បន្ទាប់ពីប្រកាសការក្ស័យធនតាំងពីឆ្នាំ ២០២០ ពេលនេះក្រុមហ៊ុនអាកាសចរណ៍ Thai Airways កំពុងងើបឡើងវិញ ក្រោយសម្រេចជោគជ័យលើការលក់យន្តហោះ ១១ គ្រឿងដំបូងរបស់ខ្លួន ក្នុងចំណោមយន្តហោះដាក់លក់សរុប ៣៧ គ្រឿង។
បើតាមការចេញផ្សាយរបស់សារព័ត៌មាន Thaiger បានឱ្យដឹងការពីថ្ងៃទី ២៩ ខែ មិថុនា ឆ្នាំ ២០២២ នេះថា លោក Chansin Treenuchagron ប្រធានស្តីទីក្រុមហ៊ុនអាកាសចរណ៍បាននិយាយថា រដ្ឋមន្ត្រីដឹកជញ្ជូនរបស់ប្រទេសថៃបានអនុញ្ញាតឱ្យក្រុមហ៊ុន Thai Airways លក់យន្តហោះ Boeing 737-400 ចាស់ចំនួន ១ គ្រឿង និងយន្តហោះ Boeing 747-400 'Jumbo' ចំនួន ១០ គ្រឿង។
សូមជម្រាបថា ក្រុមអាកាសចរណ៍ Thai Airway បានដាក់ពាក្យស្នើសុំលក់យន្តហោះចំនួន ១១គ្រឿងនេះ តាំងពីឆ្នាំ២០២១ មកម្ល៉េះ ប៉ុន្តែមិនអាចលក់បាន ឬ ផ្ទេរតាមអាជ្ញាប័ណ្ណប្រតិបត្តិការអាកាសចរណ៍ស៊ីវិលរបស់ខ្លួនបាន ដោយសារមិនទាន់មានការអនុញ្ញាតពីរដ្ឋមន្ត្រីទទួលបន្ទុក។
គួរបញ្ជាក់ផងដែរថា ក្រុមហ៊ុនអាកាសចរណ៍ជាតិថៃមួយនេះបានព្យាយាមងើបឡើងវិញចាប់តាំងពីការដាក់ពាក្យសុំក្ស័យធនក្នុងខែឧសភា ឆ្នាំ ២០២០ ដោយកាត់បន្ថយការចំណាយ កំណែទម្រង់ស្ថាប័ន កាត់បន្ថយបុគ្គលិក និងអ្នកគ្រប់គ្រងជាន់ខ្ពស់ និងលក់ទ្រព្យសម្បត្តិបន្ទាប់បន្សំដែលមិនចាំបាច់ រួមទាំងអ្នកបើក យន្តហោះចាស់ៗមួយចំនួន លើសពីនេះទៅទៀតក្រុមហ៊ុនក៏បាន លក់ដី អគារ និងភាគហ៊ុនក្នុងក្រុមហ៊ុន Bangkok Aviation Fuel និង Nok Air ផងដែរ។
រំលឹកថា ចាប់តាំងពីខែវិច្ឆិកា ឆ្នាំ ២០២០ ក្រុមហ៊ុនអាកាសចរណ៍ Thai Airway បានដាក់លក់យន្តហោះចំនួន ៣៧ គ្រឿងទាំងនោះរួមមាន Boeing 747-400 ចំនួន ១០ គ្រឿង យន្តហោះ Boeing 777-200 ចំនួន ៦ គ្រឿង និង Boeing 777-300 ចំនួន ៦ គ្រឿង យន្តហោះ Airbus A340-600 ចំនួន ៦ គ្រឿង យន្តហោះ A340-500 ចំនួន ៣ គ្រឿង យន្តហោះ Boeing 737-400 ចំនួន ២ គ្រឿង យន្តហោះ Airbus A330-300 ចំនួន ៣ គ្រឿង និងយន្តហោះ Airbus A300-600៕
អត្ថបទដោយ៖ ឌឿក ស្រី នុច រតនៈ
