បន្ទាប់ពីបានរៀបចំផែនការឡើង IPO ដែលអាចនឹងរួចរាល់នៅចុងខែ៣នេះ អ្នកឧកញ៉ា វេជ្ជបណ្ឌិត គួច ម៉េងលី ស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិ នៃក្រុមហ៊ុន ម៉េងលី ជេ. គួច អេឌ្យូខេសិន បានបង្ហើបពីគម្រោងពង្រីកសាខាសាលារបស់ខ្លួន ឱ្យបាន២០កន្លែងទៀត ខណៈបច្ចុប្បន្នមានត្រឹម ១៥សាខាប៉ុណ្ណោះ។
ថ្លែងនៅក្នុងពិធីបើកសិក្ខាសាលាស្តីពី “ការស្វែងយល់ពីវិស័យមូលបត្រនៅកម្ពុជា និងការត្រៀមខ្លួនវិនិយោគលើមូលបត្រកម្មសិទ្ធ” នៅសាល ដឹ ព្រេមៀ សេនធ័រ សែនសុខ កាលពីព្រឹកថ្ងៃសៅរ៍ម្សិលមិញនេះ អ្នកឧកញ៉ា វេជ្ជបណ្ឌិត គួច ម៉េងលី បានបង្ហើបឱ្យដឹងថា “ការបោះផ្សាយមូលបត្រជាសាធារណៈលើកដំបូង IPO នេះ ពួកយើងនឹងទទួលបានការគាំទ្រកាន់តែខ្លាំងឡើង គួបផ្សំនឹងកម្ចីធនាគារផង យើងនឹងពង្រីកសាខា ២០កន្លែងទៀត ដែលយើងបានកក់ដី និងអគាររួចហើយ និងអាចពង្រីកទៅដល់តំបន់ដែលអ្នកគាំទ្រស្នើសុំឱ្យពួកយើងទៅ” ។
អ្នកឧកញ៉ាវេជ្ជបណ្ឌិតបានឱ្យដឹងទៀតថា ពេលនេះ យើងមានកន្លែងរាប់រយដែលយើងចង់ពង្រីកនៅគ្រប់ជ្រុងជ្រោយនៃប្រទេសកម្ពុជា។ ពួកយើងមិនបារម្ភលើតម្លៃសិក្សានោះទេ ដោយសារតម្លៃនោះមានឡើងចុះទៅតាមទីតាំងសាលា និងតាមប្រាក់ចំណូលរបស់មាតាបិតាសិស្ស។ ហើយពួកយើងនៅមានសាលា ១៦០ កន្លែងទៀត ដែលចង់ពង្រីក ខណៈបច្ចុប្បន្ន ពួកយើងទើបតែមាន១៥សាខាទេ ដូច្នេះពួកយើងមានដំណើរវែងឆ្ងាយទៀត។
អ្នកឧកញ៉ា វេជ្ជបណ្ឌិត គួច ម៉េងលី បានគូសបញ្ជាក់ដែរថា “គោលដៅក្នុងការដាក់ក្រុមហ៊ុនចូល IPO នេះ គឺមិនមែនដើម្បីប្រាក់ចំណេញនោះទេ គឺដើម្បីឱ្យកូនខ្មែរមានឱកាសចូលរៀននៅសាលាល្អ មិនថាតំបន់ក្រីក្រ តំបន់មធ្យម ឬតំបន់អ្នកមាននោះទេ គឺយើងត្រូវដាក់(សាលា)នៅគ្រប់តំបន់ទាំងអស់ ដើម្បីជួយរាជរដ្ឋាភិបាលយើងក្នុងការបណ្ដុះបណ្ដាលធនធានរបស់ប្រទេសយើងដែលកំពុងតែមានការលូតលាស់សេដ្ឋកិច្ច” ។
ឯកឧត្តម ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃនិយ័តករមូលបត្រកម្ពុជា បានបង្ហាញការសាទរចំពោះ ក្រុមហ៊ុន ម៉េងលី ជេ. គួច អេឌ្យូខេសិន ម.ក ដែលបានក្លាយជាស្ថាប័នអប់រំដំបូងគេ ក្នុងការឡើងផ្សារមូលបត្រកម្ពុជា នៅក្នុងពេលឆាប់ខាងមុខនេះ។ លើសពីនេះ ឯកឧត្តមបានរំលឹកដែរថា “ការដែលក្រុមហ៊ុនម៉េងលី ជេគួច អេដ្យូខេសិន ចូលបោះផ្សាយលក់មូលបត្រ នឹងអាចមានប្រជាប្រិយភាព ដូចគ្នានឹងការបោះផ្សាយលក់មូលបត្រ របស់រដ្ឋាករទឹកស្វ័យ័តជាលើកដំបូង ដែលអ្នកណាក៏ចង់ក្លាយជាម្ចាស់ភាគហ៊ុនរដ្ឋាករទឹកផងដែរ ហេតុនេះធ្វើឱ្យចំនួនអ្នកវិនិយោគមានច្រើនជាងទំហំភាគហ៊ុន ដែលយើងបានដាក់ជួញដូរ” ។
ឯកឧត្តមបានលើកទឹកចិត្ត ដល់វិនិយោគិនដែលចង់បញ្ជាទិញភាគហ៊ុនរបស់ក្រុមហ៊ុនអ្នកឧកញ៉ា វេជ្ជបណ្ឌិត គួច ម៉េងលី គួរទិញនៅដំណាក់កាលដំបូង។ ហើយឯឧត្តមក៏បានលើកទឹកចិត្តដល់អ្នកឧកញ៉ា វេជ្ជបណ្ឌិត ពិចារណាក្នុងការបោះផ្សាយលក់ប័ណ្ណបំណុលឬសញ្ញាប័ណ្ណបន្ថែមទៀតផងដែរ បន្ទាប់ពីបោះផ្សាយលក់មូលបត្ររួច។
គួរបញ្ជាក់ថា ក្រុមហ៊ុន ម៉េងលី ជេ. គួច អេឌ្យូខេសិន ដែលមានក្រុមហ៊ុនបុត្រសម័្ពន្ធល្បីៗដូចជាមជ្ឈមណ្ឌលភាសា អេ អាយ អាយ (Aii) និងសាលារៀន អន្ដរទ្វីប អាមេរិកាំង (AIS) គឺជាស្ថាប័នអប់រំដំបូងគេនៅកម្ពុជា ដែលនឹងឡើងផ្សារមូលបត្រកម្ពុជា ក្នុងពេលឆាប់ៗនេះ។ ហើយការឡើង IPO នេះ ក្រុមហ៊ុនបានបញ្ជាក់ថា ខ្លួននឹងដាក់ចេញតែ ៤-៦ភាគរយ នៃភាគហ៊ុនតែប៉ុណ្ណោះ ដែលមានតម្លៃប្រហែល ១០លានដុល្លារ អាស្រ័យលើការអនុញ្ញាតរបស់ SERC ។ រីឯតម្លៃចុងក្រោយនៅក្នុងមួយហ៊ុន នឹងអាចបានដឹងនៅសប្តាហ៍ទី៣នៃខែមករានេះ ៕