កាលពីកន្លងទៅ ក្រុមហ៊ុន Danong Agriculture Development និងក្រុមហ៊ុន Tianguan Global Cassava Processing Trading របស់ចិនដែលដឹកនាំដោយលោក Zhao ShuJie និងលោក YU YU ចូលជួបសម្ដែងការគួរសម និងពិភាក្សាការងារជាមួយឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់។

នៅក្នុងជំនួបនេះ ក្រុមហ៊ុនទាំង២ខាងលើ ក៏បានមានគម្រោងបោះទុនវិនិយោគរោងចក្រកែច្នៃដំឡូងមីនិងដាំដុះដំណាំដំឡូងមីសម្រាប់នាំចេញក្នុងទឹកដីខេត្តពោធិ៍សាត់ផងដែរ។

នៅក្នុងដែរ ក៏មានក្រុមហ៊ុន Sinomach Hainan Development Co., Ltd. ដែលជាក្រុមហ៊ុនរដ្ឋចិនដ៏ធំមួយ ដែលមានមុខសញ្ញាអាជីវកម្មក្នុងវិស័យជាច្រើនរួមមាន កសិកម្ម ការនាំចេញ/ចូលផលិតផលកសិកម្ម នេសាទ វិស្វកម្ម ថាមពល និងប្រព័ន្ធឌីជីថល កំពុងតែគ្រោងបោះទុនវិនិយោគក្នុងវិស័យឧស្សាហកម្មស្វាយចន្ទីនៅខេត្តកំពង់ធំផងដែរ។

ជាមួយគ្នានោះដែរ កាលពីកន្លងទៅ ក្រុមហ៊ុន Esport Holding ដែលមកពីប្រទេសកូរ៉េ ក៏បានមកសម្លឹងទីតាំងចំនួន២ គឺនៅរាជធានីភ្នំពេញ និងនៅខេត្តសៀមរាបដោយក្រុមហ៊ុនកំពុងចាប់អារម្មណ៍ក្នុងការវិនិយោគកីឡាប្រភេទនេះ នៅកម្ពុជា ពិសេសនៅរាជធានីភ្នំពេញ និងខេត្តសៀមរាបផងដែរ។

លោកតំណាងក្រុមហ៊ុន Esport Holding បានឲ្យដឹងទៀតថា សម្រាប់ខេត្តសៀមរាប គឺជាខេត្តទេសចរណ៍ដ៏សំខាន់របស់កម្ពុជានោះ វាក៏ជាឱកាសមួយនៅក្នុងការផ្សព្វផ្សាយសក្តានុពលទេសចរណ៍របស់ខ្លួនតាមរយៈព្រឹត្តិការណ៍កីឡានានាផងដែរ ។ បើតាមតំណាងក្រុមហ៊ុន កីឡាអ៊ីស្ប៉ត មិនមែនជាប្រភេទល្បែងពន្វក់ស្មារតីនោះទេ ប៉ុន្តែវាជាប្រភេទកីឡាដែលទាមទារឲ្យអ្នកប្រកួតមានការហ្វឹកហាត់ច្បាស់លាស់ សម្រាប់ការប្រកួត ។ 

លោកថា បើទោះបីវាជាប្រភេទកីឡាមួយថ្មី ប៉ុន្តែវាត្រូវបានទទួលស្គាល់ជាសាកល ដោយក្នុងនោះកីឡាអ៊ីស្ប៉តត្រូវបានដាក់បញ្ចូលជាវិញ្ញាសារកីឡាក្នុងព្រឹត្តិការណ៍លំដាប់ពិភពលោកផងដែរ។ សូមជម្រាបថា នៅកម្ពុជា សហព័ន្ធកីឡាអេឡិចត្រូនិកកម្ពុជា អក្សរកាត់ «សអក»ត្រូវបានបង្កើតឡើងនៅឆ្នាំ២០១៤ហើយត្រូវបានទទួលស្គាល់ជាផ្លូវការដោយគណៈកម្មាធិការជាតិអូឡាំពិកកម្ពុជា និងក្រសួងអប់រំ យុវជន និងកីឡា ព្រមទាំងជាសមាជិកពេញសិទ្ធិរបស់សហព័ន្ធកីឡាអេឡិចត្រូនិកអាស៊ីអាគ្នេយ៍ សហព័ន្ធកីឡាអេឡិចត្រូនិកអាស៊ី និងសហព័ន្ធកីឡាអេឡិចត្រូនិកអន្តរជាតិផងដែរ។

ជាចុងក្រោយ លោក លី សារី អភិបាលរងខេត្តសៀមរាប បានសម្តែងនូវការស្វាគមន៍យ៉ាងកក់ក្តៅចំពោះការជ្រើសរើសយកខេត្តសៀមរាប សម្រាប់ជាទីតាំងវិនិយោគ។ លោកថា នៅខេត្តសៀមរាបក្រៅពីវិស័យទេសចរណ៍ ខេត្តក៏មានសក្តានុពលផ្សេងៗជាច្រើនដែលបង្កបរិយាកាសល្អដល់អ្នកវិនិយោគមកពីបណ្តាប្រទេសនានា ដូចជាអាកាសយានដ្ឋានអន្តរជាតិសៀមរាបអង្គរ ដែលអាចទទួលបាននូវការចុះចតរបស់យន្តហោះធំៗ ជាមួយនេះ រាជរដ្ឋាភិបាលក៏មានគម្រោងសាងសង់ផ្លូវល្បឿនលឿន និងផ្លូវរថភ្លើងជាដើម ដែលនេះ សុទ្ធជាការបង្កលក្ខណៈងាយស្រួលដល់ការវិនិយោគនៅក្នុងខេត្តសៀមរាប៕