ប្រសិនបើសិនគ្មានការប្រែប្រួលទេ ប្រតិបត្ដិការព្រលានយន្ដហោះអន្ដរជាតិភ្នំពេញ ឬព្រលានយន្ដហោះអន្ដរជាតិពោធិ៍ចិនតុង នឹងត្រូវរើទៅកាន់ព្រលានយន្ដហោះអន្ដរជាតិតេជោ នៅរាត្រីថ្ងៃទី៩ ឈានចូលទី១០ ខែកក្កដា ឆ្នាំ២០២៥ ខាងមុខនេះហើយ។ ខណៈប្រត្ដិបត្ដិការនៅក្នុងព្រលានយន្ដហោះចំណាស់មួយនេះ នឹងត្រូវផ្អាកដំណើរការចាប់ពីពេលនោះតទៅតែម្ដង។ នេះបើយោងតាមមន្ដ្រីជាន់ខ្ពស់រដ្ឋលេខាធិការដ្ឋានអាកាសចរណ៍ស៊ីវិលនាពេលថ្មីៗនេះ។

ធ្លាប់តែជាទីតាំងដឹកជញ្ជូនអ្នកដំណើរ និងទំនិញរាប់សិបឆ្នាំ តើព្រលានយន្ដហោះអន្ដរជាតិភ្នំពេញ ឬពោធិ៍ចិនតុងនេះមានប្រវត្ដិបែបណាខ្លះ? ថ្ងៃនេះយើងនឹងនាំប្រិយមិត្ដមកដឹងទាំងអស់គ្នា។ 

ព្រលានយន្ដហោះអន្តរជាតិភ្នំពេញ បានចាប់ផ្ដើមកសាងជាលើកដំបូងនៅឆ្នាំ ១៩៥៧ ដោយក្រុមហ៊ុនបារាំងលើផ្ទៃ លើផ្ទៃដីទំហំ ៣៦៦.៧២ហិកតា មានទីតាំងស្ថិតក្នុងភូមិសាស្ត្រ សង្កាត់ កាកាប ខណ្ឌពោធិ៍សែនជ័យ រាជធានីភ្នំពេញ និងបានសម្ពោធដាក់ឲ្យប្រើប្រាស់នៅថ្ងៃទី ១៩ មករា ឆ្នាំ ១៩៥៩ ដោយពេលនោះមានឈ្មោះថា ព្រលានយន្ដហោះអន្តរជាតិពោធិ៍ចិនតុង។

នៅខែតុលា ឆ្នាំ១៩៩៤ ផ្លូវរត់ឡើងចម្ងាយ ៣០០០ ម៉ែត្រ ត្រូវបានទទួលការរ៉ាប់រង​ជួសជុលជាថ្មីឡើងវិញដោយក្រុមហ៊ុន MEADA របស់ជប៉ុន។ បន្ទាប់មកផ្លូវរត់ឡើង ត្រូវបានសាងសង់បន្ថែមប្រវែង ៣៥០ម៉ែត្រ ទៀតដោយក្រុមហ៊ុនបារាំង G.T.M (Grand Travaux de Marseille) សម្រាប់លទ្ធភាពការចុះចតនៃយន្តហោះធុនធំដូចជា៖  ATR Boeing332 Boeing337 និង Boeing747ជាដើម។

យ៉ាងណាដើម្បីឆ្លើយតបនឹងកំណើនចំនួនអ្នកធ្វើដំណើរ ព្រលានយន្ដហោះនេះត្រូវបានបើកការដ្ឋាន​រុះរើសាងសង់ជាថ្មីឡើងវិញ​នៅឆ្នាំ ១៩៩៥ ដោយក្រុមហ៊ុន SCA (Société de Concession de l'Aéroport)។ ព្រលានយន្ដហោះនេះត្រូវបានសាងសង់រួចរាល់​ជាស្ថាពរនៅឆ្នាំ ២០០២ ដែលមានលទ្ធភាពទទួលអ្នកដំណើរ​បាន ៥លាននាក់ក្នុង១ឆ្នាំ។ ហើយព្រលានយន្ដហោះអន្តរជាតិពោធិ៍ចិនតុង ក៏ត្រូវបានប្តូរឈ្មោះថ្មីទៅជាព្រលានយន្ដហោះអន្តរជាតិភ្នំពេញ​វិញនៅថ្ងៃទី ១៥ មករា ឆ្នាំ ២០០៣។

សូមជម្រាបថា គិតមកដល់ពេលនេះ ព្រលានយន្ដហោះអន្ដរជាតិភ្នំពេញ បានបើកប្រតិបត្ដិការហោះហើររយៈពេល ៦៦ ឆ្នាំហើយ។ បន្ទាប់ពីផ្អាកប្រតិបត្ដិការហោះហើរនេះហើយ គេនៅមិនទាន់ដឹងថា ព្រលានយន្ដហោះអាយុកាល ៦០ ឆ្នាំផ្លាយនេះនឹងយកទៅធ្វើអ្វីបន្ដទៀតនោះឡើយ ទាល់តែរង់ចាំសេចក្ដីសម្រេចរបស់រាជរដ្ឋាភិបាលបន្ដទៀត៕