ខ្សែភាពយន្តដ៏ល្បីល្បាញរបស់កូរ៉េខាងត្បូង រឿង Squid Games ទើបតែចេញវគ្គទី២ ផ្ទុះការគាំទ្រពីអ្នកតាមដានមិនទាន់បានប៉ុន្មានផង ពេលនេះក៏លេចធ្លាយព័ត៌មាន លើថ្ងៃខែឆ្នាំ ដែលចេញផ្សាយវគ្គទី៣។

នៅក្នុងវីដេអូផ្សព្វផ្សាយមួយរបស់ Netflix Korea បានឱ្យដឹងថា "Squid Games" រដូវកាលទី៣ គ្រោងនឹងចាក់បញ្ចាំងនៅថ្ងៃទី២៧ ខែមិថុនា ឆ្នាំ២០២៥។

យ៉ាងណាមិញប៉ុន្មាននាទីក្រោយវីដេអូនោះក៏ត្រូវបានកែសម្រួលវិញដោយ Netflixហើយក៏មិនបានបន្តបញ្ជាក់ជាផ្លូវការអំពីកាលបរិច្ឆេទនៃការចេញផ្សាយមួយរយភាគរយនោះដែរ។

ប៉ុន្តែបើតាមអ្នកដឹកនាំរឿងលោក Hwang Dong-hyuk បានបញ្ជាក់ថាចំពោះ​រដូវកាលទី៣ គឺគ្រោងនឹងចាប់ផ្តើមធ្វើនៅរដូវក្ដៅ ឬរដូវស្លឹកឈើជ្រុះ ឆ្នាំ២០២៥ និងមានគោលបំណងកាត់បន្ថយការរង់ចាំចេញផ្សាយរបស់ទស្សនិកជនផង  លោកនឹងព្យាយាមឱ្យមានការបញ្ចាំងលើកដំបូងសម្រាប់វគ្គ៣ នៅពាក់កណ្តាលឆ្នាំ ២០២៥នេះ។ 

ក្នុងនោះអ្នកដឹកនាំក៏បានបង្ហាញអំពីការសន្យារបស់គាត់ក្នុងការបញ្ចប់រឿងភាគនៅរដូវកាលទី៣  ជាមួយនឹងសាច់រឿងដ៏ ជាក់លាក់និងគួរឱ្យរំភើប។

សូមជម្រាបផងដែរថាខ្សែភាពយន្តដែលមានអ្នកគាំទ្រច្រើននៅទូទាំងសកលលោកដែលមានចំណងជើងថា Squid Games នេះត្រូវបានចេញផ្សាយវគ្គ២ជាផ្លូវការ កាលពីថ្ងៃទី២៦ ខែធ្នូ ឆ្នាំ២០២៤ ខណៈវគ្គ១ទទួលបានជោគជ័យនិងមានការគាំទ្រខ្លាំង រហូតអាចរកចំណូលបានជាង៩០០លានដុល្លារ បំបែកកំណត់ត្រាពិភពលោក៕

អត្ថបទដោយ៖ ពីង ជូអេង