ប្រសិនបើឥឡូវអ្នកមានលុយ ១ម៉ឺនដុល្លារក្នុងកុងធនាគារ តើអ្នកនឹងយកធ្វើរឿងអ្វី? ចម្លើយខ្លះ អាចយកទៅបង់រំលស់ផ្ទះ ទិញឡាន សម្ភារៈទំនើប ឬរបស់ដែលខ្លួនស្រលាញ់ជាដើម។ ប៉ុន្តែមហាសេដ្ឋី Warren Buffett មិនធ្វើដូច្នោះឡើយ លោកនឹងយកលុយនោះទៅបង្កើតទ្រព្យឲ្យកកូនកចៅ កាន់តែមានជាងមុន។

ក្នុងអំឡុងពេលកិច្ចប្រជុំម្ចាស់ភាគហ៊ុនប្រចាំឆ្នាំ Berkshire Hathaway អ្នកចូលរួមម្នាក់ឈ្មោះ Grant Morgan បានដាក់សំណួរទៅកាន់លោក Warren Buffett ថា៖ «បើអ្នកចាប់ផ្តើមម្តងទៀតនៅថ្ងៃនេះក្នុងវ័យ៣០ឆ្នាំ ជាមួយនឹងលុយ ១ម៉ឺនដុល្លារ តើអ្នកនឹងធ្វើអ្វីដើម្បីកសាងភាពមានបានដូចបច្ចុប្បន្ន? ឬ តើខ្ញុំអាចរកប្រាក់បាន ៣០ពាន់លានដុល្លារដោយរបៀបណា?»។

មិនបង្អង់យូរ មហាសេដ្ឋីចាស់វស្សារូបនេះ បានឆ្លើយតបយ៉ាងដូច្នេះថា៖ «មិត្តសម្លាញ់ Charlie របស់ខ្ញុំតែងនិយាយថា រឿងធំដែលយើងបានធ្វើគឺបង្កើតដុំព្រិលតូចមួយ ហើយរមៀលវាដោយប្រុងប្រយ័ត្នពីលើភ្នំទឹកកកក្នុងចម្ងាយដ៏ឆ្ងាយ មានន័យថា ត្រូវចាប់ផ្តើមឲ្យលឿនបំផុតតាំងពីពេលអ្នកនៅក្មេង»។

បន្ទាប់មក លោក Warren Buffett បានរបៀបរាប់លម្អិតអំពីយុទ្ធសាស្ត្ររបស់ខ្លួនថា៖ «ប្រសិនបើខ្ញុំចាប់ផ្តើមពីថ្ងៃនេះ និងមានលុយ ១ម៉ឺនដុល្លារក្នុងដៃ ខ្ញុំនឹងចូលទៅពិភពវិនិយោគដោយចាប់ផ្តើមផ្តោតលើក្រុមហ៊ុនតូចៗ និងសិក្សាពីវាឲ្យល្អិតល្អន់បំផុត ពីព្រោះខ្ញុំចូលចិត្តធ្វើការជាមួយនឹងផលបូកតូចៗ ហើយវានឹងផ្តល់ឱកាសធំមួយ ក្នុងចំណោមអាជីវកម្មតូចៗទាំងនោះ»។ លោកបានបន្ថែមទៀតថា៖ «អ្នកត្រូវតែទិញអាជីវកម្ម ហើយបំណែកអាជីវកម្មតូចៗរបស់អ្នកទៅជាភាគហ៊ុន។ អ្នកត្រូវប្រាកដថា ទិញវាក្នុងតម្លៃដ៏សមរម្យបំផុត ហើយអាជីវកម្មនោះត្រូវតែមានសុខភាពល្អ»។

គួរជម្រាបផងដែរថា លោកមហាសេដ្ឋី Warren Buffett ត្រូវបានគេដាក់រហស្សនាមជា “ស្តេចវិនិយោគ” ដ៏ល្បីល្បាញលំដាប់ពិភពលោក និងកំពុងកាន់កាប់ទ្រព្យសម្បត្តិប្រមាណ ១៥៤ ពាន់លានដុល្លារ គិតត្រឹមថ្ងៃទី០៩ ខែមិថុនា ឆ្នាំ២០២៥ ចេញផ្សាយដោយទស្សនាវដ្តី Forbes ខណៈបច្ចុប្បន្នលោកមានវ័យ ៩៣ឆ្នាំហើយ៕