«វ័យកាន់តែជ្រេ គ្មានសល់អ្វីក្រៅពីក្បាលពោះ ជំពាក់បំណុលគេជុំទិស ហើយចង់បានប្រពន្ធទៀត ឯអនាគតងងឹតស្លុប» នេះគឺជាបញ្ហាដ៏រសើបមួយដែលមនុស្សប្រុសខ្លះកំពុងជួបប្រទះនាទសវត្សរ៍ទី២១។ ឆ្លើយតបទៅនឹងបញ្ហានេះ លោក Steve Adcock ដែលបានចូលនិវត្តន៍តាំងពីអាយុ៣៥ឆ្នាំ មានទ្រព្យសម្បត្តិសុទ្ធចំនួន ១.៤លានដុល្លារ បានចែករំលែករឿងធំៗ៥ ដែលបុរសត្រូវធ្វើមុនចូលវ័យ៣០ឆ្នាំ បើមិនចង់ពិបាករកប្រពន្ធ ហើយអនាគតធូរធារទៀត៖

១/. និយាយពាក្យថា “Yes” ច្រើនជាង “No”

ក្នុងវ័យ២០ឆ្នាំ លោកខ្លាចការបរាជ័យជាខ្លាំង ជំនួសឲ្យការដោះស្រាយអ្វីដែលធ្វើឲ្យលោកភ័យខ្លាច លោកបានរត់គេចមិនហ៊ានប្រឈមមុខ និងសំងំលាក់ទុកសក្តានុពលក្នុងខ្លួនមិនបញ្ចេញ។ លោក Steve និយាយថា៖ «នៅពេលនិយោជករបស់ខ្ញុំបានស្នើលើកខ្ញុំទៅតួនាទីជានាយកគ្រប់គ្រងផ្នែកមួយ ខ្ញុំបានបដិសេធ ព្រោះយល់ថាមិនមានទំនុកចិត្ត និងពុំបានត្រៀមខ្លួនរួចជាស្រេចនៅឡើយ ហើយខ្ញុំបានបាត់បង់ឱកាសនោះ»។ ក្រោយមកការសម្រេចចិត្តនេះបានធ្វើឲ្យលោកសោកស្តាយជាខ្លាំង បើគ្រានោះលោកឆ្លើយតបយល់ព្រម ចំពោះការដំឡើងតំណែង ម្ល៉េះសមនឹងទទួលបានគម្លាតប្រាប់ខែខ្ពស់ ឱកាសរៀនសូត្រលឿន ឆាប់ចូលនិវត្តន៍។

២/. រៀនសម្រេចចិត្តដោយខ្លួនឯង ឈប់ផ្គាប់ចិត្តអ្នកដទៃ

បុរសវ័យ៤១ឆ្នាំរូបនេះបានលើកឡើងយ៉ាងដូច្នេះថា៖ «ខ្ញុំធ្លាប់ឆ្លងកាត់ជីវិតដោយសន្មតថាមនុស្សកំពុងមើលគ្រប់សកម្មភាពរបស់ខ្ញុំ។ ជាលទ្ធផល ខ្ញុំបានធ្វើការសម្រេចចិត្តដែលខ្ញុំគិតថា មិត្តភក្តិ គ្រួសារ មិត្តរួមការងារ ចៅហ្វាយ និងសូម្បីតែមនុស្សចម្លែក នឹងយល់ព្រមឬយល់ស្របអ្វីដែលខ្ញុំធ្វើ។ ប៉ុន្តែវាធ្វើឱ្យខ្ញុំហត់ណាស់»។ នៅពេលអ្នកឈប់ខ្វល់ខ្វាយអំពីរបៀបដែលអ្នកដទៃយល់ឃើញអំពីអ្នក អ្នកនឹងទទួលបានភាពច្បាស់លាស់បន្ថែមទៀតអំពីអ្វីដែលអ្នកចង់បាន ហើយជ្រើសរើសធ្វើអ្វីដែលធ្វើឱ្យអ្នកសប្បាយចិត្ត។

៣/. ស្គាល់ខ្លួនឯងកាន់តែច្រើន និងអនុវត្ត EQ

«អស់រយៈពេលជាយូរ ខ្ញុំបានគិតថា កម្រិតបញ្ញារបស់អ្នក(IQ) កំណត់ភាពជោគជ័យនាពេលអនាគតរបស់អ្នក។ ប៉ុន្តែពេលបានមុជចូលជ្រៅទៅក្នុងអាជីព ខ្ញុំបានដឹងថា (IQ) គ្រាន់តែជាផ្នែកតូចមួយនៃសមីការជោគជ័យប៉ុណ្ណោះ។ វាមានសារៈសំខាន់ជាងក្នុងការផ្តោតលើភាពវៃឆ្លាតខាងអារម្មណ៍ (EQ) ឬការយល់ដឹងខ្ពស់អំពីអារម្មណ៍របស់អ្នកដទៃ ក៏ដូចជាខ្លួនអ្នកផ្ទាល់»។ នេះគឺជាសម្តីរបស់បុរសចូលនិវត្តន៍វ័យ ៣៥ឆ្នាំខាងលើ។

