យោងតាមប្រភពពី Forbes ចុះផ្សាយកាលថ្ងៃទី១៩ ខែតុលា ឆ្នាំ២០២៤នេះ បានឱ្យដឹងថាបច្ចុប្បន្ននេះទូរស័ព្ទ iPhone 16 ត្រូវបានមនុស្សជាច្រើននៅលើបណ្តាញសង្គមអាមេរិក ត្អូញត្អែរអំពីបញ្ហាថ្មដែលមានភាគរយឆាប់ថយចុះខ្លាំង ចាប់តាំងពីការអាប់ដេតទៅប្រតិបត្តិការ iOS 18 ទោះបីជាពួកគេមិនបានប្រើអ្វីច្រើនក៏ដោយ។
ខណៈពេលដែល iPhone16 និង iPhone 16 Pro ទូរស័ព្ទម៉ូឌែលចុងក្រោយរបស់ Apple ត្រូវបានគេសរសើរអំពីសមត្ថភាពកម្រិតខ្ពស់របស់វា តែក៏មានអ្នកប្រើជាច្រើនកំពុងរកឃើញបញ្ហារឿងស៊ីថ្មច្រើន។
អ្នកប្រើប្រាស់ជាច្រើនបានត្អូញត្អែរនៅក្នុងគេហទំព័រ Apple Support Communities និង Reddit ថា iPhone របស់ពួកគេតែងបាត់បង់ថាមពលថ្ម ច្រើនក្នុងមួយថ្ងៃ ទោះបីជាមិនមានការប្រើប្រាស់ច្រើនក៏ដោយ។
ក្នុងចំណោមនោះមានប្រើប្រាស់ម្នាក់បានអះអាងថា តាមការកត់សម្គាល់ទូរសព្ទ័ iPhone 16 របស់គាត់បានធ្លាក់ថ្មចុះយ៉ាងលឿនពីចំនួន ៩៥% ទៅ ៨០% ក្នុងរយៈពេលត្រឹមតែ ២០នាទីបន្ទាប់ពីបានដកខ្សែសាកចេញ។
ប្រភពខាងលើបានបន្តថា ទោះបីជាបញ្ហាថ្មមិនមែនជារឿងចម្លែក បន្ទាប់ពីអាប់ដេត iOS ថ្មីក៏ដោយ ក៏ប៉ុន្តែបរិមាណនៃការត្អូញត្អែររបស់អ្នកប្រើប្រាស់ប្រតិបត្តិការ iOS 18 លើIphone16 មានច្រើនគួរឱ្យកត់សម្គាល់។
យ៉ាងណាមិញតាមរយៈការបញ្ចេញមតិរបស់អ្នកប្រើប្រាស់ទាំងនោះ គេនៅតែមិនទាន់ច្បាស់ថា តើបញ្ហាអ្វីដែលបណ្តាលឱ្យមានបញ្ហាថ្មទាំងនេះនៅលើ iPhone16 ប៉ុន្តែវាមានសញ្ញាហាក់បីដូចជាមានកំហុសមួយចំនួនលើប្រតិបត្តិ iOS 18 ដែលក្រុមហ៊ុន Apple ត្រូវដោះស្រាយ សម្រាប់កំណែអាប់ឌែតនាពេលខាងមុខ៕
អត្ថបទដោយ៖ ពីង ជូអេង
