យោងតាមការចុះផ្សាយពីកាសែត Nation Thailand កាលពីថ្ងៃទី០៥ ខែធ្នូ ឆ្នាំ២០២៣នេះ បានឱ្យដឹងថាប្រទេសថៃនឹងស្នើបញ្ចូលពិធីបុណ្យសង្គ្រាន្ក ជាបេតិកភណ្ឌវប្បធម៌អរូបី នៅអង្គការយូណេស្កូ នៅថ្ងៃទី០៦ ខែធ្នូនេះនាទីក្រុង Kasane ប្រទេស Botswana វេលាម៉ោង៥ល្ងាច ត្រូវនឹងម៉ោង២: ៤៥នាទីរសៀលនារាជធានីបាងកក។
ប្រភពដដែលបានឱ្យដឹងថាអ្នកស្រី Penpisut Jintasophon អ្នកនាំពាក្យក្រសួង បានមានប្រសាសន៍ថា រដ្ឋមន្ត្រីក្រសួងវប្បធម៌លោក Sermsak Pongpanit កំពុងអញ្ជើញមនុស្សឱ្យចូលរួមក្នុងការប្រារព្ធពិធីនៅទីលាន Lan Khon Muang ទល់មុខសាលាក្រុងបាងកកដើម្បីឱ្យ ប្រជាជនថៃទាំងអស់ចូលរួមក្នុងការប្រារព្ធពិធីបុណ្យអបអរ នឹងទន្ទឹងរង់ចាំការប្រកាសរបស់អង្គការយូណេស្កូជាផ្លូវការនៅថ្ងៃព្រហស្បតិ៍ស្អែកនេះបន្ទាប់ពី ក្រសួងវប្បធម៌បានស្នើសុំ "ថ្ងៃបុណ្យចូលឆ្នាំប្រពៃណីថៃ" ទៅអង្គការ UNESCO ដើម្បីទទួលស្គាល់ ICH ( បេតិភណ្ឌវប្បធម៌អរូបី)។
នៅក្នុងការអបអរនេះដែរនាយករដ្ឋមន្រ្តី ស្រេថាថាវីស៊ីន នឹងអញ្ជើញជាអធិបតីក្នុងពិធីដើម្បីធ្វើពិធីច្រូចទឹកព្រះពុទ្ធរូបដែលគេតែងធ្វើឡើងជារៀងរាល់ឆ្នាំក្នុងពិធីបុណ្យចូលឆ្នាំនាខែមេសា និងទស្សនាការប្រគំតន្រ្តីបុរាណរបស់ថៃផងដែរ។
បន្ថែមពីនោះអ្នកដឹកនាំគណបក្សភឿថៃលោក Paetongtarn Shinawatra ដែលជាប្រធានគណៈកម្មាធិការថាមពលជាតិទន់ភ្លន់ (Soft Power)បានប្រកាសពីការប្រារព្ធពិធីបុណ្យ Songkran (សង្គ្រាន្ក) មួយខែពេញក្នុងខែមេសានាឆ្នាំក្រោយ ក្នុងគោលបំណងលើកកំពស់ព្រឹត្តិការណ៍នេះជាអំណាចទន់របស់ប្រទេសថៃ។
គួរជម្រាបផងដែរថាការស្នើសុំនេះប្រសិនបើត្រូវបានប្រកាសជាផ្លូវការនោះពិធីបុណ្យ Songkran (សង្រ្កាន្ត) នឹងក្លាយជាប្រពៃណីថៃទី៤ ដែលទទួលបានការទទួលស្គាល់ពីអង្គការយូណេស្កូថាជាបេតិកភណ្ឌវប្បធម៌អរូបី ដែលក្នុងនោះ៣ផ្សេងទៀតគឺសិល្បៈសម្ដែង Khon ម៉ាស្សាថៃ និង Nora dancing៕
អត្ថបទដោយ៖ ពីង ជូអេង
