ក្រសួងធនធានទឹកនិងឧតុនិយមនៅព្រឹកថ្ងៃទី ២៥ ខែ មេសា ឆ្នាំ​២០២៣ នេះបានឱ្យដឹងថា ចាប់ពីថ្ងៃទី ២៦ ខែ មេសា ដល់ថ្ងៃទី ០២ ខែ ឧសភា ឆ្នាំ ២០២៣ កម្ពុជានឹងបន្តទទួលឥទ្ធិពលពីជ្រលងសម្ពាធទាបក្នុងកម្រិតពីខ្សោយទៅមធ្យមនិងខ្យល់ប្រែប្រួល ដែលបណ្ដាលឱ្យខេត្តនៅតាមតំបន់ទាំង ៣ ខាងក្រោមនឹងទទួលរងនូវឥទ្ធិពល អាចកើតមានឡើងនូវសម្ពាធទាបកម្ដៅ( Thermal Low)​ផងដែរ។

យោងតាមរបាយការណ៍របស់ក្រសួងធនធានទឹក និងឧតុនិយម តំបន់ទាំងបីនោះរួមមាន៖

១. តំបន់ទំនាបកណ្ដាល

តំបន់នេះមានសីតុណ្ហភាពអប្បបរមា មានពី២៥ទៅ២៧ អង្សារ និង សីតុណ្ហភាពអតិបរមាមានពី ៣៥ ទៅ ៣៨ អង្សារ ដែលអាចធ្វើឱ្យផ្នែកមួយចំនួននៃបណ្ដាលរាជធានីភ្នំពេញ-ខេត្ត អាចមានភ្លៀងធ្លាក់ក្នុងកម្រិតខ្សោយទៅធម្យម និងអាចបង្គួរនៅផ្នែកខ្លះលាយឡំទៅដោយផ្ទះ រន្ទះ និងខ្យល់កន្រ្តាក់ ពិសេសបណ្ដាលខេត្តភាគពាយយ័ព្យ។

២. តំបន់ខ្ពង់រាប

ចំពោះតំបន់នេះសីតុណ្ហភាពអប្បបរមា មានពី២៥ទៅ២៧ អង្សារ និង សីតុណ្ហភាពអតិបមា ពី៣៥ទៅ៣៧ អង្សារ ដែលអាចបណ្ដាលឱ្យមានភ្លៀងធា្លក់ក្នុងកម្រិតពីខ្សោយទៅធម្យម លាយឡំទៅដោយរផ្គរ រន្ទះ និង ខ្យល់កន្រ្តាក់។

៣.តំបន់មាត់សមុទ្រ

ដោយឡែកតំបន់វិញ សីតុណ្ហាភាពអប្បបរមា មានពី២៥ទៅ២៧​ អង្សារ និង អតិបរមា មានពី ៣៣ទៅ៣៥ អង្សារ ដែលអាចបណ្ដាលឱ្យមានភ្លៀងធ្លាក់ក្នុងកម្រិតពីខ្សោយទៅធម្យម លាយឡំទៅដោយផ្គរ រន្ទះ និងខ្យល់កន្រ្តាក់។

ជាមួយគ្នានេះដែរ ក្រសួងធនធានទឹកនិងឧតុនិយមបានអំពាវនាវឱ្យបងប្អូនដែលរស់នៅតាមបណ្តាខេត្តនៃតំបន់ខាងលើបង្កើនការប្រុងប្រយ័ត្នឱ្យបានខ្ពស់ និងថែទាំសុខភាពឱ្យបានល្អ ចំពោះបាតុធម្មជាតិដែលអាចកើតមានឡើងជាយថាហេតុ៕​

អត្ថបទដោយ៖ ឌឿក ស្រីនុត