នៅប៉ុន្មានសប្ដាហ៍ចុងក្រោយនេះ ហាងឆេងមាសនៅលើទីផ្សារអន្តរជាតិបានបន្តកើនឡើងគួរឲ្យកត់សម្គាល់ ហើយគិតត្រឹមព្រឹកនេះ ហាងឆេងមាសលើទីផ្សារអន្តជាតិបានឡើងថ្លៃចំនួន៣២ដុល្លារដោយឡើងដល់៣,៤៤៧ដុល្លារក្នុងមួយអោន( ស្មើនឹង៤១៥៣ដុល្លារក្នុងមួយតម្លឹង) 

ចំណែកហាងឆេងមាសនៅទីផ្សារប្រទេសកម្ពុជាគិតត្រឹមព្រឹកថ្ងៃសៅរ៍នេះ ហាងឆេងមាសក្នុងស្រុកបានឡើងថ្លៃដល់៤១៥ដុល្លារក្នុងមួយជី។ 

 ហាងឆេងមាសអន្តរជាតិនិងក្នុងស្រុកបន្តឡើងថ្លៃក្រោយលោកត្រាំបានបណ្ដេញលោកស្រី Lisa Cook ដែលជាក្រុមប្រឹក្សាភិបាលនិងជាអភិបាលនៃធនាគារកណ្ដាលរបស់សហរដ្ឋអាមេរិក។ 

ការដកតំណែងលោកស្រី Lisa Cook ពីសំណាក់លោកត្រាំបានធ្វើឲ្យមនុស្សមានការព្រួយបារម្ភថាធនាគារកណ្ដាលរបស់សហរដ្ឋអាមេរិកការបាត់បង់ភាពឯករាជ្យ។ ហើយកំណើននៃការព្រួយបារម្ភរបស់អ្នកវិនិយោគជាសកលមានការកើនដែលរុញឲ្យតម្លៃមាសកើនឡើង។

 ក្រៅពីនេះក៏មានកត្តាផ្សេងទៀតដែលបន្តរុញតម្លៃមាសឲ្យកើនឡើងផងដែរ។ ជាក់ស្ដែងបើយោងតាមទិន្នមកពីសហរដ្ឋអាមរិកបានបង្ហាញថាសន្ទស្សន៍នៃការចំណាយទៅលើទំនិញរបស់ប្រជាជនអាមេរិកមានការកើនឡើង ដែលធ្វើឲ្យអតិផរណាកើនឡើង ហើយរុញតម្លៃហាងឆេងមាសឲ្យកាន់តែកើនឡើងផងដែរ។ 

ស្របពេលដែលតម្លៃទំនិញនៅអាមេរិកកើនឡើង តែប្រជាជនអាមេរិកនៅតែបង្កើនការចំណយនៅក្នុងការរស់នៅ ហើយអតិផរណាក៏កើនឡើងទៀតនោះ ជាសញ្ញាបង្ហាញថាធនាគារកណ្ដាលអាមេរិកនឹងពិបាកក្នុងការទម្លាក់ការប្រាក់នៅអំឡុងខែកញ្ញាឆ្នាំ២០២៥នេះ។  ហើយទាំងនេះគឺជាកត្តាដែលធ្វើឲ្យមាសកាន់តែមានភាពទាក់ទងនឹងកើនឡើង។ 

គួរបញ្ជាក់ផងដែរ ទំនោរនៃហាងឆេងមាសត្រូវបានអ្នកជំនាញព្យាករថានៅតែកើនឡើងនៅចុងឆ្នាំ២០២៥និងអំឡុងឆ្នាំ២០២៦ខាងមុខនេះហាងឆេងមាសនៅតែមានទំនោរឡើងថ្លៃ។ នៅក្នុងនោះដែរ Citi Bank ដែលជាធនាគារធំមួយរបស់អាមេរិកបានព្យាករថាមាសអាចនឹងឡើងដល់៣៥០០ដុល្លារក្នុងមួយអោនក្នុងរយៈពេល៣ខែទៀត៕