២. គ្រប់គ្រងចំណាយ

ត្រង់ចំណុចនេះ អ្នកជំនាញហិរញ្ញវត្ថុខាងលើបាននិយាយ ចំណាយមាន២ធំៗ គឺចំណាយចាំបាច់ និងមិនចាំបាច់(សម្ភារៈនិយម និងការកំសាន្ត)។ ត្រូវលៃយ៉ាងណាឱ្យចំណាយតិចជាងចំណូល រួមទាំងត្រូវកាត់ចំណាយមិនចាំបាច់ចោលឱ្យបានច្រើនតាមដែលអាចធ្វើទៅបាន ប្រសិនបើក្នុងករណីកាត់ចំណាយមិនចាំបាច់ច្រើនហើយតែនៅចាយមិនគ្រប់ គឺមានន័យថាចំណូលរបស់យើងនៅតិច ដូច្នេះត្រូវបង្កើនប្រភពចំណូលតាមរបៀបដែលលើកឡើងនៅចំណុចទី ១។

៣. បែងចែកសន្សំ

លោកស្រីលើកឡើងថា ការសន្សំជារឿងចាំបាច់បំផុត ព្រោះវាអាចជួយឱ្យយើងសល់លុយដោយមិនដឹងខ្លួន លោកស្រីសង្កត់បន្ថែមថា ១០០៛ ក៏លុយ ១០០០៛ ក៏លុយ ដូច្នេះមិនថារកបានប៉ុន្មានឡើយត្រូវតែបង្កើតទម្លាប់ដកសន្សំឱ្យបានយ៉ាងតិច១០%។

៤. គ្រប់គ្រងបំណុល

ត្រង់នេះដែរ លោកស្រី លឹមហ៊ាង បានបញ្ជាក់ថាប្រសិនបើកំពុងជាប់បំណុល ត្រូវតែខិតខំរកលុយសងបំណុលឱ្យបានឆាប់ ព្រោះថាបំណុលជាប្រភពបញ្ហានិងមិនអាចអូសបន្លាយពេលបាន។ ពេលជាប់បំណុល រឿងទីមួយក្រោយពីរកលុយបានគឺដកសងគេឱ្យហើយសិន ចាំបែកចែកលើការសន្សំ បន្ទាប់មកការចំណាយ។ ត្រូវចាំថាខ្ចីលុយគេបាន មានន័យថាអ្នកជាមនុស្សមានក្រេឌីតល្អ ហេតុនេះត្រូវតែសងលុយឱ្យគេឱ្យអស់តាមការកំណត់ដើម្បីរក្សាក្រេឌីត ងាយស្រួលខ្ចីលុយគេលើកក្រោយ តែដាច់ខាតកុំខ្ចីលុយមកបង្កើតបំណុលទៀត គឺត្រូវខ្ចីមកដើម្បីបង្កើនចំណូលតាមរយៈការពង្រីកអាជីវកម្មឬ វិនិយោគលើឱកាសល្អៗ។

៥. វិនិយោគ

ចំពោះកន្លែងនេះ លោកស្រី បញ្ជាក់យ៉ាងច្បាស់ថា ការវិនិយោគសំខាន់ណាស់ព្រោះវាជាប្រភពនៃចំណូលអកម្មដែលមនុស្សគ្រប់រូបត្រូវមាន ប៉ុន្តែយើងត្រូវវិនិយោគលើអ្វីដែលយើងចេះពិតប្រាកដដើម្បីបង្ការហានិភ័យធ្ងន់ធ្ងរ។ មានន័យថាបើអ្នកមានជំនាញខាងអចលនទ្រព្យគួរវិនិយោគលើអចលនទ្រព្យ បើចេះខាងលក់ដូរគួរវិនិយោគលើការលក់ដូរ។ ឧទាហរណ៍ថាអ្នកធ្លាប់ដឹងពីរបៀបទិញរបស់ពីចិននិងស្គាល់អ្នកបោះដុំទំនិញក្នុងស្រុក អ្នកគួរវិនិយោគទៅលើការនាំចូលទំនិញយកមកលក់។ ជាក់ស្ដែងការវិនិយោគក៏ដូចជាការពង្រីកចំណូល ត្រូវវិនិយោគនៅលើធនធានដែលអ្នកមាន និងចំណេះដែលអ្នកប្រាកដ ទើបអ្នកអាចឈរជើងដោយមិនមានហានិភ័យខ្ពស់។

សរុបមកដើម្បីឱ្យក្ដីស្រមៃដែលចង់រស់នៅក្នុងជីវិតធូរធារ ផុតពីបញ្ហាហិរញ្ញវត្ថុបានយើងត្រូវបង្កើតប្រភពចំណូលឱ្យបានច្រើន តាមរយៈការធ្វើការឬវិនិយោគ ព្រមទាំងចាត់ចែងការចំណាយឱ្យបានច្បាស់លាស់។ យ៉ាងណាមិញសូមកុំភ្លេចថា ក្ដីសុខមិនមែនទាល់តែអ្នកសម្រេចគោលដៅទើបមាននោះទេ លោកអ្នកអាចរស់នៅជាមួយនឹងក្ដីសុខរាល់ថ្ងៃតាមរយៈការធ្វើអ្វីដែលលោកអ្នកស្រលាញ់ និងមានគោលដៅច្បាស់លាស់មួយទៅគ្រប់គ្រាន់ហើយ៕