រាជធានីភ្នំពេញ៖ កាលពីពេលថ្មិៗនេះ មូលនិធិព្រីនស៍មានសេចក្តីសោមនស្សរីករាយនៅក្នុងការបើកទទួលពាក្យសម្រាប់កម្មវិធីអាហារូបករណ៍ ចេន ហ្ស៊ី ជំនាន់ទី៤ ដែលមានគោលបំណងជួយសម្រាលបន្ទុកដល់និស្សិតក្រីក្រ និងខ្វះខាត នៃសាកលវិទ្យាល័យនៅកម្ពុជាចំនួន ១០០ នាក់នៅក្នុងឆ្នាំ២០២៥។ ប្រធានក្រុមហ៊ុន ព្រីនស៍ ហូលឌីង គ្រុប អ្នកឧកញ្ញ៉ា ចេន ហ្ស៊ី បានផ្តួចផ្តើមគំនិតបង្កើតមូលនិធិព្រីនស៍ ដើម្បីឧបត្ថម្ភជាអាហារូបករណ៍ដល់សិស្សពូកែនៅថ្នាក់ឧត្តមសិក្សាដែលមានជីវភាពខ្វះខាតក្នុងរយៈពេល៤ឆ្នាំពេញ។
ក្រសួងអប់រំ យុវជន និងកីឡា (MoEYS) បានចូលរួមសហការជាមួយនឹងមូលនិធិព្រីនស៍ ដើម្បីជ្រើសរើសបេក្ខជនដែលមានសមត្ថភាព។ បេក្ខជនដែលត្រូវបានជ្រើសរើសនឹងទទួលបានកញ្ចប់ជំនួយរួមបញ្ចូល អាហារូបការណ៍លើថ្លៃសិក្សារយៈពេល៤ឆ្នាំ ប្រាក់ឧបត្ថម្ភប្រចាំខែ វគ្គបណ្តុះបណ្តាលសម្រាប់អភិវឌ្ឍសមត្ថភាព និងឱកាសកម្មសិក្សានានាផងដែរ។
មូលនិធិព្រីនស៍ ត្រូវបានបង្កើតឡើងក្នុងឆ្នាំ២០១៥ ដោយផ្តោតលើវិស័យអប់រំ ការអភិវឌ្ឍយុវជន វិស័យសុខាភិបាល និងកិច្ចផ្តួចផ្តើមសហគមន៍ ដោយបច្ចុប្បន្ននេះ មូលនិធិព្រីនស៍ បានបរិច្ចាគទឹកប្រាក់ជាង ១៧លានដុល្លារទៅកាន់កម្មវិធីអភិវឌ្ឍន៍សង្គម ដែលផ្តោតលើយុវជន គ្រួសារ និងសហគមន៍មូលដ្ឋាន។
កម្មវិធីអាហារូបករណ៍ ចេន ហ្ស៊ី បានផ្គត់ផ្គង់ដល់និស្សិតកម្ពុជាចំនួន ៣០០នាក់ ក្នុងរយៈពេលបីជំនាន់រួចមកហើយ ដោយផ្តល់ឱកាសឱ្យសិស្សានុសិស្សទាំងនោះបន្តការសិក្សាលើជំនាញផ្នែកបច្ចេកវិទ្យា ផ្នែកអាជីវកម្ម និងផ្នែកវិស្វកម្ម។ កម្មវិធីអាហារូបករណ៍នេះ បានបង្ហាញពីស្មារតីនៃការប្តេជ្ញាចិត្តក្នុងរយៈពេល ៧ឆ្នាំ និងបានចំណាយទំហំទឹកប្រាក់ចំនួន ២លានដុល្លារ។
លោក Gabriel Tan ប្រធានមូលនិធិព្រីនស៍ បានមានប្រសាសន៍ថា “កម្មវិធីអាហារូបករណ៍ ចេន ហ្ស៊ី មានគោលបំណងត្រួសត្រាយផ្លូវសម្រាប់យុវជនកម្ពុជា ដែលមានទេពកោសល្យក្នុងការទទួលបានឱកាសនៃការអប់រំប្រកបដោយគុណភាព និងរួមចំណែកដល់សហគមន៍របស់ពួកគេ”។ លោកបានបន្តទៀតថា "យើងបានធ្វើការផ្តោតទៅលើការអភិវឌ្ឍឱ្យមានអ្នកជំនាញនៅក្នុងវិស័យដែលមានសក្តានុពលចំពោះកំណើនសេដ្ឋកិច្ចរបស់ប្រទេសកម្ពុជា"។
និស្សិតដែលមានអាទិភាពចំពោះអាហារូបករណ៍ជំនាន់ទី៤នេះត្រូវមានលក្ខខណ្ឌដូចតទៅ៖
- មានសញ្ជាតិខ្មែរ
- ជាសិស្សបញ្ចប់ថ្នាក់ទុតិយភូមិឆ្នាំ២០២៣/២០២៤
-បានចុះឈ្មោះចូលរៀននូវមុខជំនាញសិក្សានៅសាកលវិទ្យាល័យដែលជាដៃគូសហការ
សាកលវិទ្យាល័យជាដៃគូសហការរួមមាន:
