ស៊ីហ្គេមនៅកម្ពុជាចប់ភ្លាម ថៃបានត្រៀមទីតាំង និងរៀបចំថវិការួចជាស្រេច សម្រាប់ត្រៀមខ្លួនធ្វើជាម្ចាស់ផ្ទះព្រឹត្តិការណ៍ស៊ីហ្គេម លើកទី៣៣ និងអាស៊ានប៉ារ៉ាហ្គេមក្នុងឆ្នាំ២០២៥ លើទឹកដីរបស់ខ្លួន។
អ្នកនាំពាក្យរដ្ឋាភិបាលថៃលោកស្រី Traisuree Taisaranakul បានឱ្យដឹងយ៉ាងដូច្នេះថា៖ «គណៈរដ្ឋមន្ត្រីថៃបានយល់ព្រមចំណាយប្រាក់ចំនួន ២,០៥ ពាន់លានបាត (ប្រមាណជាង ៦០លានដុល្លារ) ដើម្បីធ្វើជាម្ចាស់ផ្ទះព្រឹត្តិការណ៍កីឡាក្នុងតំបន់»។ នេះបើយោងតាមការចុះផ្សាយរបស់សារព័ត៌មានថៃ Pattaya Mail។
ក្នុងនោះលោកស្រី Traisuree បានបញ្ជាក់ថា ថវិកានេះនឹងត្រូវបានផ្តល់ចេញពីមូលនិធិរដ្ឋសរុបចំនួន ១.៦៨ពាន់លានបាត (ជិត ៥០លាន$), សិទ្ធទទួលបានការប្រកួត ២០០លានបាត (ជិត ៦លាន$)， សំបុត្ររបស់អ្នកទស្សនា ២០លានបាត (ជិត ៦០ម៉ឺន$), ថ្លៃចុះឈ្មោះអត្តពលិក និងក្រុមការងារនៅក្នុងស៊ីហ្គេម ១៣៤លានបាត (ជិត ៤លាន$) និង ថ្លៃចុះឈ្មោះអត្តពលិក និងក្រុមការងារនៅក្នុងអាស៊ានប៉ារ៉ាហ្គេម ១៦លានបាត (ជិត ៤៧ម៉ឺន$)។
យ៉ាងណាមិញ ក្នុងនាមជាម្ចាស់ផ្ទះ គណៈរដ្ឋមន្ត្រីថៃ បានជ្រើសរើសទីតាំងធំៗ៣កន្លែង សម្រាប់ប្រារព្ធព្រឹត្តិការណ៍ស៊ីហ្គេម លើកទី៣៣ ក្នុងឆ្នាំ២០២៥ខាងមុខគឺ ទីក្រុងបាងកក ឈុនបុរី និងសុងក្លា។ ចំពោះមូលហេតុដែលប្រទេសថៃជ្រើសរើសទីតាំងទាំងនេះ ជាកន្លែងប្រកួតព្រោះផ្អែកលើលក្ខណៈវិនិច្ឆ័យដូចជា កីឡដ្ឋាន កន្លែងស្នាក់នៅ អាហារ មន្ទីរពេទ្យ ការដឹកជញ្ជូន ទីផ្សារ បុគ្គលិក សេវាសាធារណៈ បច្ចេកវិទ្យាព័ត៌មាន ថវិកា និងការចូលរួមពីសាធារណជន។ នេះបើតាមការឲ្យដឹងរបស់លោកស្រី Traisuree Taisaranakul ចុះផ្សាយដោយសារព័ត៌មាន NATION THAILAND នាថ្ងៃទី១៧ ខែឧសភា ឆ្នាំ២០២៣៕
អត្ថបទដោយ៖ កាន់ ដារ៉ា (ស្មេរពនេចរ)
