លោក Maddox Jolie-Pitt កូនចិញ្ចឹមច្បងមានឈាមជ័រជាខ្មែររបស់តារាសម្តែងហូលីវូដ លោកស្រី Angelina Jolie ដែលបានសុំពីមន្ទីរកុមារកំព្រាកាលពីអំឡុងឆ្នាំ២០០២នោះ ពេលនេះ​បានធំពេញវ័យ មានរូបរាងស្រស់សង្ហា និងឈានដល់វ័យ ២១ឆ្នាំហើយ។ កម្លោះសង្ហារូបនេះគឺជាអ្នកស្នងមរតករាប់លានដុល្លារ និងហាក់ទទួលបានការចាប់អារម្មណ៍ខ្លាំងពីសាធារណជនផងដែរ។

ក្រៅពីចំណុចពិសេសខាងលើ Maddox មានលក្ខណៈសម្បត្តិគួរឲ្យសរសើរធំៗ៣ទៀត ដែលជាមន្តស្នេហ៍ក្លាយជាកូនសំណព្វចិត្ត៖

១/. មានអត្តចរិតល្អ៖ ជារឿយៗ កូនច្បងត្រូវបានគេរំពឹងថានឹងជួយមើលថែបងប្អូនបង្កើត។ ប៉ុន្តែទោះបីជា Maddox មិនជាប់សាច់ឈាមជាមួយប្អូនៗក្តី  តាមប្រភពបរទេសបានឲ្យដឹងថា Maddox គឺជាបងប្រុសដ៏ល្អម្នាក់ដែលតែងតែមើលថែនិងមើលការខុសត្រូវប្អូនៗប្រៀបដូចជាឪពុក រួមទាំងផ្តល់ភាពកក់ក្តៅ លួងលោម និងផ្តល់កម្លាំងចិត្តដល់ម្តាយជានិច្ច។

២/. រៀនពូកែ៖ Maddox ត្រូវបានសាកលវិទ្យាល័យជាច្រើនចង់បាន ដើម្បីចូលរៀន ប៉ុន្តែលោកបានជ្រើសរើសយកសាកលវិទ្យាល័យ Yonsei សិក្សាផ្នែកគីមីវិទ្យា លើទឹកដីប្រទេសកូរ៉េខាងត្បូង។ តារាសម្តែង Angelina Jolie បានលើកឡើងថា នាងពិតជាមានមោទកភាពយ៉ាងខ្លាំងចំពោះកូនប្រុសម្នាក់នេះ។ នេះបើតាមការចុះផ្សាយរបស់ទីភ្នាក់ងារសារព័ត៌មាន PEOPLE។

៣/. មានសមត្ថភាពចូលរួមផលិតកុនទាំងវ័យក្មេង៖ តាំងពីម្តាយលែងលះមក Maddox កាន់តែមានភាពស្និតស្នាលជាមួយ Angelina ខ្លាំងឡើង ថែមទាំងមានឱកាសធ្វើការជាមួយម្តាយប្រកបដោយវិជ្ជាជីវៈផងដែរ នៅពេលលោកបានជួយម្តាយដឹកនាំគម្រោងក្នុងខ្សែភាពយន្តរឿង «First They Killed My Father» ដែលត្រូវបានថតនៅក្នុងប្រទេសកម្ពុជាក្នុងរបបប្រល័យពូជសាសន៍។ ជាពិសេស Maddox តែងតែប្រើក្រសែភ្នែកសម្លឹងមើលម្តាយរបស់លោកជានិច្ច។

ក្នុងនាមជាកូនប្រុសចិញ្ចឹមច្បងក្នុងចំណោមបងប្អូន៦នាក់ ជ្រកកោនក្រោមដំបូងតែមួយជាមួយម្តាយមេម៉ាយ កម្លោះសង្ហារ Maddox Jolie-Pitt ដែលមានឈ្មោះខ្មែរថា រត្ន័ វិបុល បានលើកឡើងយ៉ាងដូច្នេះថា៖ «ម្តាយរបស់ខ្ញុំពិតជាកំប្លែង ជាមនុស្សងាយស្រួលរស់នៅនិងធ្វើការជាមួយបំផុត ហើយគាត់ពិតជាអស្ចារ្យខ្លាំងណាស់»៕

 អត្ថបទដោយ៖ កាន់ ដារ៉ា (ស្មេរពនេចរ) ម្ចាស់ស្នាដៃសៀវភៅ «ច្រវាក់ប្រាក់ខែ»
ចែករំលែកគំនិត ឬផ្សព្វផ្សាយអាជីវកម្មអ្នកទីនេះ សូមទំនាក់ទំនង ០៩៦ ៤៩៩ ៧៣ ៦៦