គម្រោងសាងសង់ និងកែលម្អរឡើងវិញនៃកំណាត់ផ្លូវជាតិលេខ ១០ ដែលតភ្ជាប់ពីខេត្ដបាត់ដំបង ឆ្លងកាត់ខេត្ដពោធិ៍សាត់ ឆ្ពោះទៅកាន់ខេត្ដកោះកុង គិតមកដល់ពេលនេះសម្រេចការសាងសង់បានជិត ៧០% ហើយ។

ជាក់ស្ដែងយោងតាមសេចក្ដីប្រកាសព័ត៌មានរបស់រដ្ឋបាលខេត្ដបាត់ដំបងស្ដីពី ភាពជោគជ័យរយៈពេល ៥ ឆ្នាំកន្លងមករបស់រដ្ឋបាលខេត្ដ កាលពីថ្ងៃទី២៤ ខែមករា ឆ្នាំ២០២៣ បានបញ្ជាក់ថា គម្រោងសាងសង់ផ្លូវជាតិលេខ១០ ដែលចេញពីស្រុកសំឡូត ខេត្ដបាត់ដំបង ឆ្លងកាត់ខេត្ដពោធិ៍សាត់ ឆ្ពោះទៅខេត្ដកោះកុង បាននឹងកំពុងដំណើរការសាងសង់សម្រេចបានប្រមាណ ៦៩.២៨% នឹងគ្រោងបញ្ចប់នៅចុងឆ្នាំ ២០២៤ខាងមុខនេះ។

តាមការបញ្ជាក់ពីក្រសួងសាធារណការ​ និងដឹកជញ្ជូន កន្លងមក គម្រោងសាងសង់ផ្លូវជាតិលេខ ១០ នេះ មានប្រវែងសរុប ១៩៨.៧១ គីឡូម៉ែត្រ មានទទឹងទ្រូងផ្លូវ ៩ ម៉ែត្រ និងក្រាលដោយកៅស៊ូពីរស្រទាប់ ប្រភេទ (DBST)AC ខណៈគ្រោងចំណាយថវិកាចំនួន ១៨៨ លានដុល្លារ។ ហើយអ្វីដែលចាប់អារម្មណ៍ខ្លាំងនៅក្នុងគម្រោងផ្លូវជាតិខាងលើ គឺការសាងសង់ស្ពានឆ្លងកាត់ស្ទឹងតាតៃកម្ពស់ ៧៥ ម៉ែត្រ ដែលជាស្ពានខ្ពស់ជាងគេនៅក្នុងប្រទេសកម្ពុជា។

គួររំលឹកផងដែរថា គម្រោងផ្លូវជាតិលេខ១០ នេះ ត្រូវបានបើកការដ្ឋានសាងសង់កាលពីថ្ងៃទី០៩ ខែមីនា ឆ្នាំ២០២០ ក្រោមអធិបតីភាពដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្រ្ដីនៃព្រះរាជាណាចក្រកម្ពុជា និងឯកឧត្ដម Wang Wentian ឯកអគ្គរដ្ឋទូតចិនប្រចាំនៅកម្ពុជា៕

អត្ថបទ៖ កឹម ប៊ុនធឿន