ក្នុងហេតុការណ៍ផ្ទុះនាវាមុជទឹក Titan ដែលបានឆក់ជីវិតមនុស្ស៥នាក់ មានជនរងគ្រោះពីរនាក់ត្រូវជាឪពុកនិងកូនបង្កើត តាមពិតពួកគាត់បានទិញសំបុត្រកៅអីនេះបន្ទាប់ពីមានបុរសម្នាក់បានបដិសេធមិនព្រមទិញទោះគេបញ្ចុះតម្លៃឲ្យ១០ម៉ឺនដុល្លារក៏ដោយ។ នេះបើយោងតាមទីភ្នាក់ងារសារព័ត៌មាន Mail Online ចុះផ្សាយនារសៀលថ្ងៃទី២៣ ខែមិថុនា ឆ្នាំ២០២៣។
លោក Jay Bloom បុរសដែលបានបដិសេធសំបុត្រកៅអីតម្លៃថោករបស់នាវាមុជទឹក Titan សម្រាប់ខ្លួនឯង និងកូនប្រុស លោកបានចែករំលែកអត្ថបទមួយរវាងលោកនិងនាយកប្រតិបត្តិក្រុមហ៊ុន OceanGate លោក Stockton Rush ដែលបង្ហាញថាលោកត្រូវបានផ្តល់ជូនពិសេសនៃតម្លៃនាទីចុងក្រោយ ថ្លៃសំបុត្រត្រឹម១៥ម៉ឺនដុល្លារប៉ុណ្ណោះ ខណៈតម្លៃធម្មតា ២៥ម៉ឺនដុល្លារ។
នៅក្នុងការបង្ហោះមួយលើគណនី Facebook ផ្ទាល់ខ្លួនកាលពីប៉ុន្មានម៉ោងមុនលោក Jay Bloom បានសរសេររៀបរាប់យ៉ាងដូច្នេះថា៖ «ខ្ញុំបានសម្តែងការព្រួយបារម្ភអំពីសុវត្ថិភាព ហើយលោក Stockton បានប្រាប់ខ្ញុំថា វាមានសុវត្ថិភាពជាងការហោះហើរក្នុងឧទ្ធម្ភាគចក្រ ឬសូម្បីតែការមុជទឹកធម្មតា។ គាត់ជឿជាក់យ៉ាងខ្លាំងថា វាមានសុវត្ថិភាពជាងការដើរឆ្លងកាត់ផ្លូវទៅទៀត។ ខ្ញុំប្រាកដក្នុងចិត្តគាត់ពិតជាជឿនូវអ្វីដែលគាត់កំពុងនិយាយ ប៉ុន្តែគាត់ខុសខ្លាំងណាស់»។
គួរជម្រាបផងដែរថា នៅក្នុងខែកុម្ភៈ ឆ្នាំ២០២៣ លោក Stockton Rush បានសុំឱ្យលោក Bloom និងកូនប្រុសរបស់គាត់ Sean ធ្វើដំណើរផ្សងព្រេងមុជទឹកទៅទស្សនាសាកសពកប៉ាល់ទីតានិចក្នុងខែឧសភា ប៉ុន្តែត្រូវបានអាក់ខានដោយសារអាកាសធាតុ ហើយការជ្រមុជទឹកត្រូវបានពន្យារពេលរហូតដល់ថ្ងៃទី១៨ ខែមិថុនា ដែលជាកាលបរិច្ឆេទនៃការធ្វើដំណើរនាំទៅរកសោកនាដកម្មនេះ។
លោក Bloom បាននិយាយថា៖ «ខ្ញុំបានប្រាប់គាត់ថា ដោយសារកាលវិភាគ យើងមិនអាចទៅបានទេរហូតដល់ឆ្នាំក្រោយទើបអាចធ្វើដំណើរផ្សេងព្រងនេះបាន។ កៅអីរបស់យើងបានទៅមហាសេដ្ឋី Shahzada Dawood និងកូនប្រុសអាយុ ១៩ឆ្នាំរបស់គាត់ Suleman Dawood ដែលជាជនរងគ្រោះពីរនាក់ក្នុងចំណោមបីនាក់ផ្សេងទៀតដែលបានបាត់បង់ជីវិតក្នុងដំណើរកំសាន្តនេះ»៕
អត្ថបទដោយ៖ កាន់ ដារ៉ា (ស្មេរពនេចរ)
