ការរត់ម៉ារ៉ាតុងគឺជាកីឡាមួយប្រភេទជំនួយសុខភាពក៏ដូចជាពង្រឹងសកម្មភាពសង្គម។ យ៉ាងណាមិញនាពេលថ្មីៗនេះតាមរយៈក្រសួងព័ត៌មាន ដោយមានការគាំទ្រពីវិស័យឯកជន បានសហការរៀបចំ “កម្មវិធីម៉ារ៉ាតុងដើម្បីមនុស្សធម៌ (Run for Charity)” ដែលនឹងប្រព្រឹត្តិទៅនៅថ្ងៃទី១៥ ខែមីនា ឆ្នាំ២០២៥ វេលាម៉ោង៥ព្រឹក នៅ សួន អេកូ ផាក (Eco Park) នៃបុរី ប៉េង ហួត បឹងស្នោ។
ដោយកម្មវិធីរត់ម៉ារ៉ាតុងនេះ ត្រូវបានផ្តួចផ្តើមឡើងក្នុងគោលបំណង ចូលរួមប្រមូលថវិកាគាំទ្រដល់ មូលនិធិគន្ធបុប្ផា និងលើកកម្ពស់សុខមាលភាពសង្គម ដែលចម្ងាយនៃការរត់មានចំនួន៤.៤គីឡូម៉ែត្រនិង៦.៦ គីឡូម៉ែត្រ។
ដូច្នេះដើម្បីជាការចូលរួមចំណែកដល់សង្គមជាតិពង្រឹងទំនាក់ទំនងសង្គម និងលើកកម្ពស់សុខភាពផ្ទាល់ខ្លួន សាធារណជនទាំងអស់អាចចុះឈ្មោះចូលរួមកម្មវិធីរត់ម៉ារ៉ាតុងដើម្បីមនុស្សធម៌បានតាម QR Code ដែលមានភ្ជាប់នៅដខាងក្រោម ចាប់ពីថ្ងៃជូនដំណឹង នេះតទៅរហូតដល់ថ្ងៃសុក្រ ទី២៨ ខែកុម្ភៈ ឆ្នាំ២០២៥។
សម្រាប់ការចូលរួមរត់ម៉ារ៉ាតុងនេះ ពលរដ្ឋទាំងអស់នឹងទទួលបានវត្ថុអនុស្សាវីរយ៍ជាច្រើន ដែលមានរួមមាន មេដាយ អាវយឺត សម្ភារៈការពារ និងថង់កាដូផ្សេងៗ។ អាស្រ័យដូចបានជម្រាបជូនខាងលើសូមពលរដ្ឋទាំងអស់អញ្ជើញចូលរួមឱ្យបានច្រើនកុះករតាមការគួរ។
សូមជម្រាបថា ម៉ារ៉ាតុងគឺជាប្រភេទកីឡាអូឡាំពិច ដែលជាការរត់ប្រណាំងដោយជើងចម្ងាយឆ្ងាយ ខណៈការរត់ម៉ារ៉ាតុងដែលពេញលេញគឺមានរយៈចម្ងាយជាង៤២គីឡូម៉ែត្រឯណោះ។
ដោយឡែកការរត់ពាក់កណ្តាលម៉ារ៉ាតុង ចម្ងាយត្រឹម៥ទៅ១០គីឡូម៉ែត្រ ច្រើនត្រូវបានប្រារព្ធឡើងទូទាំងពិភពលោកដែលមានអ្នកប្រកួតប្រជែងភាគច្រើនជាអត្តពលិកកម្សាន្ត។ កីឡាប្រភេទនេះអាចជំនួយដល់ សុខភាពសរសៃឈាមបេះដូង សួត សុខភាពផ្លូវចិត្តក៏ ដូចជាអាចជួយឱ្យស្រកទម្ងន់ និងពង្រឹងប្រព័ន្ធភាពស៊ាំរបស់មនុស្សផងដែរ៕
អត្ថបទដោយ៖ ពីង ជូអេង
