ពាក្យថា “ សង្គម “ អាចនឹងមានអត្ថន័យផ្សេងៗគ្នាទៅតាមបរិបទរស់នៅរបស់មនុស្សម្នាក់ៗ។ សម្រាប់អ្នកខ្លះសង្គមប្រៀបបានដូចជាកន្លែងជំរុញទឹកចិត្ត តែខ្លះទៀតប្រៀបបានដូចជាកន្លែងបញ្ឈប់អ្នកពីការធ្វើអ្វីមួយ។ អត្ថបទមួយនេះសរសេរឡើងពីសាច់រឿងពិតរបស់មនុស្សម្នាក់ដែលគាត់បានយកឈ្នះសង្គមមួយដែលទទួលរងពីពាក្យសើចចំអកពីមនុស្សជុំវិញខ្លួន រហូតអាចកែប្រែវាសនារបស់គាត់ ហើយគាត់មានឈ្មោះថា រិទ្ធា។ 

មុននឹងចូលដល់សាច់រឿង ពួកយើងមកដឹងអំពីជីវប្រវត្តិខ្លះៗរបស់លោកគង់ រិទ្ធា ត្រូវជាស្ថាបនិក Octopus X ដែលអ្នកនៅក្នុងវិស័យទីផ្សារឌីជីថលបានស្គាល់ថាជា Ads Monster ដែលស្នាដៃនៃការប៊ូសលក់ផលិតផលឬសេវាកម្មរបស់គាត់ ទទួលបាន រាប់ពាន់សារដែលក្នុងមួយសារមកកាន់អាជីវកម្មត្រឹមតែ $0.4 ប៉ុនណ្ណោះក្នុងមួយ Campaign ។ បើយោងតាមកិច្ចសម្ភាសរបស់ Technology Cambodia កាលពី 29.07.2024 ឆ្នាំមុន ប្រវត្តិនៃការចាប់ផ្តើមរបស់គាត់ហាក់ដូចជារងការសើចចំអកពីមនុស្សជុំវិញខ្លួន ហើយមិនទទួលបានការគាំទ្រនិងលើកទឹកចិត្ត ក្រៅពីរង្វង់គ្រួសាររបស់គាត់។ 

លោកគង់ រិទ្ធាធ្លាប់ជាសិស្សនិស្សិតឆ្នើមផ្នែកស្ថាបត្យកម្មដែលបានបញ្ចប់ការសិក្សា មកពីប្រទេសម៉ាឡេស៊ី ឆ្នាំ 2014 ហើយស្រាប់តែឆ្នាំ 2017 គាត់បានផ្លាស់ប្តូរនិងចាប់យកជំនាញថ្មីពីវិស័យស្ថាបត្យកម្ម ទៅជាទីផ្សារឌីជីថលវិញ ។ អំឡុងពេលនោះមនុស្សជុំវិញគាត់ចាប់ផ្តើមឆ្ងល់និងមិនយល់ថា “ការធ្វើទីផ្សារនៅតាមប្រព័ន្ធអនឡាញជាជំនាញ ឬជាការចុចលេង Facebook អត់ប្រយោជន៍“ ពីព្រោះជំនាន់នោះការធ្វើទីផ្សារតាមបែបឌីជីថលហាក់ដូចជាមិនទាន់ទូលំទូលាយដូចសព្វថ្ងៃ ដែលជាហេតុកើតការវាយតម្លៃនិងរងសម្ពាធពីមនុស្សជុំវិញខ្លួន ហើយក៏ឈានដល់ថ្នាក់មានអ្នកខ្លះបានសួរគាត់ថា “តើហ្នឹងរាប់ជាជំនាញ ?“ ហើយក៏មានអ្នកខ្លះទៀតបាននិយាយបែបចំអកថា “ជំនាញគ្មានសាលាទទួលស្គាល់“ ពេលនោះពាក្យនិយាយពីមាត់មួយទៅមាត់កាន់រីកធំឡើងៗ ហាក់ដូចជាផ្តល់ភាពអវិជ្ជមានមកកាន់ក្រុមគ្រួសារទាំងមូលតែម្តង។ ជាសំណាងរបស់គាត់ដែលមានគ្រួសារ ប៉ាម៉ាក់មិនដែលស្តីបន្ទោសអំពីការចំណាយពេលមកលើការងារដែលថ្មីដែលសង្គមមិនធ្លាប់លឺពីមុនមក ហើយគាត់ក៏បន្តដំណើរដោយមិនខ្វល់ពីសម្តីអវិជ្ជមានសូម្បីតែបន្តិច ។

