Agribusiness Asia Group គឺជាក្រុមហ៊ុនដែលកំពុងមានប្រតិបត្តិការនៅប្រទេសអូស្រ្ដាលី និងព្រះរាជាណាចក្រថៃ ហើយក៏ជាក្រុមហ៊ុនដែលប្រើប្រាស់នូវបច្ចេកវិទ្យាពាក់ព័ន្ធនឹងផ្នែកផ្កាយរណប ដែលបច្ចេកទេសនេះអាចជួយឱ្យការដាំដុះទទួលផល៣ដងក្នុងមួយឆ្នាំ ។

ជាមួយគ្នានោះដែរ យោងតាមការចុះផ្សាយរបស់ក្រសួងព័ត៌មានកាលពីកន្លងទៅនេះបានឱ្យដឹងថា ឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកមជ្ឈមណ្ឌលសកម្មភាពកំចាត់មីនកម្ពុជា ហៅកាត់ថា ស៊ីម៉ាក់ និងលោក Nishida Seibaku ជាប្រធាន និងនាយកប្រតិបត្តិនៃក្រុមហ៊ុន Nishida Baley Processing Co., Ltd មានមូលដ្ឋាននៅប្រទេសជប៉ុន បានជួបពិភាក្សាគ្នាទៅលើការដាំដុះស្រូវសាលីនៅប្រទេសកម្ពុជាមសម្រាប់ជាទីផ្សារនាំចេញទៅក្រៅប្រទេស។

ដោយក្នុងជំនួបពិភាក្សានេះ ឯកឧត្ដម ហេង រតនា មានប្រសាសន៍ថា ផ្តោតទៅលើកិច្ចសហការនៃសង្វាក់ផលិតកម្ម ក្នុងការផលិតស្រូវសាលីដែលនឹងត្រូវកែច្នៃដោយក្រុមហ៊ុនអ្នកជំនាញជប៉ុន Nishida Baley Processing Co., Ltd ដើម្បីផលិតជាផលិតផលសម្រេចក្នុងការនាំចេញ។

ឯកឧត្ដមបន្ថែមថា ផែនការនៃការដាំដុះស្រូវសាលីនេះគ្រោងនឹងយកទៅអនុវត្តដាំដុះនៅមណ្ឌលអភិវឌ្ឍន៍មរតកតេជោ (CDC) ដែលក្រុមអ្នកបច្ចេកទេសជប៉ុនបានចុះទៅពិនិត្យ និងសិក្សាពីភូមិសាស្រ្ត ដើម្បីវាយតម្លៃពីសក្តានុពលនៃមណ្ឌលមុននឹងឈានទៅដល់ការអនុវត្តន៍គម្រោងនេះ។

សូមបញ្ជាក់ថា បច្ចុប្បន្នអ្នកផ្គត់ផ្គង់ស្រូវសាលីនៅតំបន់អាស៊ីនេះ គឺនៅប្រទេសមីយ៉ាន់ម៉ា ដែលជាកន្លែងមានបទពិសោធន៍ និងចំណេះដឹង ដើម្បីសាងសង់ខ្សែសង្វាក់ដំណើរកសិកម្ម នៅក្នុងប្រទេសនៃគម្រោងក្នុងការអភិវឌ្ឍអាជីវកម្ម ហេតុនេះប្រទេសកម្ពុជាត្រូវពឹងផ្អែកលើបទពិសោធន៍ និងចំណេះដឹងនៃប្រទេសមីយ៉ាន់ម៉ាផងដែរ៕

អត្ថបទ៖ ធី ស្រីល័ក្ខ