កាលពីថ្ងៃទី០១មេសា ម្សិលមិញនេះ ក្រសួងឧតុនិយមរបស់ថៃបានធ្វើការប្រមានអំពីហានិភ័យសុខភាពដល់មនុស្ស២ប្រភេទ គឺមនុស្សចាស់និងមនុស្សធាត់ ដែលអាចប្រឈមមុខនឹងជំងឺដាច់សរសៃឈាមខួរក្បាល អំឡុងពេលមេឃកំពុងក្តៅខ្លាំងនេះ។ បើយោងតាមការចុះផ្សាយរបស់ Bangkok Post។
ក្នុងនោះលោកស្រី Chomparee Chompurat ប្រធាននាយកដ្ឋានឧតុនិយមថៃបានណែនាំឱ្យ មនុស្សក្រុមនេះប្រយ័ត្នចំពោះសុខភាព កុំហាត់ប្រាណឬធ្វើការនៅក្រោមកម្តៅថ្ងៃយូរម៉ោងពេក ជាពិសេសសូមនៅកន្លែងដែលមានខ្យល់ចេញចូលល្អ រក្សាជាតិទឹកនៅក្នុងខ្លួន និងងូតទឹកត្រជាក់ឱ្យបានទៀងទាត់។
សូមជម្រាបផងដែរថា នៅក្នុងប្រទេសថៃកំពុងទទួលរងនូវកម្តៅខ្លាំងរហូតដល់មានខេត្តខ្លះឡើងដល់ ៤៣អង្សា សីតុណ្ហភាពជាមធ្យមកើនឡើង១អង្សាធៀបនឹងឆ្នាំមុន ដែលនាយកដ្ឋានឧតុនិយមបានព្យាករណ៍ថាកម្តៅនេះអាចនឹងឈានដល់ពាក់កណ្តាលខែឧសភា។
យ៉ាងណាមិញកំឡុងពេលអាកាសធាតុមានការប្រែប្រួល សីតុណ្ហភាពឡើងខ្លាំងបែបនេះ សូមបងប្អូនប្រុងប្រយ័ត្នចំពោះសុខភាព ឧស្សាហ៍ទទួលទានទឹកឱ្យបានច្រើន សម្រាកឱ្យបានទៀងទាត់ ធ្វើលំហាត់ប្រាណនៅកន្លែងដែលមានខ្យល់ចេញចូលល្អ និងកុំនៅក្រោមកម្តៅថ្ងៃយូរពេក៕
អត្ថបទដោយ៖ ពីង ជូអេង
