នាព្រឹកថ្ងៃទី ១៦ ខែ ឧសភា ឆ្នាំ២០២៣ ក្រសួងធនធានទឹកនិងឧតុនិយម បានឱ្យដឹងថា ចាប់ពីថ្ងៃទី ១៧ ដល់ថ្ងៃទី ២៣ ខែ ឧសភា ឆ្នាំ ២០២៣ រយៈពេលមួយសប្ដាហ៍ខាងមុខនេះ ព្រះរាជាណាចក្រកម្ពុជានឹងទទួលនូវឥទ្ធិពលពីជ្រលងសម្ពាធទាបឥណ្ឌា និងខ្យល់មូសុងនិតតី ក្នុងកម្រិតពីខ្សោយទៅមធ្យម ដែលបណ្ដាលឱ្យខេត្តនៅតាមតំបន់ចំនួន ៣ នឹងទទួលរងនូវឥទ្ធិពលនេះផងដែរ។
យោងតាមសេចក្ដីជូនដំណឹងរបស់ក្រសួងធនធានទឹកនិងឧតុនិយម តំបន់ចំនួន៣ ដែលទទួលរងឥទ្ធិពលរួមមាន៖
១. តំបន់ទំនាបកណ្ដាល
តំបន់ទីមួយនេះ អាចនឹងមានភ្លៀងធ្លាក់ក្នុងកម្រិតពីខ្សោយទៅមធ្យម និងអាចច្រើនដោយផ្នែកខ្លះ លាយឡំដោយផ្គរ រន្ទះ និង ខ្យល់កន្រ្តាក់។
២. តំបន់ខ្ពង់រាប
ចំពោះតំបន់នេះ អាចនឹងមានភ្លៀងធ្លាក់ក្នុងកម្រិតពីខ្សោយទៅធម្យម និងអាចបង្គួរដោយផ្នែកខ្លះ លាយឡំដោយផ្គរ រន្ទះ និងខ្យល់កន្រ្តាក់។
៣. តំបន់មាត់សមុទ្រ
ដោយឡែកចំពោះតំបន់នេះ អាចមាននឹងមានភ្លៀងធ្លាក់ក្នុងកម្រិតពីតិចទៅមធ្យម។ នឹងបន្តពីថ្ងៃទី២០ ដល់ ២៣ ខែឧសភា បរិមាណភ្លៀងអាចកើនក្នុងកម្រិតពីតិចទៅបង្គួរ លាយឡំដោយផ្គរ រន្ទះ និងខ្យល់កន្រ្កាក់។
ជាមួយគ្នានេះដែរ ក្រសួងធនធានទឹកនិងឧតុនិយមបានអំពាវនាវឱ្យបងប្អូនដែលរស់នៅតាមបណ្តាខេត្តនៃតំបន់ខាងលើបង្កើនការប្រុងប្រយ័ត្នឱ្យបានខ្ពស់ និងថែទាំសុខភាពឱ្យបានល្អ ចំពោះបាតុធម្មជាតិដែលអាចកើតមានឡើងជាយថាហេតុ៕
អត្ថបទដោយ៖ ឌឿក ស្រីនុត
