លោក​ ព្រំ សំណាង គឺជាកីឡាករគុនខ្មែរលំដាប់កំពូលមួយរូបរបស់ប្រទេសកម្ពុជា និងមានកេរ្តិ៍ឈ្មោះល្បីសាយភាយក្នុងតំបន់អាស៊ី។ មិនតែប៉ុណ្ណោះ មុននេះបន្តិច លោកបានយកឈ្នះខ្សែក្រវ៉ាត់ក្នុងព្រឹត្តិការណ៍ Thai Fight ក្នុងប្រទេសថៃដោយផ្តួលគូប្រកួតសន្លប់ត្រឹមទឹកទីមួយ ល្បីពេញស្រុកថៃ។ តើបុរសម្នាក់នេះមានប្រវត្តិបែបណាខ្លះលើសមរភូមិក្បាច់គុន?

កីឡាករគុនខ្មែរវ័យ៣០ឆ្នាំ ព្រំ សំណាង មានកម្ពស់ ១,៨៣ម៉ែត្រ ទម្ងន់៧៥គីឡូក្រាម ធ្លាប់ប្រកួតចំនួន ១១៨ដង ឈ្នះចំនួន១១៣ដង ចាញ់ចំនួន០២ដងគត់ និងស្ទើរចំនួន០៣ដង។ លើសពីនេះ លោក ព្រំ សំណាង បានបង្កើតប្រវត្តិសាស្ត្រឱ្យខ្លួនឯង ដោយ៨ប្រកួតចុងក្រោយ រូបលោកមិនដែលស្គាល់ពាក្យថាចាញ់ ខណៈបានផ្តួលដៃគូឱ្យសន្លប់​រហូតដល់ទៅ៧ដងឯណោះ។

យ៉ាងណាមិញ លោកក៏ត្រូវបានគេស្គាល់ថាជាអ្នកប្រ​ដា​ល់​​ចិត្ត​​ធំ មិនចេះ​ខ្លាច មិនចេះ​ញញើត ព្រមទាំង​ចូល​វាយ​មិនចេះ​បន្ធូរដៃ​ឱ្យដៃគូ​នោះឡើយ និងដើម្បីឱ្យ​កីឡាករ ព្រំ សំណាង បញ្ចេញសមត្ថភាព និងត្រៀមសម្រាប់ស៊ីហ្គេម ដែលកម្ពុជាជាម្ចាស់ផ្ទះ​ និងក្នុងនាម​ជា​អត្តពលិក​តំ​ណាងឱ្យ​កម្ពុជា​ម្នាក់ផងដែរ។ កីឡាករជើងខ្លាំងទម្ងន់ធ្ងន់រូបនេះ បានលើកឡើងថា «ខ្លួនពិតជារំភើប សម្រាប់ការចុចឈ្មោះឲ្យចូលជម្រើសជាតិ ដើម្បីត្រៀមវាយនៅស៊ីហ្គេម ក្នុងទម្ងន់៨១គីឡូក្រាម ហើយរូបលោកបានចាត់ទុកថានេះក៏ជាឱកាសដ៏មានតម្លៃដើម្បីកសាងស្នាដៃជូនជាតិផងដែរ»៕

អត្ថបទដោយ៖ កាន់ ដារ៉ា (ស្មេរពនេចរ)