មនុស្សដែលមាន (EQ) ខ្លាំងអាចចាប់យកគំនិតថ្មីបានយ៉ាងឆាប់រហ័ស ប្រតិកម្មដោយស្ងប់ស្ងាត់ និងសមហេតុផលចំពោះស្ថានភាពស្មុគស្មាញ ហើយអាចធ្វើការជាមួយបុគ្គលិកលក្ខណៈជាច្រើនប្រភេទ។ លោក Steve បានបន្ថែមថា ការអនុវត្ត (EQ) ជួយលោកក្នុងការប្រាស្រ័យទាក់ទងប្រកបដោយប្រសិទ្ធភាព និងបង្កើតទំនាក់ទំនងជាមួយចៅហ្វាយនាយ និងសហការីរបស់លោក។ នោះហើយជាអ្វីដែលធ្វើឱ្យលោកដើរបានឆ្ងាយ ទៅបានខ្ពស់ក្នុងដំណើរជីវិត។

៤/. កាត់បន្ថយការចំណាយ ហើយព្យាយាមសន្សំច្រើនជាង៥០% នៃប្រាក់ចំណូលរបស់អ្នក

ច្បាប់ទូទៅគឺត្រូវសន្សំ២០% នៃប្រាក់ចំណូលរបស់អ្នក ប៉ុន្តែប្រសិនបើអ្នកអាចសន្សំបាន៥០% ឬច្រើនជាងនេះ នោះកាន់តែល្អ។ ប្រពន្ធរបស់លោកតែងតែជាអ្នកសន្សំ ខណៈពេលដែលលោកចូលចិត្តចំណាយ ប៉ុន្តែ​នាងបាន​កែចំណុចមិនល្អស្វាមីឲ្យ​មាន​ទម្លាប់​សន្សំសំចៃវិញ។ លោកបាននិយាយថា៖ «យើងឈប់ទិញរបស់ដែលយើងមិនត្រូវការ លុបចោលការជាវប្រចាំខែមិនចាំបាច់ និងសម្រួលថវិកាលើគ្រឿងទេសរបស់យើង។ នៅពេលមួយ យើងសន្សំបាន៧០% នៃប្រាក់ចំណូលរួមរបស់យើង។ យើងបានបញ្ចូលប្រាក់សន្សំបន្ថែមទាំងអស់ទៅក្នុងគណនីវិនិយោគ គណនីឈ្មួញកណ្តាល និងគណនីសន្សំ»។

៥/. បង្កើតប្រព័ន្ធចំណូលច្រើនប្រភព

ការបង្កើតប្រព័ន្ធប្រាក់ចំណូលកាត់បន្ថយហានិភ័យ និងបង្កើតប្រាក់ចំណូលអកម្ម ដែលរួមចំណែកដល់សន្តិសុខហិរញ្ញវត្ថុរយៈពេលវែង។ ក្រុមសេដ្ឋីតែងមានប្រភពចំណូលលើសពីពីរ រួមមានប្រាក់ចំណូលពីការវិនិយោគភាគហ៊ុន មូលបត្របំណុល និងអចលនទ្រព្យ ប្រាក់ចំណូលពីអាជីវកម្ម ឬអាជ្ញាប័ណ្ណផ្សេងៗ។ ចំពោះការបង្កើតប្រព័ន្ធប្រាក់ចំណូលនេះតម្រូវឲ្យមានជំនាញច្បាស់លាស់ស្របតាមចំណងចំណូលចិត្ត  និងបង្កើតផែនការងាជីវកម្ម ឬយុទ្ធសាស្ត្រវិនិយោគ។ លោកបានលើកឡើងថា៖ «អ្នកអាចសម្រេចបាននូវភាពជោគជ័យផ្នែកហិរញ្ញវត្ថុដ៏អស្ចារ្យ និងឯករាជ្យភាពដោយប្រើប្រាស់ភាពខ្លាំង និងចំណាប់អារម្មណ៍របស់អ្នក»។

យ៉ាងណាមិញ ប្រសិនបើអ្នកចង់ក្លាយជាបុរសដែលពោរពេញដោយមន្តស្នេហ៍ និងអាចផ្តល់ភាពកក់ក្តៅដល់គ្រួសារ ជាពិសេសមនុស្សដែលខ្លួនស្រលាញ់ ក្រៅពីមានគោលដៅជីវិតច្បាស់លាស់ អ្នកគួរធ្វើរឿងធំៗទាំង៥ខាងលើឲ្យបាន មុនឈានចូលដល់វ័យ៣០ឆ្នាំ ដើម្បីកសាងអនាគតមួយដ៏ល្អប្រសើរ៕

អត្ថបទដោយ៖ កាន់ ដារ៉ា (ស្មេរពនេចរ) ម្ចាស់ស្នាដៃសៀវភៅ «ច្រវាក់ប្រាក់ខែ»

ចែករំលែកគំនិត ឬផ្សព្វផ្សាយអាជីវកម្មអ្នកទីនេះ សូមទំនាក់ទំនង ០៩៦ ៤៩៩ ៧៣ ៦៦