មានពត៌មានបែកធ្លាយជាច្រើនបានចុះថា Apple នឹងបញ្ចេញនៅម៉ូឌែលទូរស័ព្ទថ្មី iPhone 15 របស់ខ្លួននៅថ្ងៃទី២២ ខែកញ្ញានេះ ហើយខ្លះទៀតថាថ្ងៃទី៣១ ប៉ុន្តែពេលនេះច្បាស់ការហើយ ខណៈក្រុមហ៊ុន Apple ប្រាប់ថ្ងៃបើកសម្ពោធ iPhone 15ច្បាស់ៗ ខណៈកម្មវិធីនេះសល់មិនដល់២០ថ្ងៃទៀតទេ។
តាមការចុះផ្សាយរបស់សារពត៌មាន Forbe កាលពីម្សិលមិញនេះបានឱ្យដឹងថា Apple បានបង្ហោះអំពីព្រឹត្តិការណ៍ Apple ស៊េរីថ្មីរបស់ខ្លួន iPhone 15 នឹងប្រារព្ធឡើងនៅថ្ងៃទី ១២ ឈានចូលថ្ងៃទី ១៣ ខែកញ្ញា ឆ្នាំ ២០២៣ វេលាម៉ោង ១២:00 យប់ សម្រាប់ប្រទេសកម្ពុជា។ ទន្ទឹមនឹងនេះដែរ ព្រឹត្តិការណ៍នេះនឹងត្រូវបានផ្សាយបន្តផ្ទាល់នៅលើគេហទំព័ររបស់ Apple ប៉ុស្តិ៍ YouTube ផ្លូវការរបស់ខ្លួន និងតាមរយៈកម្មវិធី Apple TV នៅលើ iPhone, iPad, Mac និង Apple TV ។
គួរជម្រាបផងដែរថា បើទាក់ទងទៅនឹងតម្លៃទូរស័ព្ទ iPhone 15 លោក Tim Long អ្នកវិភាគ Barclays បាននិយាយថា iPhone 15 Pro នាពេលខាងមុខអាចមានតម្លៃ ១,០៩៩ដុល្លារ ដែលជាការកើនឡើង ១០០ដុល្លារ ពោលថ្លៃជាង iPhone 14 Pro បច្ចុប្បន្ន។ ទោះជាយ៉ាងណាក៏ដោយ iPhone 15 Pro Max អាចមានតម្លៃខ្ពស់ជាងនេះ ជាមួយតម្លៃ ១,២៩៩ដុល្លារ ដែលនឹងកើនឡើង ២០០ ដុល្លារថ្លៃជាង iPhone 14 Pro Max ។ Long បានបញ្ជាក់ទៀតថាតម្លៃចាប់ផ្តើមសម្រាប់ iPhone 15 ៧៩៩ដុល្លារ និង iPhone 15 Plus ៨៩៩ដុល្លារ ដែលតម្លៃទាំង២ម៉ូឌែលនេះពុំមានការផ្លាស់ប្តូរឡើយ។
