ក្រៅពីជាទឹកដីវ័យចំណាស់ដ៏វិសុទ្ធតាំងពីបុរាណកាលសម័យ និងសម្បូរទៅដោយសម្បត្តិរតនៈពុំអាចកាត់ថ្លៃបាន កាលពីពេលថ្មីៗនេះ ប្រាសាទអង្គរវត្តរបស់ប្រទេសកម្ពុជាត្រូវបានជាប់ចំណាត់ថ្នាក់លេខ១ ជាកន្លែងមើលថ្ងៃរះ និងថ្ងៃលិចដ៏ល្អបំផុតនៅលើពិភពលោក។
យោងតាមការដកស្រង់ទិន្នន័យដោយគេហទំព័រ Mornings.co.uk ទៅលើការស្វែងរកពាក្យ «Sunrise ឬ ព្រះអាទិត្យរះ» នៅក្នុង៧២ប្រទេស ជុំវិញពិភពលោក។ កន្លែងដែលមានតួរលេខអ្នកណែនាំខ្ពស់បំផុតគឺប្រសាទអង្គរវត្ត ស្ថិតលើដែនដីសុវណ្ណភូមិកម្ពុជទេស ក្នុងចំនួនអ្នកណែនាំ ១០,៤០៤ (Mentions) ខណៈប្រទេសក្បែរខាងមាន ប្រទេសវៀតណាម ឈរលើលេខរៀងទី១២ ក្នុងចំនួន៣៤៨(Mentions), ឡាវ ឈរលើលេខរៀងទី២១ ក្នុងចំនួន២២២(Mentions) និង ថៃ ឈរលើលេខរៀងទី២៦ ក្នុងចំនួន១៩០(Mentions)។
មិនតែប៉ុណ្ណោះ បាតុភូតព្រះអាទិត្យរះចំកណ្តាលកំពូលប្រាសាទអង្គរវត្ត (EQUINOX) កើតឡើងជារៀងរាល់ឆ្នាំចំនួន២លើក នៅខែមីនាម្ដង និងខែកញ្ញាម្ដងទៀត។ ព្រឹត្តិការណ៍ដ៏អស្ចារ្យនេះស្តែងឲ្យឃើញពីអច្ឆរិយភាពនៃប្រាសាទអង្គរវត្ត ដែលបុព្វបុរសខ្មែរបានកសាងឡើងដោយមានការគិតគូរអំពីស្ថាបត្យកម្ម និងការផ្សារភ្ជាប់ជាមួយនឹងធម្មជាតិរវាងផែនដី និងព្រះអាទិត្យយ៉ាងច្បាស់លាស់គួរស្ញប់ស្ញែងជាទីបំផុត។
យ៉ាងណាមិញ ក្នុងឆ្នាំ២០២៣ បាតុភូតព្រះអាទិត្យរះចំកណ្តាលកំពូលប្រាសាទអង្គរវត្ត បានកើតឡើងនៅចន្លោះថ្ងៃទី២០ដល់ថ្ងៃទី២៣ ខែមីនា ចាប់ពីម៉ោង៥:៣០នាទីព្រឹក ដល់ម៉ោង៧:០០នាទីព្រឹក ដែលជារៀងរាល់ឆ្នាំតែងមានភ្ញៀវទេសចរជាតិ-អន្តរជាតិរាប់ម៉ឺននាក់បានចូលរួមទស្សនា និងផ្តិតយករូបភាពព្រឹត្តិការណ៍ដ៏អស្ចារ្យនេះ៕
អត្ថបទដោយ៖ កាន់ ដារ៉ា (ស្មេរពនេចរ) ម្ចាស់ស្នាដៃសៀវភៅ «ច្រវាក់ប្រាក់ខែ»
ចែករំលែកគំនិត ឬផ្សព្វផ្សាយអាជីវកម្មអ្នកទីនេះ សូមទំនាក់ទំនង ០៩៦ ៤៩៩ ៧៣ ៦៦
