Liziqi គឺជាតារាយូធូបចិនដ៏ល្បីឈ្មោះម្នាក់ ដោយនាងត្រូវបានគេស្គាល់តាមរយៈការធ្វើវីដេអូបង្ហាញពីជីវិតរស់នៅតាមជនបទ ស្រុកស្រែចម្ការ។ ហើយតាមរយៈការធ្វើវីដេអូរបស់នាង បានធ្វើឱ្យមនុស្សជុំវិញពិភពលោកបានស្គាល់ពីវប្បធម៌នៃការរស់នៅរបស់ប្រទេសកាន់តែច្រើន។ ប៉ុន្តែនៅអំឡុងឆ្នាំ២០២១ នាងហាក់បីដូចជាបាត់មិនចេញវីដេអូរហូតធ្វើឱ្យហ្វេនរបស់នាងមានចម្ងល់យ៉ាងខ្លាំង។

យ៉ាងណាមិញ ក្រោយពីបាត់មុខអស់រយៈពេលជាង ៣ឆ្នាំមកនេះ ពេលនេះរាជនីយូធូប Liziqi បានត្រឡប់មកវិញហើយដោយកាលពីថ្ងៃទី១២ ខែវិច្ឆិកា ឆ្នាំ២០២៤ នេះ នាងបានបញ្ចេញវីដេអូធ្វើម្ហូបនៅតាមជនបទដោយធ្វើឱ្យហ្វេនៗនិងអ្នកចូលចិត្តទស្សនាវីដេអូរបស់នាងមានការរំភើបជាខ្លាំង ដោយវីដេអូរបស់នាងម្សិលមិញនេះចេញមិនទាន់បាន ២៤ម៉ោងនោះទេ តែអាចទាញអ្នកមើលរហូតបានដល់ទៅ ៤,៤ លាននាក់ផងដែរ។

ហើយអ្វីដែលកាន់តែអស្ចារ្យទៀតនោះ ការត្រឡប់មកវិញរបស់ Liziqi គឺនាងនៅតែមានភាពស្រស់ស្អាត ចំណែកឯកាយវិការធ្វើម្ហូបរបស់នាងគឺមានភាពរស់រវើកធ្វើឱ្យអ្នកទស្សនារាប់លាននាក់បានចូលខមិនជាការអបអរសាទរដែលនាងត្រឡប់មកវិញ។ ចំណែកឯវីដេអូដែលនាងបានចេញម្សិលមិញនេះ យោងតាមការដកស្រង់ចេញពី SOCIAL BLAG គឺនាងអាចរកលុយបានប្រមាណរហូតដល់ទៅ១ម៉ឺន៦ពាន់ដុល្លារឯណោះ។

គួររំលឹកផងដែរថា តារាស្រី Liziqi បានចាប់ផ្តើមចូលធ្វើវីដេអូចាប់តាំងពីឆ្នាំ ២០១៥ មកម្ល៉េះ ហើយការធ្វើវីដេអូរបស់នាងបានបង្ហាញពីអត្តសញ្ញាណការរស់នៅតាមទីជនបទរបស់ប្រទេសចិនទៅកាន់ពិភពលោក ហើយតាមរយៈការធ្វើវីដេអូនេះ បានជួយឱ្យ Liziqi រកលុយបានរាប់លានដុល្លារ រហូតក្លាយជាសេដ្ឋិនី YouTube ដល់ល្បីឈ្មោះប្រចាំប្រទេសចិនថែមទៀតផង៕