នេះជាដំណឹងល្អមួយ ខណៈក្រុមហ៊ុន យ៉ុងអានលី ខូអបភើរេសិន បានចុះអនុស្សរណៈនៃការយោគយល់គ្នាជាមួយរដ្ឋបាលខេត្តស្ទឹងត្រែង ដើម្បីដាក់ទុនវិនិយោគលើដំណាំកសិកម្មនិងចិញ្ចឹមសត្វ នៅភូមិសាស្រ្តខេត្តស្ទឹងត្រែងនាពេលខាងមុខ។

ជាក់ស្តែង កាលពីកន្លងទៅនេះ ប្រតិភូនៃក្រុមហ៊ុនយ៉ុងអានលី ខូអបភើរេសិន ដឹកនាំដោយលោក ទុំ នីរ៉ូ ប្រធានមន្ទីរកសិកម្ម រុក្ខាប្រមាញ់ និងនេសាទស បានអញ្ជើញទៅដល់ ឃុំសាមឃួយ ស្រុកសេសាន ដើម្បីពិនិត្យលើស្ថានភាពដីស្រែមួយកន្លែង និងបានទៅដល់ ដីចំការមួយកន្លែងទៀត នៅចំនុចគីឡូ៨ ភូមិរាជានុកូល សង្កាត់ស្ទឹងត្រែង ពិនិត្យលើដីចំការស្វាយ កែវល្មៀត និងស្វាយ ចន្ទី និងជីកដីទាំងនោះដើម្បីយកទៅពិនិត្យនៅប្រទេសចិន ។

បើតាមការបញ្ជាក់ពីលោកទុំ នីរ៉ូ គឺការយកដីទៅពិនិត្យនេះ គឺចង់ដឹងថា ដីនេះត្រូវការប្រើប្រាស់សារធាតុនិងជី ប្រភេទណាខ្លះ បំពេញដល់ដំណាំកសិកម្មរបស់សហគមន៍ដាំដំណាំកសិកម្មចៀសវាងកសិករប្រើប្រាស់ជីកសិកម្មមិនស្របធ្វើឱ្យខូចដីទាំងស្រុងនាពេលអនាគត។

គួរជម្រាបថា នាពេលកន្លងទៅ ឯកឧត្តម សរ សុពុត្រា អភិបាលនៃគណៈអភិបាលខេត្តស្ទឹងត្រែង ក៏ធ្លាប់បានបំពេញទស្សនកិច្ចនៅប្រទេសចិនឈានទៅរកការទំនាក់ទំនងយ៉ាងស្អិតរមួតជាមួយវិនិយោគិនចិន ដើម្បីទាក់ទាញក្រុមហ៊ុនខេត្តហ្វូ ជាន នៃការបណ្តាក់ទុនវិនិយោគនៅខេត្តស្ទឹងត្រែង ដែលជាឱកាសសំរាប់ប្រជាពលរដ្ឋស្ទឹងត្រែងផងដែរ៕