គិតមកដល់ពេលនេះ អគារទីស្តីការក្រសួងមហាផ្ទៃថ្មី តម្លៃប្រមាណ ៦០លានដុល្លារអាមេរិក សាងសង់សម្រេចបានជាង ៨០ភាគរយហើយ ខណៈបច្ចុប្បន្នកំពុងសាងសង់យ៉ាងមមាញឹក។ នេះបើយោងតាមប្រសាសន៍លើកឡើយរបស់សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីនៃក្រសួងមហាផ្ទៃ នៅថ្ងៃទី ទី១១ ខែមេសា ឆ្នាំ២០២៣ ។
ថ្លែងនៅក្នុងពិធីជួបសំណេះសំណាល និងផ្ដល់អំណោយជូនក្រុមស្ថាបត្យករ វិស្វករ និងកម្មករ កម្មការិនី ដែលកំពុងសាងសង់អគារទីស្ដីការក្រសួងមហាផ្ទៃថ្មីសម្ដេចក្រឡាហោម ស ខេង បានមានប្រសាសន៍ឲ្យដឹងថា “មកដល់ពេលនេះ សាងសង់បាន៨០% ហើយ បើប្រៀបធៀបជាមួយនឹងកិច្ចសន្យា ទន្ទឹមនឹងនោះ គុណភាពសំណង់ក៏ល្អ ទោះបីសាងសង់លឿនក៏ដោយ ខណៈគុណភាពសំណង់ មានភាពរឹងមាំ ដោយមានការត្រួតពិនិត្យ យ៉ាងម៉ត់ចត់ ហើយជាពិសេសទៅទៀត មានសុវត្ថិភាពជាចម្បង ទៅដល់កម្មករទាំងអស់”។
ការសាងសង់អគារទីស្ដីការថ្មីនេះគឺគ្របដណ្ដប់លើផ្ទៃដី ៥,៦ ហិចតា មានទំហំ ១៥៣ម៉ែត្រ គុណ៨៣ម៉ែត្រ មានកំពស់៩ជាន់ មិនរាប់បញ្ចូលជាន់ផ្ទាល់ដី និងជាន់ សម្រាប់ចំណតរថយន្តដែលអាចចតរថយន្តក្នុងអាគារបានសរុប ចំនួន៣៣០គ្រឿង។ គម្រោងនេះគឺទទួលសិទ្ធិម៉ៅការសាងសង់ដោយក្រុមហ៊ុនឈ្មោះ គីម ម៉ិច ខនស្ត្រាក់សិន និងអ៊ិនវេសមេន។
សូមជម្រាបផងដែរថា អគារថ្មីនេះគឺសាងសង់លើទីតាំងចាស់ ស្ថិតនៅតាមបណ្ដោយមហាវិថី ព្រះនរោត្តម ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ត្រូវបានបើកការដ្ឋានសាងសង់កាលពីខែវិច្ឆិកា ឆ្នាំ២០២១ ហើយគ្រោងបញ្ចប់ការសាងសង់នៅ ខែសីហា ឆ្នាំ២០២៣ ខាងមុខនេះ៕
អត្ថបទដោយ៖ ឌឿក ស្រីនុត
