ក្រុមហ៊ុនធំៗរបស់សហរដ្ឋអាមេរិកចំនួន ២ បានបង្ហាញអំពីគម្រោងនៃការវិនិយោគរបស់ខ្លួននៅក្នុងប្រទេសកម្ពុជា។ ដោយក្នុងនោះរួមមាន៖ ក្រុមហ៊ុន ExxonMobil ដែលជាក្រុមហ៊ុនផ្គត់ផ្គង់ប្រេង និងឧស្ម័នដ៏ធំមួយនៅលើពិភពលោក និងក្រុមហ៊ុន RMA Cambodia ដែលជាក្រុមហ៊ុននាំចូល និងចែកចាយរថយន្ដល្បីៗនៅក្នុងប្រទេសកម្ពុជា។

១. ក្រុមហ៊ុន ExxonMobil

តាមការបញ្ជាក់ពីឯកឧត្ដម កែ រតនៈ រដ្ឋមន្ដ្រីក្រសួងរ៉ែ និងថាមពល បានឲ្យដឹងថា ក្រុមហ៊ុនប្រេងធំ ExxonMobil របស់អាមេរិកមានផែនការសហការជាមួយកម្ពុជាលើការផ្គត់ផ្គង់ប្រេងនិងឧស្ម័នគ្រប់ប្រភេទ។ ការបញ្ជាក់របស់ឯកឧត្ដមត្រូវបានធ្វើឡើងនៅក្នុងជួបពិភាក្សាការងារជាមួយ លោក Casey Barnett ​ប្រធានសភាពាណិជ្ជកម្មអាមេរិកប្រចាំ​កម្ពុជា និងតំណាងក្រុមហ៊ុនប្រេង ExxonMobil នៅថ្ងៃទី២៨ ខែសីហា ឆ្នាំ២០២៥។​

គួរបញ្ជាក់ដែរថា ក្រុមហ៊ុន ExxonMobil គឺជាក្រុមហ៊ុនប្រេងធំជាងគេនៅលើពិភពលោក ដែលមានទីស្នាក់ការនៅអាមេរិក ត្រូវបានបង្កើតឡើងក្នុងឆ្នាំ ១៨៦៦។

បើតាមការបង្ហោះនៅលើបណ្ដាញសង្គមរបស់អ្នកឧកញ៉ា ទៀ វិចិត្រ អគ្គនាយកក្រុមហ៊ុន ជីធីវីសុី គ្រុប នៅថ្ងៃទី២៨ ខែសីហា នេះ បានឲ្យឃើញថា អ្នកឧកញ៉ា និងលោក ទៀ ស្យាម ដែលជាថ្នាក់ដឹកនាំក្រុមហ៊ុនប្រេងខ្មែរ PEACE Petroleum Cambodia ក៏បានជួបជាមួយនឹងតំណាងក្រុមហ៊ុនប្រេងអាមេរិក ExxonMobil នេះផងដែរ។ ហើយបើតាមការបញ្ជាក់ពីខាង PEACE Petroleum Cambodia កាលពីពេលថ្មីៗបានឲ្យដឹងថា ក្រុមហ៊ុនខ្មែរមួយនេះ បាននិងកំពុងចរចាលើកិច្ចព្រមព្រៀងនាំចូលប្រេងឥន្ធនៈជាមួយក្រុមហ៊ុនថាមពលដ៏ធំពីសហរដ្ឋអាមេរិក។ ខណៈក្រុមហ៊ុនបានបង្ហាញការប្ដេជ្ញាចិត្ដក្នុងការនាំយកប្រេងឥន្ធនៈដែលមានគុណភាពខ្ពស់ និងស្តង់ដារអន្តរជាតិ ដើម្បីបម្រើដល់អតិថិជនទាំងអស់ផងដែរ។ ព័ត៌លម្អិតទាក់ទងក្រុមហ៊ុនប្រេងខ្មែរមួយនេះ សូមតាមដានហ្វេសប៊ុកផេក PEACE Petroleum Cambodia។ 

២. ក្រុមហ៊ុន RMA Cambodia

កាលពីពេលថ្មីៗកន្លងទៅនេះ ក្រុមហ៊ុន RMA Cambodia ក៏បានបង្ហាញពីគម្រោងនៃការបង្កើតរោងចក្រដំឡើងត្រាក់ទ័រម៉ាក ចនឌារ (John Deere) នៅក្នុងប្រទេសកម្ពុជាផងដែរ ខណៈដែលបច្ចុប្បន្នក្រុមហ៊ុនកំពុងធ្វើការសិក្សា។ តាមការបញ្ជាក់របស់លោក ងន សាំង ដែលជាអគ្គនាយកក្រុមហ៊ុនបានថ្លែងនៅក្នុងសន្និសីទសារព័ត៍មានកាលពីថ្ងៃទី២២ ខែសីហា ឆ្នាំ២០២៥ ថា «...វិស័យកសិកម្មគឺយើងជាអ្នកតំណាងចែកចាយត្រាក់ទ័រម៉ាក ចនឌារ (John Deere) របស់អាមេរិកនៅកម្ពុជានេះ។ ហើយខាងយើងខ្ញុំកំពុងតែសិក្សាផងដែរនូវលទ្ធភាព ដើម្បីដំឡើងរោងចក្រនៅកម្ពុជាផងដែរសម្រាប់ត្រាក់ទ័រម៉ាកចនឌានេះ យើងកំពុងតែសិក្សាយើងគិតថា នឹងអាចកើតមាននៅពេលឆាប់ៗខាងមុខនេះផងដែរ»។

បច្ចុប្បន្នត្រាក់ទ័រម៉ាក John Deere ដែលកំពុងនាំចូលយកមកដាក់លក់នៅលើទីផ្សារកម្ពុជាបច្ចុប្បន្នមានប្រភេទកម្លាំងចាប់ពី ២៨ សេះ រហូតដល់ ៤១០ សេះ ដើម្បីបំពេញតម្រូវការគ្រប់ប្រភេទ ទាំងការងារកសិកម្មខ្នាតតូច មធ្យម និងកសិឧស្សាហកម្ម។ នេះបើតាមការបញ្ជាក់ពីខាងក្រុមហ៊ុនមកកាន់ Business Cambodia។ សម្រាប់អ្នកចង់ទិញត្រាក់ទ័រម៉ាក John Deere អាចធ្វើការទាក់ទងទៅខាងក្រុមហ៊ុនតាមរយៈលេខ 1800 20 8086 ឬហ្វេសប៊ុកផេក ត្រាក់ទ័រ ចនឌារ - RMA Cambodia Plc.៕