ការស្វែងរក និងជ្រើសរើសអ្នកជំនាញផ្នែកហិរញ្ញវត្ថុអាចជាជំហានដ៏សំខាន់មួយក្នុងការសម្រេចបាននូវគោលដៅហិរញ្ញវត្ថុរបស់អ្នក។ អ្នកជំនាញផ្នែកហិរញ្ញវត្ថុដែលមានលក្ខណៈសម្បត្តិគ្រប់គ្រាន់អាចផ្តល់ឱ្យអ្នកនូវដំបូន្មាន និងការណែនាំផ្ទាល់ខ្លួនដើម្បីជួយអ្នកក្នុងការគ្រប់គ្រងលុយកាក់ ធ្វើការសម្រេចចិត្តវិនិយោគដែលមានព័ត៌មាន និងផែនការសម្រាប់អនាគតរបស់អ្នក ជាពិសេសគឺជួយដោះស្រាយបញ្ហាហិរញ្ញវត្ថុដែលអ្នកកំពុងជួបប្រទះ។

ខាងក្រោមនេះនេះគឺជាជំហានមួយចំនួនដែលអ្នកអាចអនុវត្តដើម្បីស្វែងរក និងជ្រើសរើសអ្នកជំនាញផ្នែកហិរញ្ញវត្ថុឱ្យបានត្រឹមត្រូវ អាចដោះស្រាយបញ្ហាចំចំណុច ចាយលុយមិនស្ដាយ៖

១. កំណត់តម្រូវការ និងគោលដៅហិរញ្ញវត្ថុរបស់អ្នក៖ មុនពេលចាប់ផ្តើមស្វែងរក វាជារឿងសំខាន់ក្នុងការយល់ដឹងច្បាស់លាស់អំពីតម្រូវការ និងគោលដៅហិរញ្ញវត្ថុរបស់អ្នក។ តើអ្នកកំពុងមានបញ្ហាអ្វី? អ្នកចង់សម្រេចអ្វី? សួរនិងឆ្លើយ ហើយកត់ត្រាឱ្យបានជាក់លាក់ វានឹងជួយអ្នកក្នុងបង្រួមជម្រើស និងស្វែងរកអ្នកជំនាញដែលមានជំនាញក្នុងផ្នែកដែលអ្នកត្រូវការពិតប្រាកដ។

២. សុំយោបល់៖ កន្លែងដ៏ល្អដើម្បីចាប់ផ្តើមស្វែងរកគឺសួរមិត្តភក្តិ ក្រុមគ្រួសារ និងមិត្តរួមការងារសម្រាប់ការណែនាំ។ ប្រសិនបើពួកគេធ្លាប់ប្រឹក្សា ឬមានអ្នកជំនាញដែលគេពេញចិត្តនោះ អ្នកនឹងបានព័ត៌មានល្អៗជាក់ជាមិនខាន។

៣. ស្វែងរកតាមអ៊ីនធឺណិត៖ បណ្ដាញសង្គមគឺជាកន្លែងមួយដែលពោលពេញទៅដោយធនធានមនុស្ស អ្នកច្បាស់ជាអាចរកបាននូវអ្នកជំនាញហិរញ្ញវត្ថុ ឬគ្រូបង្គោលហិរញ្ញវត្ថុជាច្រើន នៅលើ Platform មួយចំនួនដូចជា ហ្វេសប៊ុក ឬយូធូបជាដើម។

៤. ពិនិត្យអត្តសញ្ញាណឱ្យច្បាស់៖ នៅពេលដែលរកបានអ្នកជំនាញមួយចំនួនហើយ ជំហានបន្ទាប់គឺត្រូវពិនិត្យមើលអត្តសញ្ញាណរបស់ពួកគេ។ ត្រូវប្រាកដថាគេមានវិជ្ជាជីវៈត្រឹមត្រូវ មានជំនាញច្បាស់លាស់ អាចទុកចិត្តបាន ជាពិសេសតើសង្គមទទួលស្គាល់គេកម្រិតណា?

៥. រៀបចំការពិគ្រោះយោបល់ដំបូង៖ អ្នកជំនាញផ្នែកហិរញ្ញវត្ថុភាគច្រើនផ្តល់ការប្រឹក្សាដំបូងដោយមិនគិតថ្លៃ។ នេះគឺជាឱកាសដ៏ល្អមួយដើម្បីជួបជាមួយបេក្ខជនដែលមានសក្តានុពលក្នុងចិត្តរបស់អ្នក ពីម្នាក់ទៅម្នាក់ ដើម្បីពិភាក្សាអំពីស្ថានភាពហិរញ្ញវត្ថុរបស់អ្នក និងតេស្តនូវអារម្មណ៍របស់អ្នកចំពោះវិធីសាស្រ្តរបស់ពួកគេ​ពិនិត្យមើលថាតើ ការជួបពិភាក្សាដំបូងនេះល្អយ៉ាងណាដែរ?

៦. សួរសំណួរ៖ ក្នុងអំឡុងពេលពិគ្រោះយោបល់ដំបូងរបស់អ្នក កុំខ្លាចក្នុងការសួរសំណួរ។ សួរអំពីបទពិសោធន៍របស់ពួកគេ ទស្សនវិស័យវិនិយោគ និងថ្លៃឈ្នួលជាដើម។ អ្វីដែលសំខាន់បំផុតគឺត្រូវសង្កេតអារម្មណ៍របស់ខ្លួនឯង ថាមានផាកសុខភាពចំពោះការនិយាយនូវបញ្ហាហិរញ្ញវត្ថុផ្ទាល់ខ្លួនជាមួយបុគ្គលនោះឬទេ?

៧. ជ្រើសរើសទីប្រឹក្សាដែលអ្នកមានអារម្មណ៍ងាយស្រួលជាមួយ៖ ក្រោយពីតេស្តបានច្រើននាក់ហើយ ក៏ដល់ពេលដែលអ្នកត្រូវជ្រើសរើសយកម្នាក់។ ម្នាក់នោះគួរតែជាមនុស្សដែលអ្នកមានអារម្មណ៍សុវត្ថិភាព អាចទុកចិត្តបាន។ ជាពិសេសអ្នកមានទំនុកចិត្តថាគេអាចផ្ដល់ដំណោះស្រាយឱ្យអ្នកចំគោលដៅដែលបានកំណត់តាំងពីដើមទី៕

អត្ថបទដោយ៖ SOKLY SO-កូនផ្កាឈូក