សល់ត្រឹម១៧ថ្ងៃទៀតប៉ុណ្ណោះ ព្រឹត្តិការណ៍ប្រកួតកីឡាប្រជាជាតិអាស៊ីអាគ្នេយ៍ ដ៏ធំសម្បើមគឺ SEA Game 2023 ( Southeast Asia Game ) លើកទី៣២ ដែលមានកម្ពុជាធ្វើជាម្ចាស់ផ្ទះនឹងឈានចូលមកដល់ដោយការប្រកួតនេះនឹងមានការចូលរួមពីប្រទេសបណ្តាមិត្តអាស៊ានទាំង១១ប្រទេស។
រំលឹកទៅដល់ឆ្នាំមុនដែលកម្ពុជាប្រកួតកីឡាស៊ីហ្គេម នៅប្រទេសវៀតណាមនិងដណ្តើមបានមេដាយចំនួន ៦៣ គ្រឿង ក្នុងនោះរួមមានមេដាយមាសចំនួន ៩គ្រឿង មេដាយប្រាក់ចំនួន ១៣គ្រឿង និងមេដាយសំរិទ្ធិ ចំនួន៤១គ្រឿង ដោយមានកីឡាករ-កីឡាការីនីចូលរួមប្រកួតចំនួន៥៦០នាក់ នាពេលនោះ។
មេដាយទាំងនេះដណ្តើមបាននៅលើវិញ្ញាសាកីឡាទាំង ៦ប្រភេទនេះដូចជា វិញ្ញាសាប្រដាល់សេរី ,វិញ្ញាសាប៉េតង់, វិញ្ញាសាវ៉ូវីណាម(vovinam), វិញ្ញាសាតៃក្វាន់ដូ ,វិញ្ញាសាចំបាប់ និងវិញ្ញាសាគុនខ្មែរ។
យ៉ាងណាមិញសម្រាប់ព្រឹត្តិការណ៍កីឡាស៊ីហ្គេមនៅឆ្នាំ២០២៣នេះ នឹងប្រារព្ធឡើងនៅថ្ងៃទី០៥ -១៧ ខែឧសភា ឆ្នាំ២០២៣ និង ASEAN Para Games ចាប់ផ្តើមពីថ្ងៃទី០៣-០៩ ខែមិថុនា ឆ្នាំ២០២៣ នៅពហុកីឡដ្ឋានជាតិ មរតកតេជោ ក្រោមប្រធានបទ "កីឡារស់ក្នុងសន្តិភាព"។
គួរជម្រាបផងដែរថាក្នុងនាមជាម្ចាស់ផ្ទះរៀបចំកម្មវិធីដ៏ធំនេះ កម្ពុជាក៏បានរៀបចំភូមិកីឡាដ៏ធំមួយនៅរាជធានីភ្នំពេញ ដើម្បីទទួលប្រតិភូ និងអត្ដពលិកស្នាក់នៅ ដែលភូមិកីឡាខាងលើនេះគឺលាតសន្ធឹងលើផ្ទៃដីជាង ៦ហិកតាដែលអាចផ្ទុកប្រតិភូចូលរួមនិងអត្តពលិករហូតដល់ ៦០០០នាក់ទៅ៧០០០ នាក់ឯណោះ៕
អត្ថបទដោយ៖ ពីង ជូអេង
