នាពេលថ្មីៗនេះ បងប្អូនប្រាកដជាដឹងហើយប្រទេសថៃកំពុងតែកក្រើកនៅការឆបោកដ៏ធំមួយដែលធ្វើឱ្យជាជនថៃរាប់ពាន់នាក់បានទៅដាក់ពាក្យបណ្តឹងក្រោយពីបានចាញ់បោកក្រុមហ៊ុន iCon Group។
ជាមួយគ្នានោះដែរ បើយោងតាមការចុះផ្សាយរបស់សារព័ត៌មាន The Nation បានឱ្យដឹងថា ក្រៅពីប្រជាជនដាក់ពាក្យបណ្តឹងទៅកាន់ក្រុមហ៊ុន iCon Group ពេលនេះប៉ូលីសថៃកំពុងរៀបចំការចោទប្រកាន់ធ្ងន់ធ្ងរបន្ថែមទៀតទៅលើករណី "ការលាងលុយកខ្វក់ នឹងការផ្តល់ប្រាក់កម្ចីខុសច្បាប់ និងមានការជាប់ពាក់ព័ន្ធក្នុងអង្គការឧក្រិដ្ឋកម្ម" ប្រឆាំងនឹងនាយកប្រតិបត្តិរបស់ The iCon Group ។
លើសពីនេះទៅទៀត ការចោទប្រកាន់បន្ថែមនឹងត្រូវបានដាក់ដោយអ្នកស៊ើបអង្កេតនៃការិយាល័យស៊ើបអង្កេតកណ្តាលដែលនឹងដំណើរការចោទប្រកាន់ជនសង្ស័យទាំងអស់ដែលបច្ចុប្បន្នកំពុងឃុំខ្លួន។ ការចោទប្រកាន់ត្រូវបានគេរំពឹងថានឹងត្រូវបញ្ចប់នៅចុងសប្តាហ៍នេះ។
បន្ទាប់ពីការចោទប្រកាន់ពីបទលាងលុយកខ្វក់ ក្រុមស៊ើបអង្កេតថៃនឹងសម្របសម្រួលយ៉ាងជិតស្និទ្ធជាមួយនាយកដ្ឋានស៊ើបអង្កេតពិសេស (DSI) ដើម្បីកំណត់ថាតើវាមានលក្ខណៈគ្រប់គ្រាន់ជាករណីស៊ើបអង្កេតពិសេសដែល DSI អាចគ្រប់គ្រងតាមនីតិវិធីច្បាប់ដែរឬទេគេជឿថា DSI បច្ចុប្បន្នកំពុងពិនិត្យមើលរឿងនេះ។
សូមរំលឹកថា បច្ចុប្បន្នលោក Warathaphon Waratyaworrakul មានឈ្មោះហៅក្រៅថា “Boss Paul” ដែលជាស្ថាបនិក និងជានាយកប្រតិបត្តិរបស់ក្រុមហ៊ុន iCon Group Co Ltd និងជនជាប់ចោទទាំង ១៨ នាក់ទៀតត្រូវបានប៉ូលីសឃាត់ខ្លួនយកទៅសួរចម្លើយនៅទីស្នាក់ការស៊ើបអង្កេតកណ្ដាលកាលពីយប់មិញនេះ ចំណែកឯទ្រព្យរបស់លោក Boss Paul ប្រមាណជាង៦លានដុល្លារនិងឡានស៊េរីទំនើបជាច្រើនគ្រឿងទៀតក៏ត្រូវបានរឹបអូសផងដែរ៕