- សាកលវិទ្យាល័យភូមិន្ទភ្នំពេញ (RUPP) ៖ ផ្នែកវិស្វកម្មព័ត៌មានវិទ្យា ផ្នែកវិទ្យាសាស្ត្រកុំព្យូទ័រ ផ្នែកគ្រប់គ្រងពាណិជ្ជកម្មអន្តរជាតិ និងផ្នែកប្រព័ន្ធផ្សព្វផ្សាយ និងសារគមនាគមន៍។
- វិទ្យាស្ថានបច្ចេកវិទ្យាកម្ពុជា (ITC) ៖ ផ្នែកវិស្វកម្មសំណង់ស៊ីវិល។
- សាកលវិទ្យាល័យជាតិគ្រប់គ្រង (NUM) ៖ ផ្នែកសេដ្ឋកិច្ចឌីជីថល និងផ្នែកទេសចរណ៍។
បែបបទបំពេញពាក្យអាហារូបករណ៍តាមអនឡាញនឹងបើកទទួលពាក្យ ចាប់ពីថ្ងៃទី ១៥ ខែមករា និងផុតកំណត់ថ្ងៃទី១៥ ខែកុម្ភៈ ឆ្នាំ២០២៥។ សិស្សដែលជាប់ក្នុងវគ្គជម្រុះនឹងត្រូវបានអញ្ជើញឱ្យចូលរួមសម្ភាសន៍នៅកំឡុងដើមខែមីនា ហើយជ័យលាភី អាហារូបករណ៍ នឹងត្រូវបានប្រកាសនៅក្នុងកំឡុងចុងខែមីនា។
អំពី មូលនិធិព្រីនស៍៖
មូលនិធិព្រីនស៍ ត្រូវបានបង្កើតឡើងក្នុងឆ្នាំ២០១៥ គឺជាមូលនិធិសប្បុរសធម៌ឈានមុខគេមួយនៅកម្ពុជា។ ក្នុងនាមជា សមាជិករបស់ក្រុមហ៊ុន ព្រីនស៍ ហូលឌីង គ្រុប ដែលជាសម្ព័ន្ធក្រុមហ៊ុនដ៏ធំមួយនៅកម្ពុជា មូលនិធិនេះមានគោលបំណងធ្វើការជាមួយសហគមន៍មូលដ្ឋានដើម្បីកសាងការរស់នៅ និងបរិយាកាសការងារដែលលើកកម្ពស់សុខុមាលភាព និងការរស់នៅរបស់ប្រជាជនស្របតាមចក្ខុវិស័យ «រួមគ្នាកសាងអនាគតកាន់តែប្រសើរសម្រាប់កម្ពុជា»។
ដោយផ្តោតលើវិស័យអប់រំ ការអភិវឌ្ឍយុវជន វិស័យសុខាភិបាល និងកិច្ចផ្តួចផ្តើមសហគមន៍ មូលនិធិព្រីនស៍ បានបន្តធ្វើការជាមួយដៃគូនានាដើម្បីផ្តល់នូវកម្មវិធីដែលមាននិរន្តរភាពនិងឱកាសជាច្រើនដល់យុវជនកម្ពុជា ការបង្កើតសហគមន៍ និងការចូលរួមក្នុងការកសាងហេដ្ឋារចនាសម្ព័ន្ធជានិរន្តរភាព។
គម្រោងដ៏លេចធ្លោរបស់មូលនិធិ គឺជាគម្រោងកម្មវិធីអាហារូបករណ៍ ចេន ហ្ស៊ី ដែលជាគម្រោងអាហារូបករណ៍ប្រចាំឆ្នាំដែលផ្តល់ជូនការបង់ថ្លៃសិក្សាពេញលេញ ប្រាក់ឧបត្ថម្ភប្រចាំខែ កម្មវិធីអភិវឌ្ឍន៍ខ្លួន ឱកាសកម្មសិក្សា និងឱកាសការងារជូនទៅដល់និស្សិតសាកលវិទ្យាល័យកម្ពុជាចំនួន ៤០០នាក់ ក្នុងរយៈពេលប្រាំពីរឆ្នាំ និងមជ្ឈមណ្ឌលបណ្តុះបណ្ដាលវិជ្ជាជីវៈ ព្រីនស៍នាឡិកា ដែលជាសាលាបណ្ដុះបណ្ដាលតែមួយគត់ក្នុងការផ្ដល់ឱកាសសិក្សាអំពីសិល្បៈនៃការផលិតនាឡិកាស្តង់ដាប្រទេសស្វីស។ មូលនិធិព្រីនស៍ បានផ្តួចផ្តើមកម្មវិធីមនុស្សធម៌ជាង ២៥០ កម្មវិធី ដែលបានជួយទៅដលប្រជាជនប្រមាណជាង ១.៥លាន នាក់ ព្រមទាំងធ្វើការបរិច្ចាគដែលមានតម្លៃជាទឹកប្រាក់សរុបលើសពី ១៧ លានដុល្លារ។
សម្រាប់ការសាកសួរព័ត៌មានបន្ថែម: +៨៥៥ ៨១ ៦៨០ ១៩០ (ឃាង អ៊ួយស៊ីង) ឬ ouysing.kheang@princefoundation.com.
ចូលគ្រុបតេលេក្រាមដើម្បីទទួលបានព័ត៌មានបន្ថែមពីអាហាររូបករណ៍
តំណភ្ជាប់: https://t.me/+PJEjcv449w0xYmNl
QR Code សម្រាប់ដាក់ពាក្យអាហាររូបករណ៍
