កាលពីពេលថ្មីៗនេះ ក្រុមហ៊ុន Guanzun និង Harbour &Channel Engineering Bureau Group Co.,Ltd និង China Chemical Engineering 2nd Construction Corporation បានចុះអនុស្សរណៈយោគយល់គ្នា (MOU) លើគម្រោងចម្រាញ់ប្រេងដ៏ធំមួយដែលមានទីតាំងស្ថិតនៅក្នុងខេត្ដកំពត និងមានទុនវិនិយោគសរុបរាប់ពាន់លានុដល្លារឯណោះ។

តាមការបញ្ជាក់ពីលោក ហ្ឆាវ ហ្គ័នជុន (QIAO GUANJUN) ប្រធានក្រុមហ៊ុន Guanzun Energy Investment Co., Ltd. ក្នុងពិធីចុះ MOU កាលពីថ្ងៃទី៤ ខែមេសា បានឲ្យដឹងថា គម្រោងនេះគឺគ្រោងនឹងគ្របដណ្តប់លើផ្ទៃដីចំនួន ២៣៤ហិកតា ដោយចំណាយទុនវិនិយោគសរុប ៣,៥ពាន់លានដុល្លារអាមេរិក ហើយក្នុងផែនការទាំងមូលគឺផ្អែកលើសមត្ថភាព ១០លានតោនក្នុង១ ឆ្នាំ។  

គម្រោងនេះនឹងត្រូវអនុវត្តជាពីរដំណាក់កាល ដោយមានរយៈពេលសាងសង់៣ឆ្នាំ  ដំណាក់កាលទី១ពាក់ព័ន្ធនឹងការសាងសង់រោងចក្រចម្រាញ់ប្រេង ៥លានតោនក្នុង/ឆ្នាំ ជាមួយនឹងការវិនិយោគប្រមាណ ២,៦ពាន់លានដុល្លារអាមេរិក និងរយៈពេលសាងសង់ ១៨ខែ និងដំណាក់កាលទី២ ពាក់ព័ន្ធនឹងការសាងសង់ និងការដាក់ឱ្យដំណើរការ អង្គភាពចម្រាញ់ប្រេង ៥លានតោន/ឆ្នាំ ជាមួយនឹងការវិនិយោគប្រមាណ ៩០០លានដុល្លារ អាមេរិក និងរយៈពេលសាងសង់ ១៨ខែ។

សូមជម្រាបថា គម្រោងនេះគឺជាគម្រោងចម្រាញ់ប្រេងដំបូងគេនៅកម្ពុជា ហើយវានឹងណែនាំបច្ចេកវិទ្យាស្វ័យប្រវត្តិកម្មប្រកបដោយភាពច្នៃប្រឌិតកម្រិតខ្ពស់ និងឯករាជ្យពីប្រទេសចិន មកកាន់ប្រទេសកម្ពុជា ក៏ដូចជាក្រុមអ្នកជំនាញលំដាប់ទីមួយនៅក្នុងប្រទេសចិនផងដែរ៕