ឆ្នាំ 2017 ដំណើរចាប់ផ្តើមពីម្នាក់ឯងក្នុងនាមជា Freelancer រហូតអាចបង្កើតក្រុមការងារមួយនៅឆ្នាំ 2019 ដែលមានឈ្មោះថា Octopus ។ គ្រប់យ៉ាងចាប់ផ្តើមដើរម្តងបន្តិច ម្តងបន្តិច រហូតមកដល់ជំនាន់ Covid ការងារភាគច្រើនត្រូវបានកាត់ផ្តាច់ដោយសារការវាយលុកនិងផ្លាស់ប្តូររបៀបនៃការរស់នៅអោយស្របទៅតាមបរិបទទប់ស្កាត់ Covid 19 ។ ពេលនោះក៏ជាពេលមួយដែលក្រុមការងារ Octopus ត្រូវបានរំសាយដោយសារតែក្នុងអាជីវកម្មគ្មានថវិការបំរុងទប់ប្រាក់ខែសម្រាប់ក្រុមការងារ។

ជាសំណាងដែលមាននៅក្នុងគ្រោះ ដូចពាក្យចាស់លោកពោលថា ពន្លឺចាស់បានរលត់តែក៏មានពន្លឺថ្មីនិងមកដល់ ទោះបីជាការបិទខ្ទប់ផ្តល់ផលប៉ះពាល់ដល់អាជីវកម្មពិតមែន តែមហាជនបានងាកមកស្វែងយល់វិស័យធ្វើទីផ្សារឌីជីថល ហើយក៏ចាប់ផ្តើមអោយតម្លៃច្រើនជាងមុនខ្លាំង ពេលនោះមានមនុស្សជាច្រើនចាប់ផ្តើមសួរនាំគាត់អំពីការធ្វើទីផ្សារឌីជីថល ដែលជាពេលវេលាមួយធ្វើអោយសង្គមចាប់ផ្តើមផ្តល់តម្លៃមកកាន់ការងារបែបឌីជីថលវិញ ហើយក៏ជាហេតុមួយជំរុញអោយគាត់ចាប់ផ្តើមសរសេរសៀវភៅអំពីរបៀបនៃការធ្វើទីផ្សារអនឡាញដំបូងបង្អស់ក្នុងប្រទេសកម្ពូជា។ សៀវភៅនោះមានឈ្មោះថា ផែនការនៃការធ្វើទីផ្សារអនឡាញ - Online Marketing Blueprint ដែលជាប់ជាសៀវភៅលក់ដាច់ខ្លាំងក្នុងវិស័យទីផ្សារឌីជីថលកាលពីឆ្នាំ 2022 2023 ។ ហើយឆ្នាំ 2024 គាត់ក៏បានដាក់បាញ់ចេញនៅ Marketing platform ដោយប្រើប្រាស់បច្ចេកវិទ្យា Ai ដែលផ្តល់ដំណោះស្រាយការធ្វើទីផ្សារឌីជីថលអោយមានភាពងាយស្រួលជាងមុនដោយមិនចាំបាច់ចេះកូដ ដែលមានឈ្មោះថា Marketing Corpx ។ 

ក្រឡេកមកមើលកម្រឹតសិក្សារបស់គាត់វិញ គាត់បានសិក្សាពីគ្រូល្បីៗលំដាប់ពិភពលោកជាច្រើនដូចជា Peng Joon ហើយថ្មីៗនេះគាត់ទើបតែបញ្ចប់វគ្គសិក្សាជាមួយ Chris Do នៅប្រទេសសិង្ហបុរីផងដែរ ។ គួរមកដឹងថាក្រៅពីការផ្តល់សេវាកម្មឌីជីថល សព្វថ្ងៃនេះលោកគង់ រិទ្ធាគាត់ក៏ជាអ្នកចែករំលែកចំណេះដឹងនៅលើប្រព័ន្ធអនឡាញ ជាអ្នកនិពន្ធសៀវភៅ ជា Coach & Consultant ហើយក៏ជា Guest Speaker នៅតាមកម្មវិធីធំៗ មិនថាជាកម្មវិធីរបស់រដ្ឋ ឯកជន ឬតាមសាកលវិទ្យាល័យ។ ឥឡូវនេះមានម្ចាស់អាជីវកម្មជាច្រើនដែលចង់ប្រឹក្សាយោបល់ពីគាត់ អំពីយុទ្ធសាស្រ្តផ្សេងៗនៅលើប្រព័ន្ធអនឡាញ។ 

ពេលខ្លះយើងត្រូវតែហ៊ានជឿទៅលើអ្វីដែលយើងសម្លឹងឃើញ ទោះបីជាអ្នកដ៏ទៃមិនបានឃើញក៏ដោយ ព្រោះមានតែខ្លួនយើងនោះទេទើបយល់ពីស្ថានភាពខ្លួនឯងច្បាស់ជាងនរណាទាំងអស់។ 
គាត់បានឆ្លងកាត់ពីមនុស្សម្នាក់ដែលគេសើចចំអកមកលើអាជីព្វរបស់ខ្លួន ក្លាយជាបុគ្គលដែលគេទទួលស្គាល់និងអោយតម្លៃក្នុងសង្គម។ សាច់រឿងមួយនេះអាចបង្រៀនអ្នកថា ប្រសិនបើយើងជឿជាក់លើអ្វីមួយ ចូលកុំបោះបង់ ថ្ងៃណាមួយអ្នកនិងធ្វើបាន៕