ជាដំណឹងល្អសម្រាប់អ្នកធ្វើដំណើរតាមផ្លូវជាតិលេខ ៥ ខណៈនៅក្នុងសប្ដាហ៍ទី៣ នៃខែមិថុនាខាងមុខនេះ អាជ្ញាធរនឹងធ្វើការបើកសម្ពោធដាក់ឲ្យប្រើប្រាស់កំណាត់ផ្លូវពីព្រែកក្ដាមខេត្ដកណ្ដាល ទៅដល់ធ្លាម្អម ខេត្ដពោធិ៍សាត់។ ហើយក្នុងនោះក៏នឹងបើកការដ្ឋានសាងសង់ពីក្រុងសិរីសោភ័ណទៅដល់ក្រុងប៉ោយប៉ែតដែលជាកំណាត់ចុងក្រោយនៃគម្រោងពង្រីកផ្លូវជាតិលេខ៥ផងដែរ។

ព័ត៌មានខាងលើនេះត្រូវបានលើកឡើងនៅក្នុងជំនួបរវាងឯកឧត្ដម ស៊ុន ចាន់ថុល ទេសរដ្ឋមន្ដ្រី រដ្ឋមន្រ្ដីក្រសួងសាធារណការ និងដឹកជញ្ជូន ជាមួយលោកស្រី Kamei Haruko ប្រធានទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) ប្រចាំនៅប្រទេសកម្ពុជាកាលពីថ្ងៃទី២៣ ខែមីនា ឆ្នាំ២០២៣។

សូមជម្រាបផងដែរថា កំណាត់ផ្លូវជាតិលេខ៥ ពីព្រែកក្ដាម ទៅដល់ធ្លាម្អម ដែលជាកំណាត់ចុងក្រោយនេះមានប្រវែងសរុប ១៣៥.២៥ គីឡូម៉ែត្រ បានពង្រីកពី ២ គន្លងទៅ ៤ គន្លង ត្រូវបានចំណាយទឹកប្រាក់សាងសង់ចំនួន ២៤៦ លានដុល្លារ។

ដោយលែកចំពោះកំណាត់ផ្លូវពីក្រុងសិរីសោភ័ណ ទៅដល់ក្រុងប៉ោយប៉ែត្រ ដែលនឹងបើកការដ្ឋាក្នុងថ្ងៃជាមួយគ្នានោះ គឺមានប្រវែង៣៥គីឡូម៉ែត្រ គ្រោងប្រើថវិកាប្រមាណ ៥០លានដុល្លារអាមេរិក ដែលជាឥណទានសម្បទានពីទីភ្នាក់ងារសហប្រតិបត្តិការអន្តរជាតិជប៉ុន (JICA)៕

អត្ថបទ៖ កឹម ប៊ុនធឿន