យោងតាមការចេញផ្សាយដោយរដ្ឋបាលខេត្ដស្វាយរៀង នៅថ្ងៃទី៣០ ខែសីហា ឆ្នាំ២០២៥នេះ ឯកឧត្តម ប៉េង ពោធិ៍សា អភិបាល នៃគណៈអភិបាលខេត្តស្វាយរៀង បានអញ្ជេីញជាអធិបតីក្នុងពិធីបេីការដ្ឋានសាងសង់គម្រោងរោងចក្រផលិតសំលៀកបំពាក់របស់ក្រុមហ៊ុនខាងលើនេះផងដែរ។
មានប្រសាសន៍ទៅកាន់ពិធីនេះ ឯកឧត្តមអភិបាលខេត្តបានថ្លែងនូវក្តីសោមនស្សរីករាយដែលបានចូលរួមជាធិបតីក្នុងពិធីបេីកការរដ្ឋានសាងសង់រោងចក្រផលិតសំលៀកបំពាក់របស់ក្រុមហ៊ុន “ខេមបូឌា ហ័រជយ ថេកស្តាយ ឯ .ក” នៅក្នុងតំបន់សេដ្ឋកិច្ចពិសេស Qilu នាពេលនេះ ដែលជាមោទនភាពមួយ សម្រាប់ក្រុមហ៊ុន សម្រាប់ខេត្ត និងសម្រាប់ប្រទេសកម្ពុជាទាំងមូលផងដែរ ហេីយនេះជានិមិត្តរូបនៃទំនុកចិត្ត កិច្ចសហប្រតិបត្តិការ និងវិបុលភាពរួមគ្នារវាងប្រទេសកម្ពុជា និងដៃគូវិនិយោគរបស់យើង។
ឯកឧត្តមបន្តថា ការបង្កើតរោងចក្រនេះ នឹងផ្តល់នូវអត្ថប្រយោជន៍ដល់សេដ្ឋកិច្ចយ៉ាងសំខាន់ នឹងបង្កើតឱកាសការងារសម្រាប់កម្មករ កម្មការនី ប្រមាណជាង២០០០នាក់ និងការពង្រឹង ពង្រីកមូលដ្ឋានឧស្សាហកម្មក្នុងតំបន់ និងរួមចំណែកដល់គោលដៅអភិវឌ្ឍន៍ជាតិរបស់យើង ហេីយការវិនិយោគនេះ ស្របទៅតាមយុទ្ធសាស្ត្ររបស់រាជរដ្ឋាភិបាលកម្ពុជា ក្នុងការលើកកម្ពស់កំណើនឧស្សាហកម្មទាក់ទាញការវិនិយោគផ្ទាល់ពីបរទេសប្រកបដោយការទទួលខុសត្រូវ និងលើកកម្ពស់តួនាទី របស់កម្ពុជានៅក្នុងខ្សែសង្វាក់ផ្គត់ផ្គង់ទៅដល់ប្រទេសនានាលេីពិភពលោក។
ឯកឧត្ដមបន្ថែមថា ក្នុងនាមជាអភិបាលខេត្ត សូមគាំទ្រយ៉ាងពេញទំហឹង និងសង្ឃឹមជឿជាក់ថាគម្រោងនេះនិងដំណើរការទៅមុខដោយរលូន និងមានប្រសិទ្ធភាព ហេីយរដ្ឋបាលខេត្តបានត្រៀមខ្លួនរួចជាស្រេចដើម្បីជួយសម្របសម្រួលគ្រប់មធ្យោបាយដែលអាចធ្វើទៅបាន នៅពេលក្រុមហ៊ុនជួបបញ្ហា ទាំងក្នុងពេលសាងសង់ និងនៅពេលអនាគតនៅពេលប្រតិបត្តិការចាប់ផ្តើមជាដេីម។
គួរជម្រាបផងដែរថា ចាប់តាំងពីខែមករា រហូតខែកក្កដា ឆ្នាំ២០២៥ ខេត្ដស្វាយរៀងទទួលបានគម្រោងវិយោគថ្មីៗសរុប ១០២ គម្រោងឈរនៅចំណាត់ថ្នាក់លេខ២ ជាខេត្ដដែលទទួលបានការវិនិយោគច្រើនជាងគេ។ នេះបើយោងតាមរបាយការណ៍របស់ក្រុមប្រឹក្សាវិនិយោគកម្ពុជា។ ហើយតាមការបញ្ជាក់ពីរដ្ឋបាលខេត្ដ ស្វាយរៀងក៏ជាខេត្ដជាប់ចំណាត់ថ្នាក់លេខមួយដែលមានតំបន់សេដ្ឋកិច្ចពិសេសច្រើនជាងគេផងដែរនៅក្នុងប្រទេសកម្ពុជា ពោលគឺមានចំនួន ១២ កន្លែង៕
