រាជរដ្ឋាភិបាលសម្រេចយកកោះចំនួន ៧ រួមមាន៖ កោះរ៉ុង កោះរ៉ុងសន្លឹម កោះកូន កោះតូច កោះតាទៀម កោះម្នាស់ក្រៅ កោះម្នាស់ក្នុង និងសមុទ្រជុំវិញដែលមានទីតាំងស្ថិតនៅខេត្ដកោះកុង និងខេត្ដព្រះសីហនុ បង្កើតជាឧទ្យានជាតិសមុទ្រកោះរ៉ុង។ នេះបើយោងតាមអនុក្រឹត្យរបស់រាជរដ្ឋាភិបាលដែលចេញកាលពីពេលថ្មីៗនេះ។
តាមការបញ្ជាក់នៅក្នុងអនុក្រឹត្យ ឧទ្យានជាតិសមុទ្រថ្មីនេះ មានទំហំសរុប ៥២ ៤៤៨ ហិកតា ដោយក្នុងនោះផ្ទៃដីមានចំនួន ៥ ៣១១ ហិកតា និងផ្ទៃទឹកសមុទ្រទំហំ ៤៧ ១៣៧ ហិកតា។ ក្នុងនោះសម្រាប់ការបង្កើតតំបន់ឧទ្យានជាតិសមុទ្រកោះរ៉ុងនេះ មិនបញ្ចូលដីកម្មសិទ្ធឯកជន និងដីប្រើប្រាស់ជាប្រយោជន៍សាធារណៈឡើយ។
សម្រាប់គោលបំណងនៃការបង្កើតឧទ្យានជាតិសមុទ្រនេះមានដូចជា៖
- ធានាការថែរក្សា និងការពារសោភ័ណភាពធម្មជាតិ វប្បធម៌ ប្រព័ន្ធអេកូឡូស៊ី និងជីវៈចម្រុះលើកោះ និងបរិវេណសមុទ្រជុំវិញ
- ផ្ដល់ផលិតផល និងសេវាកម្មធម្មជាតិសម្រាប់ការប្រើប្រាស់ប្រកបដោយនិរន្ដរភាព
- រក្សាសំនឹងបរិស្ថាន ការពារ និងអភិរក្សធនធានធម្មជាតិ និងរួមចំណែកកាត់បន្ថយការប្រែប្រួលអាកាសធាតុ និងហានិភ័យគ្រោះធម្មមហន្ដរាយធម្មជាតិ
- លើកកម្ពស់ការចូលរួមរបស់សហគមន៍មូលដ្ឋានក៏ដូចជាសាធារណជនក្នុងការចូលរួមដល់ការគ្រប់គ្រង ការការពារ និងការអភិរក្សជីវៈចម្រុះ និងធនធានធម្មជាតិក្នុងតំបន់៕
