បើអ្នកបានស្វែងយល់ច្រើនពីប្រទេសឥណ្ឌូនេស៊ី អ្នកច្បាស់ជាដឹងហើយពីសេដ្ឋកិច្ចប្រទេសដែលមានប្រជាជនជាង២៧០លាននាក់មួយនេះ។ ឥណ្ឌូនេស៊ីត្រូវបានគេហៅថាបងធំអាស៊ានព្រោះក្នុងចំណោមប្រទេសសមាជិកអាស៊ានទាំងអស់គឺគាត់មានទំហំសេដ្ឋកិច្ចធំជាងគេពោលគឺទំហំសេដ្ឋកិច្ចរបស់ឥណ្ឌូនេស៊ីមានដល់ទៅជាង១ពាន់ពាន់លានដុល្លារឯណោះ ហើយក៏ចូលជាសមាជិកG20ផងដែរ។

 នៅឆ្នាំ២០២៣នេះក្នុងនាមជាម្ចាស់ផ្ទះអាស៊់ាន ប្រទេសបងធំអាស៊ានមួយនេះមានគំនិតផ្ដួចផ្ដើមជាច្រើនទាក់ទងនឹងការធ្វើជំនួញក្នុងប្រទេសតំបន់អាស៊ាន ហើយគំនិតផ្ដួចផ្ដើមមួយនោះគឺឥណ្ឌូបានផ្ដួចផ្ដើមឲ្យកាត់បន្ថយការប្រើប្រាស់ប្រាក់ដុល្លារអាមេរិកក្នុងការធ្វើជំនួញទ្វេភាគីនៃប្រទេសសមានជិកអាស៊ាន។ ជាពិសេសប្រទេសមួយនេះក៏បានប្រកាសថាខ្លួនលែងចង់ធ្វើជំនួញដោយទូទាត់ជាប្រាក់ដុល្លារទៀតហើយ។

ខាងក្រោមនេះជាហេតុផលធំៗមួយចំនួនដែលប្រទេសឥណ្ឌូនេសចង់ដើរចេញពីការប្រើប្រាស់ប្រាក់ដុល្លារអាមេរិកក្នុងការធ្វើជំនួញ។

១. ជំរុញការប្រើប្រាស់រូបិយប័ណ្ណក្នុងតំបន់

 ក្នុងនាមបងធំអាស៊ាន ប្រទេសឥណ្ឌូនេស៊ីចង់ជំរុញមានការប្រើប្រាស់រូបិយប័ណ្ណក្នុងតំបន់អាស៊ានក្នុងការប្រតិបតិ្តការទូទាត់ជំនួញទ្វេភាគីជាជាងពឹងតែលើប្រាក់ដុល្លាររបស់អាមេរិក។ បច្ចុប្បន្នប្រទេឥណ្ឌូនេស៊ីក៏បានធ្វើជំនួញជាមួយប្រទេសសមាជិកអាស៊ាននិងអាស៊ីដោយមិនចាំបាច់ប្រតិបត្តិការជាប្រាក់ដុល្លារ ដូចជាជាមួយប្រទេសថៃ ប្រទេសម៉ាឡេស៊ីនិងប្រទេសជប៉ុន ហើយកាលពីឆ្នាំ២០២២ប្រទេសនេះកំពុងស្វែងរកកិច្ចព្រមព្រៀមធ្វើជំនួញជាមួយកូរ៉េខាងត្បូងនិងអូសាស្រ្តាលីដោយមិនប្រើលុយដុល្លារផងែរ។

នៅប៉ុន្មានឆ្នាំចុងក្រោយនេះ លោក Joko Widodo ប្រធានាធិបតីរបស់ឥណ្ឌូនេស៊ីបានជំរុញឲ្យរដ្ឋមន្រ្តីក្រសួងហិរញ្ញវត្ថុរបស់ឥណ្ឌូនេស៊ីប្រើប្រាស់លុយរូពៀដែលជារូបិយប័ណ្ណជាតិក្នុងការធ្វើជំនួញជាមួយប្រទេសអាស៊ានឲ្យបានច្រើនតាមដែលអាចធ្វើបាន ពោលគឺព្យាយាមកាត់បន្ថយការប្រើប្រាក់ដុល្លារហើយជំរុញការប្រើរូបិយប័ណ្ណជាតិរបស់ខ្លួនលើឆាកអន្តរជាតិ។

២. ភូមិសាស្រ្ដនយោបាយ

រាល់ថ្ងៃបើយើងមើលពីភូមិសាស្រ្តនយោបាយឃើញថាមានភាពច្របូកច្របល់ រញ៉ែរញ៉ៃ ដូច្នេះការទុកចិត្តទៅលើអាមេរិកគឺមានការធ្លាក់ចុះខ្លាំង។ អ្វីដែលគេបារម្ភគឺអាមេរិកយករូបិយប័ណ្ណរបស់ខ្លួនធ្វើជាអាវុធគំរាមគេគំរាមឯង ពោលគឺបើអ្នកណាមិនធ្វើតាមគាត់បិទមិនឲ្យទូទាត់ជាលុយដុល្លារ ដូច្នេះប្រទេសដែលចង់ទូទាត់ជាលុយដុល្លារ កាលណាយើងចង់ទំនិញដែលយើងនាំចូលឬទទួលលុយទំនិញដែលយើងនាំចេញក៏អាមេរិកបិទមិនឲ្យគេផ្ទេរចូលឬផ្ទេរចេញគឺយើងគាំង។

គួរបញ្ជាក់ផងដែរថា មានប្រទេសចំនួន៥មានដូចជា ចិន រុស្ស៊ី ប្រេស៊ីល ឥណ្ឌានិងអាហ្វ្រិកខាងត្បូង កំពុងពិភាក្សាគ្នាបង្កើតរូបិយប័ណ្ណមួយឈ្មោះថាBRICS ក្នុងគោលបំណងប្រើប្រាស់រូបិយប័ណ្ណនេះក្នុងការធ្វើជំនួញទូទាត់ដោយមិនពឹងលើប្រាក់ដុល្លារ។

ចំណែកនៅអាស៊ាន បើយោងតាមប្រសាន៍ លោក ជំទាវ ជា សិរី ទេសាភិបាលរង ធនាគារជាតិនៃកម្ពុជានាពេលកន្លងមកបានឲ្យដឹងថាក៏យើងកំពុងតែរៀបចំដែរប៉ុន្ដែនៅមានការរយឺតយ៉ាវ ដោយសារអាជីវករមិនទាន់យល់ពីសារសំខាន់នៃការប្រើប្រាស់រូបិប័ណ្ណជាតិ ព្រោះគាត់យល់ថាដុល្លារស្រួល ប៉ុន្ដែបើថ្ងៃក្រោយបើអាមេរិកមានបញ្ហាអីទៅគឺដុល្លារយើងអាចគាំងទាំងស្រុង៕